گۇلنۇر ورازىمبەتوۆا ءوزىن “وتباسىن بۇزعان ايەل دەپ سىناعاندارعا جاۋاپ بەردى. ول قازىرگى جولداسىن وزىنە قاراتۋ ءۇشىن ەشنارسە جاساماعانىن ايتادى. ءتىپتى، ودان ءبىرىنشى وتباسىنان نە سەبەپتى كەتكەنىن دە سۇراماعان ەكەن دەپ حابارلايدى Stan.kz.

بۇل تۋرالى 31 ارنانىڭ “ۇيات ەمەس” باعدارلاماسىندا ايتىلدى.

– قازىرگى كۇيەۋىڭمەن 19 جاسىڭدا تانىسقان ەكەنسىڭ. قىزىقتى رومانتيكالىق كەزدەسۋلەرىڭ تۋرالى ايتىپ بەرشى.

– نەگىزى مەن قازاققا بەلگىلى ازاماتپەن باس قوستىم. جاس كەزىمدە ەل الدىندا دومبىرامەن ءان ايتاتىنمىن. سول كەزدە ونەرىمە عاشىق بولعان ەكەن. ءقازىر “ءبىر كورگەننەن عاشىق بولعان ەكەنسىڭ” دەپ ايتىپ كۇلەمىز. ول كەزدە كيىمىم دە، ءتۇرىم دە دۇرىس ەمەس ەدى. سول بالالىق مىنەزىم مەن ونەرىمە عاشىق بولعان ەكەن. وسىنىڭ دالەلى رەتىندە ءالى كۇنگە دەيىن ساحنادان الىستاتپاي ءجۇر. مۇنى ءبىر اللانىڭ ماعان تارتۋ ەتكەن باقىتى دەپ بىلەمىن.

– سەنەن 20 جاس ۇلكەن. باستاپقىدا قامقورشى اعاڭداي بولعان شىعار.

– اكەم قاتال كىسى بولعاندىقتان، ول كىسىگە ەركەلەپ وسكەن ەمەسپىن. سونداي ءبىر ەركەلەتەتىن ادام جەتىسپەگەندەي بولىپ تۇراتىن. كۇيەۋىم قىزمەت بابىندا قاتال بولعانىمەن، وتە باۋىرمال كىسى. مىنەزى جۇمساق. مەنى ءالى كۇنگە دەيىن ەركەلەتەدى. ەكى ۇلىمىزدان كەيىن قىزدى بولساق دەپ ارمانداپ ءجۇرمىز. كەيدە ىشىمدە بۇل كىسىنىڭ بار نازارى قىزىمىزعا اۋىپ كەتە مە دەگەن قىزعانىش پايدا بولادى. سەبەبى، كۇيەۋىم “قىز تۋىپ بەرسەڭ، جورگەگىن ءوزىم اۋىستىرىپ، ءوزىم قارايمىن. سەن جۇمىسىڭا بارا بەر” دەپ ايتادى.

– جولداسىڭنىڭ ءبىرىنشى ايەلى بولعانىن ءبىلدىڭ بە؟ “گۇلنۇر وتباسىن بۇزدى، وڭباعان” دەپ نەشەتۇرلى اڭگىمە ايتاتىندارعا قانداي جاۋابىڭ بار؟

– ارينە، ءبىلدىم. وتباسى دا، بالالارى دا بولدى. وتباسىن بۇزدىڭ دەپ ايىپتايتىندارعا ءبىر عانا جاۋابىم بار. ادەمى بولىپ وتىرعان وتباسىنىڭ ويران بولعانىن ەشكىم دە تىلمەيدى. مۇنىڭ بارلىعى – ماڭدايعا جازىلعان دۇنيەلەر. ول كىسى وتباسىنان تەك مەن ءۇشىن كەتكەن جوق. ادەتتە كۇيەۋىمنەن ءبىرىنشى وتباسىنا قاتىستى ەشنارسە سۇرامايمىن. وزدەرى وسىنداي شەشىمگە كەلدى.

– ەكەۋىڭ ءبىراز ۋاقىت بىرگە ارالاستىڭدار. سول كەزدە ونى ءبىرىنشى ايەلىنەن قىزعاندىڭ با؟

– قىزعانعان جوقپىن. بۇل مەن ءۇشىن قالىپتى دۇنيەدەي كورىندى. ەڭ باستىسى، مەن ول كىسىنى قىزعانىپ، ارتىنان جۇگىرگەن ەمەسپىن. مەن كۇيەۋىمدى جاقسى كورەمىن. ول كىسى دە مەنى جاقسى كورەدى. ول ءوز ءومىرىن، مەن ءوز ءومىرىمدى سۇرەمىن. بىر-بىرىمىزگە كەدەرگى جاسامايمىز. ارتىق ەشنارسە سۇراعان دا ەمەسپىن. مىسالى، قالتامدا اقشا بولماي تۇرسا، كونسەرتتەن، تويدان قالمايمىن. جاس كەزىمدە ول كىسى كەلگەندە داستارحاندى جايناتىپ جىبەرىپ، شايىمدى بەرەتىنمىن. ول كىسىلەر جەيتىن قىزىل بالىققا دەيىن ساتىپ الامىن. ءقازىر “سول قاسيەتىڭمەن باۋراپ الدىڭ” دەپ ءوزى دە ايتىپ وتىرادى.

– سەندەردىڭ جۋىردا عانا نەكەلەسكەندەرىڭ راس پا؟

– 20 جىلدان بەرى ءبىز اللانىڭ الدىندا بىرگەمىز. ال رەسمي نەكەلەسكەنىمىزگە 8 جىل بولدى. ەكىنشى بالامىز وسى جەلتوقسان ايىندا 8 جاسقا كەلەدى. الدىندا ءبىز قازاقى داستۇرمەن نەكەمىزدى قيعانبىز. مەن نەكەمىز رەسمي قيىلسىن دەپ تالاپ قويعان ەمەسپىن.