جۇڭگو قازاقستاندىق استىققا بولىنەتىن كۆوتانى جىلىنا 1 ملن. توننادان اسىرۋدى جوسپارلاۋدا، - دەپ حابارلايدى «قامشى» پورتالى قازاقپاراتقا سىلتەمە جاساپ.
بۇل تۋرالى بۇگىن ق ر اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتكەن.
«فيتو-سانيتارلىق قاۋىپسىزدىككە كەلەتىن بولساق، ءبىزدىڭ ءداندى داقىلداردى قىتايعا ەكسپورتتاۋدىڭ كەدەرگىلەرىن الىپ تاستادىق، بۇرىن بيداي مەن ارپانى قاپتارعا سالىپ قانا ەلدەن شىعارۋعا رۇقسات بەرىلگەن بولسا، 2016 جىلدان باستاپ، بۇل تالاپتار الىنىپ تاستالدى. ەندى ءداندى داقىلداردى ءۇيىپ اپارۋعا بولادى، بۇل ءوز كەزەگىندە ءبىزدىڭ استىقتىڭ ەكسپورتىن ءبىرشاما ۇلعايتاتىنى ءسوزسىز»، - دەپ اتاپ ءوتتى ول مينيسترلىكتىڭ القا ماجىلىسىندە.
ونىڭ ايتۋىنشا، جۇڭگو مەن قازاقستان ۇكىمەتتەرى قازاقستاندىق استىقتىڭ ەكسپورتىن كوبەيتۋ ماقساتىندا ءبىرقاتار كەلىسىمدەرگە قول جەتكىزگەن.
«قازاقستاندىق استىققا كۆوتانى كوبەيتۋ بويىنشا جۇڭگو ۇكىمەتىمەن كەلىسىم جاسالدى. باستاپقىدا جىلىنا 500 مىڭ تونناعا دەيىن رۇقسات ەتىلسە، كەيىن 1 ملن جانە ودان دا كوپ تونناعا كۆوتا بەرىلە باستايدى. دەمەك، بىزگە جاڭا ەكسپورتتىق باعىت اشىلىپ وتىر، سوندىقتان فيتوسانيتارلىق قىزمەت ءونىمدى ءجىتى باقىلاپ، ونىڭ كارانتينعا ءتۇسىپ قالماۋىن، ءوز مىندەتتەمەلەرىمىزدى ورىنداۋ ءۇشىن ۇلكەن جۇمىستار اتقارۋى ءتيىس»، - دەپ اتاپ ءوتتى ا. مامىتبەكوۆ.
ونىڭ سوزىنە قاراعاندا، مۇنداي كەلىسىمدەر قىتايمەن عانا ەمەس، وزگە ەلدەرمەن دە جاسالۋى شارت.
«بىزدە ساتىلىمعا شىعارا الاتىنداي قاراقۇمىق، وزگە دە ءداندى داقىلداردىڭ فيتوسانيتارلىق سەرتيفيكاتتارى جوق. سوندىقتان فيتوسانيتاريالىق كوميتەتتىڭ باستى مىندەتى - قۋاتىمىزدى جونگە كەلتىرۋ»، - دەدى ۆەدومستوۆ باسشىسى.
پىكىر قالدىرۋ