انىعىندا، ءازىر بىزگە تاۋەلسىزدىكتىڭ ءار جىلى قىمبات. جىلعا جىل قوسىلعان سايىن ءبىز كوممۋنيزم ەلەسىنەن، «قىزىل يمپەريا قايتا ءتىرىلۋى مۇمكىن» دەگەن ۇرەيدەن الىستاي تۇسەمىز. ۋاقىت وتكەن سايىن مۇنداي بولجامداردىڭ قيۋۋى قاشىپ، قيسىنى كەتەدى دەگەن ءۇمىت بار. دەمەك، بىزگە كەرەگى ۋاقىت…

جوق، راس. تاۋەلسىزدىكتىڭ ءار جىلى قىمبات ءبىز ءۇشىن.

بيىل تاۋەلسىزدىكتىڭ 25ء-شى جىلى . جەلتوقساندا تويلايمىز. تويلاۋعا ءتيىسپىز. كسرو-نىڭ قۇلاعانىنا دا ءدال وسى ايدا – جەلتوقساندا 25 جىل تولادى. بۇل دا توي. ءبىز ءۇشىن توي.

كسرو-نىڭ قۇلاعانىنا ولگەنشە وكىنەتىن ءبىر ەل بار.

رەسەي. ىرگەمىزدە وتىر. وكىنەتىنىن سوڭعى كەزدەرى جاسىرماي ايتۋدا. اناۋ-مىناۋ ەمەس ءپۋتيننىڭ اۋزىمەن…

«كسرو-نىڭ كۇيرەۋىن ءححى عاسىرداعى ەڭ ۇلى تراگەدياعا» تەڭەگەن وسى كىسى. كەيىن تاعى ايتتى. قۇداي بىلەدى، ءالى دە ايتادى…

ايتا بەرسىن. ارمانىن بىلەمىز. ورىندالمايدى. ورىندالمايتىنىن ءبىز ەمەس بجەزينسكيي ايتقان. اڭىزعا اينالعان «ۇلى شاحمات تاقتاسىن» وقىعانىڭىز بار ما؟ مىنە، وسى كىتاپتىڭ اۆتورى.

«مەنى ۆلاديمير ءپۋتيننىڭ مەملەكەتتى بيلەۋ ءستيلى الاڭداتادى. ونىڭ سوزىنەن سوعىستىڭ سارىنىن، ورىس ءشوۆينيزمىنىڭ ريتوريكاسىن اڭعارامىن. ول «قىرعي قاباق» سوعىسقا قايتا ورالعىسى كەلەدى. ءبىراق، ول كەشىگىپ قالدى. پۋتين قازىرگى تاريحتىڭ بەتبۇرىسىن، باعىتىن وزگەرتە المايدى»، – دەگەن بجەزينسكيي.

راس ايتادى. ويلاپ قاراعاندا ادامعا «ورىس الەمى» دەگەن يدەيانىڭ ءوزى ۋتوپيا. بۇل يدەيا قايدا بارسا دا قارسىلىققا ۇشىرايدى ەندىگى.

قارسىلىقتىڭ قانداي بولاتىنىن ۋكراينا كورسەتىپ بەردى.

كسرو-نىڭ قۇلاعانىنا شيرەك عاسىر. قۇلادى، قيرادى، ۇمىتىلدى. ءبىراق، كەيبىرەۋلەردىڭ ساناسىندا وتكەن كۇنگە دەگەن ساعىنىش ءالى دە ساقتالعان.

ءبىر جولعى جيىندا قازاقستان مەن رەسەيدى «باۋىرلاس ەلدەر» دەپ سانايتىن ساياساتتانۋشىنىڭ ءسوزىن تىڭدادىق. اتىن ايتپاي-اق قويالىق. ءسوزى ماڭىزدى.

ول نە دەدى؟

«قازاقستاندىق قوعامدا ءالى دە بولسا «سوۆەتسكيي» برەندتەردىڭ ىقپالى كۇشتى. ولارعا دەگەن ساعىنىش سەزىلىپ تۇرادى. وزگە پوستكەڭەستىك ەلدەردە مۇندايدى مۇلدە بايقامايسىڭ. بۇعان نە سەبەپ؟

ايتالىق، الماتىداعى «كوكا-كولا» زاۋىتى ءوز ونىمىنەن تىس «بۋراتينو» ليمونادىن وندىرەدى. «بۋراتينونىڭ» كەڭەستىك برەند ەكەنى بارلىعىمىزعا بەلگىلى. اتالعان ءونىمدى ءوندىرۋ ارقىلى نارىقتى جاۋلايتىندارىنا سەنىمدى بولعاسىن كومپانيا وسى سۋسىندى شىعارا باستادى. قازاقستاندا «سوۆەتسكيي»، «رۋسسكيي» دەپ اتالاتىن وزگە ونىمدەر دە جەتىپ ارتىلادى. مۇندايدى ۋكراينادا ەلەستەتۋ قيىن. بۇل وتكەن كۇنگە دەگەن ساعىنىشتىڭ كورىنىستەرى بولار. مىسالعا، مەن جاقىندا عانا «سوۆەتسكايا مۋسۋلمانسكايا» دەپ اتالاتىن جەرگىلىكتى شۇجىقتى ساتىپ الدىم. كەڭەس وكىمەتىنىڭ دىنگە دەگەن كوزقاراسى قانداي بولعاندىعىن ەسكەرسەك، مۇنى ناعىز پارادوكس دەپ باعالاۋعا بولار ەدى…».

ءسىز قالاي ويلايسىز، ساياساتتانۋشىنىڭ ءسوزى راس پا؟ راس بولسا، ساعىنىشتىڭ تابىن قالاي جويۋعا بولادى؟ الدە بۇل ءالى دە بولسا وتكەن كۇننىڭ ەلەسىنەن ارىلا الماي جۇرگەن ازعانتاي توپتىڭ ساندىراعى ما؟

توپشىلارسىز.

دەرەككوز: kaz.365info.kz