ق ر مادەنيەت قايراتكەرى، جازۋشىلار وداعىنىڭ مۇشەسى، كومپوزيتور، ءانشى، اكتەر، قالامگەر ەرمۇرات زەيىپحان بيىل ءتىرى بولسا ەردىڭ جاسى 50-گە كەلەر ەدى. مارقۇمنىڭ ارتىنا قالدىرعان رۋحاني مۇراسىن كەڭىرەك ناسيحاتتاۋ ماقساتىندا 2016 جىلدىڭ 07 جەلتوقسانىندا كەشكى ساعات 18.00-دە الماتىداعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا «ەكى دۇنيەدە جالعىزىم – قازاقستان» اتتى ەسكە الۋ كەشى وتەدى. بۇل كەشتە ەرمۇرات زەيىپحان ۇلىنىڭ تاڭداۋلى اندەرىن بەلگىلى ونەر جۇلدىزدارى ورىندايى، سونداي-اق، اقىن ولەڭدەرىنەن ساحنالىق كومپوزيسيا قويىلادى.

وسى شاراعا وراي 2016 جىلدىڭ 5 جەلتوقسانىندا ساعات 12.00-دە قازاقستان جازۋشىلار وداعىندا ەرمۇرات زەيىپحاننىڭ 50 جىلدىق مەرەيتويىنا ارنالعان باعدارلامالاردى، قولعا الىنىپ جاتقان شارۋالاردى ەلگە جەتكىزۋ ماقساتىندا ارنايى پرەسس-كونفەرەنسيا وتەدى. وندا سان قىرلى تالانت يەسىنىڭ ءومىر جولى مەن شىعارماشىلىعى جونىندە جىلى ەستەلىكتەر مەن ناقتى شارالار تۋرالى حابارلانادى. ءارى «دۇنيە عاپىل» اتتى تولىق شىعارمالار جيناعىنىڭ تۇساۋكەسەرى وتەدى.

ەرمۇرات زەيىپحان(1966-2011) – 1966 جىلى قحر-دىڭ ىلە ايماعى كۇنەس اۋدانىندا دۇنيەگە كەلگەن. 1985-89 جىلدارى ىلە وبلىستىق كوركەمونەر كوللەدجىندە ۆوكال بويىنشا بىتىرگەن. 1991 جىلى اتامەكەنگە ورالىپ، ت. جۇرگەنوۆ اتىنداعى ونەر اكادەمياسىندا اكتەرلىك ماماندىعىندا وقيدى. سودان كەيىن اباي اتىنداعى وپەرا جانە بالەت تەاترىندا، م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا اكتەر رەتىندە قابىلدانىپ، سان ءتۇرلى وبرازداردى سومداعان. 2000 جىلدان ءومىرىنىڭ سوڭىنا دەيىن ق ر قورعانىس مينيسترلىگىنىڭ ورتالىق انسامبلىندە نەگىزگى ءانشى ءارى فولكلور ءبولىمىنىڭ كوركەمدىك جەتەكشىسى قىزمەتىن اتقاردى. سونىمەن قاتار، دۇنيەجۇزى قازاقتارى قاۋىمداستىعىنىڭ مادەني ورتالىعىن باسقاردى. الماتى قالالاقى قىزدار پەداگوگيكالىق ينستيتۋتىندا ساباق بەردى. «كوك تۋدىڭ جەلبىرەگەنى»، «كۇنەس-اي»، «دۇنيەعاپىل»، «ءتاڭىرىم-تاڭىرتاۋىم»، «سابيلەر-اي»، «ەكى دۇنيەدە جالعىزىم – قازاقستان»، «كەنەسارى»، «شىرىن-اي»، «جانار قىز» سەكىلدى 70-كە جۋىق ءاننىڭ اۆتورى. ونىڭ «وزىڭە ارنادىس»، «بۇ دۇنيە»، «ءۇشبۋىرىل» اتتى جىر جيناقتارى، «سىبىزعى سارىنى» اتتى پروزالىق كىتابى جارىق كورگەن. 1993 جىلى 14 ناۋرىز الماتى قالاسىندا وتكەن سازگەرلەر مەن انشىلەردىڭ رەسپۋبليكالىق «ۇكىلى ءۇمىت» بايقاۋىندا باس جۇلدەنى، 1994 جىلى الماتى قالاسىندا وتكەن كۇلاش بايسەيىتوۆا اتىنداعى 5-رەسپۋبليكالىق انشىلەر كونكۋرسىنىڭ لاۋرەاتى، 1999 جىلى 13 قاراشادا الماتىدا اسەت بەيسەۋوۆ اتىنداعى «ارمانداستار» اتتى رەسپۋبليكالىق بايقاۋدىڭ لاۋرەاتى جانە 1-جۇلدەسىن، 2001 جىلى قاراشادا «جۇلدىز» جۋرنالىنىڭ ارتىعالي ىبىرايەۆ اتىنداعى جىر ءمۇشايراسىنىڭ ارنايى جۇلدەسىن، 2004 جىلى رەسپۋبليكالىق «ەدىل-جايىق» اتتى اۆتورلىق كەشكە قاتىسىپ، جوعارى العىس قۇرمەتىن، 2005 جىلى 28 قىركۇيەكتە دۇنيەجۇزى قازاقتارىنىڭ 3-قۇرىلتايىنا ارنالعان حالىقارالىق جىر ءمۇشايراسىنىڭ جۇلدەگەرى قاتارلى سىيلىقتاردى ەنشىلەگەن. قورعانىس مينيسترلىگى ورتالىق انسامبلىندەگى قاجىرلى ەڭبەگى ءۇشىن مايور اتاعىن العان. ق ر مادەنيەت قايراتكەرى.