ءانشى ساكەن مايعازييەۆ وزگە ارىپتەستەرى سەكىلدى دەپۋتات بولۋدى كوزدەمەيتىنىن، الايدا بولاشاقتا مادەنيەت ءمينيسترى بولعىسى كەلەتىنىن ايتتى، دەپ جازادى Stan.kz.
مايعازييەۆ «كومپرومات» باعدارلاماسى بارىسىندا تەلەجۇرگىزۋشى گۇلبارشىن زايروۆانىڭ «جوعارعى جاقتان بۇيرىق نە ۇسىنىس تۇسسە، دەپۋتات بولۋعا كەلىسەسىز بە؟» دەگەن ساۋالىنا:
«دەپۋتات بولۋ ءۇشىن ءبىلىم كەرەك، ءىلىم كەرەك، سانا كەرەك. سول سەبەپتى مەن دايىن ەمەسپىن دەپ ويلايمىن. ونەر سالاسىندا قىزمەت اتقارىپ جۇرگەننەن كەيىن ەگەر ونەرگە پايداڭ تيەدى دەپ ونەر سالاسىنداعى قىزمەتكە شاقىراتىن، ۇسىناتىن بولسا، ويلانار ەدىم»، – دەپ جاۋاپ بەردى.
ءانشىنىڭ بۇل ءسوزىن نازارعا العان تەلەپروديۋسەر گۇلنۇر ماماسساريپوۆا توسىننان «شابۋىل» جاساپ، «بولاشاقتا مادەنيەت ءمينيسترى بولعىڭ كەلە ما؟» دەپ ساۋال تاستاعان. وعان ساكەن مايعازييەۆ ويلانباستان: «بولعىم كەلەدى» دەپ جاۋاپ بەردى. ونىڭ سەبەبىن بىلايشا ءتۇسىندىردى:
«وزەكتى ماسەلەلەر وتە كوپ. ەڭ الدىمەن، كەڭەسشىلەر قوعامىن ۇيىمداستىرعان بولار ەدىم. سەبەبى ەسترادانى سارالاپ، ساراپتاۋ كەرەك».
