«ارگۋمەنتى ي فاكتى» گازەتىندە «اقىل-ەسىمنەن ايىرىلماس ءۇشىن مەن ەشقاشان ۇيلەنبەيمىن. شەرلوك حولمستىڭ ءومىر ءسۇرۋ ەرەجەلەرى» دەگەن ماتەريال بۇگىن جارىققا شىقتى. «قامشى» پورتالى 1 جەلتوقساندا «دۇنيەگە كەلگەن» اتاقتى دەتەكتيۆ جايلى ماتەريالدى قازاقشاعا اۋدارىپ، وقىرمان نازارىنا ۇسىنادى.

1887 جىلدىڭ 1 جەلتوقسانىندا دەتەكتيۆ شەرلوك حولمس جايلى  «قىپ-قىزىل رەڭدەگى ەتيۋد» دەگەن اتاۋمەن العاشقى پوۆەست وقىرمانعا جول تارتقان بولاتىن.

ءبىرىنشى پۋبليكاسيا شىعىسىمەن-اق ارتۋر كونان دويلدىڭ شەرلوك حولمس اتتى كەيىپكەرى قىرسىق-قىڭىر، ءبىرتۇرلى مىنەزىمەن وقىرماننىڭ جۇرەگىن جاۋلاپ الدى. سودان بەرى قانشا ۋاقىت وتسە دە شەرلوك حولمس ساننەن كەتەر ەمەس. ول تۋرالى تەلەحيكايا دا، ەكشن-كينو دا ءتۇسىرىلىپ جاتىر. حالىق ەسكى تانىسىن، سۇيىكتى كەيىپكەرىن جاڭا قىرىنان تانۋدان جالىعار ەمەس. ال، شەرلوك حولمس بولسا ءوزى جايلى بىلاي دەپ ايتىپ كەتكەن ەكەن:

ەشكىم بىلمەگەن نارسەنى ءبىلۋ – مەنىڭ ماماندىعىم.

كەيدە مەنىڭ بۇكىل ءومىرىمنىڭ ءمانى سۇر، قىزىقسىز ومىرمەن كۇرەس سياقتى.

مەن ماتەماتيككە ۇقسايمىن. سەبەبى قيىن ەسەپتىڭ شەشىمىن تاپقاننان راقاتتانامىن. ءبىراق، شەشىمىم بىرەۋگە قالاي اسەر ەتەدى، ول تۋرالى باس قاتىرمايمىن.

جالعىزدىق مەنى كوپ نارسەدەن قورعايدى.

بەلگىلى ءبىر ىس-ارەكەتكە قاراپ ايەلدى ءتۇسىنۋ وتە قيىن. ءوزىن قاراپايىم ۇستاعان ايەلدىڭ جاسىراتىنى كوپ بولۋى مۇمكىن. جانە ابدىراپ، اسىپ-ساسىعان نازىكجاندىنىڭ بار باس اۋرۋى شاشىنداعى تۇيرەگىش بولۋى عاجاپ ەمەس.

ماحاببات دەگەن – ەموسيونالدى دۇنيە. سول سەبەپتى ول تازا، سابىرلى اقىل وي-ساناعا كەراعار. مەن بولسام وي-ساناسى ءبىرىنشى قويامىن. ۇيلەنگىم كەلمەيتىنى دە سوندىقتان.

بۇكىل جەردەن لوگيكانى ىزدەۋىمىز شارت. قاي جەرگە لوگيكا جەتىسپەسە، دەمەك ءبىر بىلىقتىڭ بارى راس.

ءبارىن اقشامەن كەسىپ-پىشەتىن بايلاردى جەك كورەمىن.

بۇل الەمدە جوعارى بيلىكتە وتىرعان جىندىلار ورنىن بوساتپايىنشا لوگيكاعا ورىن جوق.

اقىلدى مەن اقىماق داۋ بارىسىندا بىردەي.

قۇر بوس وتىرعاننان قاتتى شارشايمىن. ال، جۇمىس ىستەگەننەن ءلاززات الامىن.

اۆتور: ستەپان چاۋشيان

اۋدارعان: جازيرا بايدالى