قىزىلوردا قالاسىندا وبلىس اكىمدىگىنىڭ قولداۋىمەن تاۋەلسىزدىكتىڭ 25 جىلدىعىنا ارنالعان حالىقارالىق الامان ايتىس ءوتتى.

قازاقستان، قىرعىزستان، جۇڭگو، مونعوليادان اقىندار قاتىسقان الامان دودا بولدى. ايتىس ناتيجەسى تومەندەگىدەي: باس جۇلدە (شەتەل اۆتوكولىگى) -  مۇحتار نيازوۆ (قىزىلوردا) ءبىرىنشى ورىن (اۆتوكولىك) -ۇلاربەك ميناتxان (جۇڭگو) ەكىنشى ورىن (ەكەۋ، جەتى ءجۇز مىڭ تەڭگەدەن) - سەرىكزات دۇيسەنعازى (استانا)، - سارا توقتامىسوۆا (استانا) ءۇشىنشى ورىن (ەكەۋ، ءتورت ءجۇز مىڭ تەڭگەدەن) - ديدار قامييەۆ (قاراعاندى) - مەيىربەك سۇلتانحان (قىزىلوردا) ارنايى جۇلدە (ەكەۋ، ءتورت ءجۇز مىڭ تەڭگەدەن) - ەلميربەك يمانالييەۆ (قىرعىزستان)، - اسىلبەك ماراتوۆ (قىرعىزستان). 

ايتىستىڭ ءبىرىنشى ورىن جۇلدەسى ۇلاربەك ميناتحاننىڭ قانجىعاسىنا بايلاندى. ءبىرىنشى ورىنعا دا بەرىلگەن اۆتوكولىكتى يەلەنگەن ۇلاربەك ميناتحان ۇلى ءجۇرسىن ەرماننىڭ ارناۋلى شاقىرۋىمەن قىتايدان كەلگەن قانداسىمىز. ول التايدىڭ اق يىق اقىنى ەركىن ءىلياس ۇلىنىڭ ءتول شاكىرتى. ەركىن مەكتەبىنىڭ سارىنىن ايتىس سۇيەر اعايىننىڭ الدىنا الا كەلگەن ۇلاربەك العاشقى اينالىمدا  بولاتبەك ورازبايۇلىمەن ايتىستى. ەكەۋىنىڭ ايتىسى ەركىن مەن ورازدىڭ ايتىسىنداي اسەر قالدىردى. ول بولاتبەك ورازباي ۇلى مەن سەرىكزات دۇيسەنعازيندى «ءبىرىڭعاي ونمەن» جەڭىپ، فينالعا شىقتى. ايتىسىندا:

«سىمىرگەن ءور التايدىڭ تازا اۋاسىن، 

جىگىتپىن ءىسىم ادال تازا باسىم. 

اعايىن بىلەسىڭ بە التايىمدا، 

ەركىندەي وتكەن ەدى عاجاپ اقىن. 

بۇل جاققا كەلەم دەگەن ارمانىنا، 

جەتە الماي كەتىپ ەدى ازاماتىم. 

ءۇش جىل بۇرىن ومىردەن اتتانىپ ەد(ءى)، 

قاپيادا مەرت بولىپ قازاناتىم. 

اۋەنىمدى وسى ەلگە جەتكىز دەگەن، 

كورسەت دەپ دارقاندىقتىڭ عالاماتىن. 

سالايىن الدارىڭدا اۋەنىنە، 

ورىنداپ ۇستازىمنىڭ اماناتىن»، - دەپ جىر نوسەرىن سەلدەتىپ، حالىقتى تەبىرەنتكەن ۇلاربەك ميناتحان ۇلى وتكەن جىلدىڭ ءدال وسى كۇنىندە قىتايداعى قانداستارىمىز اراسىندا وتكەن ۇلكەن تەليەۆيزيالىق جوبا «جەزتاڭداي» اقىندار ايتىسىندا 48 اقىننىڭ اراسىنان سۋىرىلىپ شىعىپ، باس جۇلدەسىن قانجىعاعا بايلاعان ەدى. ول قىتايداعى اقىندار ايتىسىندا بەرىلگەن جۇلدەدەگى العاشقى اۆتوكولىكتى مىنگەن بولاتىن.

ارعى بەتتەگى اعايىننىڭ سالەمىن اتاجۇرتقا جىرمەن جەتكىزىپ، تاۋەلسىزدىكتى جىرعا قوسقان ۇلاربەك ميناتحان ۇلىنىڭ جەڭىسىن قۇتتىقتايمىز.

ەرلان تولەۋباي