ءبىز بارلىعىمىز-پەندەمىز. قاتەلىك جاساۋعا قۇقىلى. الدا -جالدا، جاساپ قويعان قاتە ىستەرىمىزگە ايتار ءۋاجىمىز دايىن:"پەندەمىز عوي". قولىمىزدان بىرنارسە كەلمەسە دە، اقتاپ الامىز ءوزىمىزدى:"پالەنشە دە، ءجۇر عوي، مەن ودان گورى ...ءتاۋبا، ءتاۋبا". "تاۋباگەرشىلىك" دۇرىس،ارينە، ءبىراق، ول ءبىزدى ءبىر ورنىمىزدا تاپجىلماي ۇستاپ تۇراتىن ءبىر كۇش. مەنىڭ بايقاعانىم، ءبىز وزىمىزدەن جوعارعىعا ەلىكتەمەيمىز، ولارعا تەك قىزىعامىز دا، قىزعانامىز، بولدى. سودان كەپ، "قۇدايعا زار يلەيمىز". دۇرىس ەمەس جەردە تۋىپپىز-مىس، دۇرىس ەمەس وتباسىندا تۋىپپىز-مىس. ءوزىمىزدى جەتىستىككە جەتكىزبەي جەلكەلەگەن جالقاۋلىقپەن كۇرەسۋ ويىمىزدا جوق. قاراپ تۇرساق، باقىتىمىزعا دا، باقىتسىزدىعىمىزعا دا ءوزىمىز سەبەپشىمىز. اعىلشىن عالىمدارى دالەلدەۋى بويىنشا: اينالامىزداعى زاتتاردىڭ بارلىعى اتوم مەن يادرودان تۇرادى. ال، ول اتومنىڭ 99% ەنەرگيامەن قامتىلعان. ءبىز دە، تۋرا سولاي ميلليونداعان ەنەرگيامەن زاريادتالعان اتومداردان تۇرامىز. وعان كوڭىل اۋدارعانعا دەيىن ولار بەيتاراپ، تىنىش، كەرەكسىز، ىسكە اسۋىن كۇتۋ كۇيىندە قالادى. ال، ەگەر ولاردى ءبىر ىسكە جۇمسار بولساڭىز، ساتتىلىك، باقىت، بايلىقتى ءوزىڭىز جاسايسىز. ارينە، بۇل جايلى كوپ ايتىلىپ ءجۇر. ءبىز جاقسى ويلار ارقىلى بولاشاققا سيگنال جىبەرىپ، سول ءپوزيتيۆتى ويلار بولاشاقتا ىسكە اسادى...ت.س.س. سوندا تەك ويلاساق قانا بولدى باقىتتىڭ كىلتىن تاپتىم ەكەن دەگەن ءسوز ەمەس. ادام سول ويىنىڭ جەتەگىندە ارەكەت ەتۋى كەرەك. ەگەر سىزگە كۇنىنە 86400 ملن تەنگە تەگىننەن-تەگىن بەرەتىن بانك بولسا، نە ىستەر ەدىڭىز. قۋانىشتان باسىڭىز اينالىپ، ەڭ ءبىرىنشى وزىڭىزگە ەڭ قاجەتتى زاتتاردى الار ەدىڭىز، سۇيىكتى ىسىڭىزگە جۇمسايسىز سوسىن وتباسىڭىزدى، سوسىن جاقىن دوستارىڭىزدى قامتاماسىز ەتە باستايسىز. جانە ءسىز بارلىعىن قۋانىشپەن ماحابباتپەن ورىندايسىز. سىزگە ول اقشانى قايتارۋدىڭ قاجەتى جوق، ءومىر نە دەگەن قىزىق، تاماشا، بارلىعى ءسىزدى جاقسى كورەدى، ءسىز ولاردى. بىلەسىز بە، ونداي بانك بار. يا، يا، ءبىز كۇنىگە تەگىننەن-تەگىن 86400 سەكۋند الىپ جاتىرمىز. ونى كوبىنە جەلگە ۇشىرامىز. اقشا عۇرلى ءقادىرى جوق ۋاقىتتى تەككە وتكىزىپ، باقىتسىز كۇن كەشەمىز. وتباسىعا كوڭىل بولمەيمىز، جاقىندارعا بارمايمىز، ول ءۇشىن: جاعداي كەرەك، جاعداي بولۋ ءۇشىن جۇمىس كەرەك، ال، قاراپايىم جۇمىس بىزگە كەرەك ەمەس. ساتىلاي كوتەرىلۋ، ماڭداي تەرمەن تەرلەپ جەتۋ مۇمكىن ەمەس، تانىس كەرەك... تاعى دا سىلتاۋلار.

ءوزى ادال، وزگەنىڭ بارلىعى قياناتشىل. اناسىنان جەم تىلەگەن بالاپانداي، ۇكىمەتكە قول جايىپ وتىرا بەرەمىز. ءومىر ءسۇرىپ، تىرشىلىك ەتۋىمىز، وزىمىزگە ەمەس، وزگەگە مىندەتتى. مىنە، وسىنداي ۇرپاق ءوسىپ كەلە جاتىر. ارينە، جوق ەمەس، بار، تالانتتى جاستار، ءبىراق، ولاردى وسىلاردىڭ قاتارىنا ءوز قولىمەن قوساتىن قايران قوعام... ۋايىمى جەكە باسىنان اسپاعاندى ۇلتتىڭ ماسەلەسى قايدان قىزىقتىرسىن...

بالنۇر ومار