بۇگىن بۇكىلالەمدىك ەمىزۋ اپتالىعى باستالدى. دۇنيەجۇزى بويىنشا 77 ميلليون جاڭا تۋعان ءسابي، ياعني ءاربىر ەكىنشى نارەستە انا ءسۇتىن ەمبەيدى ەكەن. بۇل دۇنيەگە كەلگەن ءاربىر ەكىنشى نارەستەنىڭ اعزاسىنا اقۋىز بەن مينەرالدىق  زاتتار تۇسپەيدى دەگەن ءسوز. بۇل تۋرالى دۇنيەجۇزىلىك ەمىزۋ اپتالىعى قارساڭىندا (يۋنيسەف) قورى مالىمدەدى. «ەگەر سابيگە جارىق دۇنيە ەسىگىن اشقاننان كەيىن اناسىنىڭ باۋىرىنا سالۋدى ۇزاق كۇتتىرسە ونىڭ ءتىرى قالۋ مۇمكىندىگى كەميدى. بۇل ايەل اعزاسىنىڭ  ءسۇت شىعارۋ قابىلەتىنە دە تەرىس اسەر ەتەدى» دەدى، يۋنيسەف-تىڭ اعا ديەتولوگى فرانس بەگين. مامانداردىڭ سوزىنە سەنسەك، بالا تۋىلعاننان كەيىن تاۋلىك وتكەندە بارىپ ەمىزسە ءسابيدىڭ شەتىنەپ كەتۋى مۇمكىن. ياعني، بىردەن ەمبەگەن سابيلەر 80 پايىز جاعدايدا كوز جۇمادى دەگەن ءسوز.

«انا ءسۇتى — ءسابي ءۇشىن العاشقى ۆاسينا. بۇل —  اۋرۋلارعا قارسى العاشقى جانە ەڭ ءتيىمدى كۇرەس» دەدى فرانس بەگين.
سونداي-اق،  يۋنيسەف ۇيىمى  العاشقى جارتى جىلدا بالانى تەك انا سۇتىمەن قورەكتەندىرۋ قاجەتتىلىگىنە ءمان بەرۋگە شاقىرادى. دارىگەر عالىمدار  انا ءسۇتىن ەمىپ وسكەن بالا مەكتەپتە جاقسى وقيتىنىن جانە سەمىزدىك، ديابەت سياقتى اۋرۋلارعا از شالدىعاتىنىن  ايتىپ وتىر. ءسابيدى ەمىزۋ انا دەنساۋلىعى ءۇشىن وتە پايدالى. بالاسىن ەمىزگەن ايەل ءسۇت بەزىنىڭ قاتەرلى ىسىگى سياقتى دەرت تۇرلەرىنەن ادا بولادى.

تامىزدىڭ 1 مەن 7 ارالىعىندا وتەتىن بۇكىلالەمدىك ەمىزۋ اپتالىعىندا يۋنيسەف قورى جەر بەتىندەگى بارلىق انالاردى بالانى تابيعي جولمەن ەمىزۋدىڭ وتە ماڭىزدى ەكەندىگىن ەسكەرۋگە شاقىرادى.

شارافات جىلقىبايەۆا