ەل تاۋەلسىزدىگىنىڭ 25 جىلدىعىنا وراي اقتوبەدە وبلىس باسشىسى بەردىبەك ساپاربايەۆتىڭ باستاماسىمەن قايىرىمدىلىق اكسياسى ءوز جالعاسىن تابۋدا. ايماقتا 21 قاراشاعا دەيىن شامامەن 1 000 اتا-اناسىز قالعان، مۇمكىندىگى شەكتەۋلى مەن تۇرمىستىق دەڭگەيى تومەن وتباسىلاردان شىققان بالالارعا 50 ميلليون تەڭگە كولەمىندە كومەك كورسەتىلدى. بۇل تۋرالى اقتوبە وبلىسى اكىمىنىڭ باسپا ءسوز قىزمەتىنەن حابارلاندى، دەپ جازدى قازاقپارات.
ۇلكەن كولەمدى قايىرىمدىلىق اكسياسىنا تانىمال ءانشى قايرات نۇرتاس تا ءوز ۇلەسىن قوستى. ول جۋىردا عانا اقتوبەگە ءوزىنىڭ جەكە كونسەرتىن بەرۋ ءۇشىن كەلگەن بولاتىن. ءانشى كونسەرتتەن تۇسكەن بار قاراجاتتى اقتوبەدە تۇراتىن جەتىم بالالارعا اۋدارۋدى ۇيعارعان. قايىرىمدىلىق كونسەرتىنە قاتىسقان بەردىبەك ساپاربايەۆ يگى ىسكە ۇلەسىن قوسىپ، بەلسەندىلىك تانىتقان انشىگە العىس ايتتى. وبلىس باسشىسى ماڭىزدى الەۋمەتتىك جوبانى جۇزەگە اسىرۋ جۇمىستارىنىڭ ءارى قاراي دا جالعاسىن تاباتىنىن اتاپ ءوتتى.
ايتا كەتەيىك، بۇدان ەكى كۇن بۇرىن «اعايىندى جۇگىنىسوۆتەر» توبى قايىرىمدىلىق كونسەرتىن بەرىپ، ودان تۇسكەن قاراجاتتى اۋىر ناۋقاسقا شالدىققان ۆالەريا بيرزۋل ەسىمدى بۇلدىرشىنگە اۋدارعان بولاتىن.
