كوكپەكتى ەلدى مەكەنىندە بوگەتتىڭ جارىلۋىنا اۋا رايى سەبەپ، بۇل تۋرالى ق ر توتەنشە جاعدايلار ءمينيسترى ۆلاديمير بوجكو ايتتى.
"18 گرادۋس جىلى بولدى. جان-جاعىنان قار جاۋعان. اعىن بولعان، مۇز، كورىپ تۇرسىزدار، ءالى ەرىمەگەن. جان-جاقتان سۋمەن مۇز قالقىپ كەلگەن"، - دەدى مينيستر. ول اپاتتان بۇرىن پلوتينانى نىعايتۋعا ارەكەت جاسالعانىن ايتتى. "كەشەدەن بەرى بوگەتتى اينالىپ وتەتىن ارىق قازۋعا تىرىسقان، ءبىراق وڭ جاعى، سول جاعى – تاستى جەر، سوندىقتان سۋدىڭ جارتىسى اعىپ كەتتى، سۋ تولقىنىنىڭ كۇشتى بولعانى سونشالىق، ول بۇكىل بوگەتتىڭ بويىمەن قۇيىلعان"، - دەدى بوجكو.
مينيستر جاعدايدى نىساننىڭ مەنشىك يەسى - "شاڭىراق" جشس-مەن بىرگە تالقىلاعانىن اتاپ ءوتتى. "پلوتينانىڭ جاعدايىنا مونيتورينگ جۇرگىزىلگەن، وبلىستىق قىزمەتتەر جۇمىس ىستەمەدى دەي المايمىن. شليۋزدەردىڭ ءبارى اشىق. كۇزدە توعانداعى سۋ شىعارىلعان. بۇل سۋقويمادا ەشقاشان پروبلەما بولعان ەمەس، ءبىز زارداپ شەككەندەردى ارالاپ شىقتىق، ولاردىڭ ءبارى بۇرىن-سوڭدى مۇنشاما قاردىڭ ءبىر مەزگىلدە جاۋماعانىن ايتىپ وتىر"، - دەدى مينيستر.
ءقازىر كوكپەكتى تۇرعىندارىنىڭ ءبارى ۇيلەرىنە ورالدى. جەرگىلىكتى بيلىك پەن شۇعىل قىزمەتتەر اۋىلدان سۋدى سورىپ، اۋماقتى تازالاۋعا كىرىستى. ەسكە سالايىق، كوكپەكتى سۋقويماسىنىڭ بوگەتى 31 ناۋرىزعا قاراعان ءتۇنى شايىلىپ كەتكەن بولاتىن. ارىندى سۋ 300-گە جۋىق ءۇيدى باسىپ قالدى. بەس ادام قايتىس بولدى، التى ادام اۋرۋحاناعا ءتۇستى. توتەنشە جاعداي بويىنشا قىلمىستىق ءىس قوزعالدى. ەلىمىزدە 2010 جىلعى قىزىلاعاش تراگەدياسىنان كەيىن كوپ كىسى ولىمىنە سوقتىرعان مۇنداي جويقىن تاسقىن بولماعان ەدى.
