بۇگىن، الماتىداعى رەسپۋبليكا سارايىندا «مۋزارت» توبىنىڭ كونسەرتى وتەدى. كەش توپتىڭ ءان الەمىندەگى 15 جىلدىعىنا ارنالعان.

ەستەرىڭىزگە سالساق، «مۋزارت» تريوسى  شىعارماشىلىقتارىنىڭ 15 جىلدىعىنا وراي اعىمداعى جىلدىڭ 8ء-شى شىلدەسىندە استاناداعى «قازاقستان» ورتالىق كونسەرت زالىندا تىڭدارماندارىنا ەسەپ بەرگەن بولاتىن.

ساحنا جۇلدىزدارى بۇل جولى دا وزدەرىنىڭ ۇزدىك اندەرىن ديريجەرلەر الەكساندر بەلياكوۆ، الەكساندر ابىلايەۆ، كومپوزيتور ءارى پروديۋسەر رينات گايسين جانە «استانا» ەسترادالىق-سيمفونيالىق وركەسترىمەن ورىندايدى.

ساكەن مايعازييەۆتىڭ ايتۋىنشا، قازاقستان تاۋەلسىزدىگىنىڭ 25 جىلدىعىنا جانە الماتى قالاسىنىڭ 1000 جىلدىعىنا ارنالعان كونسەرت ەكى ۋاقىتتا بولادى - ءبىرىنشىسى 16.00-دە، ەكىنشىسى 19.30-دا. «15 جىلدا ءبىز 100-دەن اسان ءان جازدىق. كونسەرتتە بارلىعىن ورىنداي المايمىز. ءبىراق ءبىز حالىق ءسۇيىپ تىڭدايتىن 28 ءاندى تاڭداپ وتىرمىز. سونىمەن قاتار، جاڭا اندەردى دە ورىندايتىن بولامىز»، - دەدى ول. 

ونىڭ ايتۋىنشا، ساحناعا ءوزى، مەيرامبەك بەسبايەۆ جانە كەنجەبەك ءجانابىلوۆ جەكە شىعىپ تا ءان ورىندايدى. سونىمەن قاتار، «مۋزارتتىڭ» بۇرىنعى ءانشىسى ماقسات بازاربايەۆ تا ساحناعا شىعادى. سونداي-اق، توپتىڭ كەلەسى جىلى قازاقستان قالالارىندا جەكە شىعارماشىلىق كونسەرتتەرىن بەرۋ جوسپارلانعان.