بىزدە بارلىق جاعدايدىڭ، قامقورلىقتىڭ، سىي-قۇرمەتتىڭ ەسترادا فانەرششيكتەرى مەن ايتىسكەرلەرگە عانا جاسالاتىنى نەسى ەكەن؟! ءاۋ باستان قازاقتىڭ كيەلى دومبىراسىنىڭ يەسى ءانشى مەن كۇيشى ەمەس پە ەدى؟ بۇگىنگە ايقىن بولعان ءبىر انىق جايت بار: ول قازاقتىڭ الەمدەگى ەڭ باي مۋزىكالىق مۇراعا يە حالىق ەكەندىگى. زامانا تەزىنەن ءوتىپ، بۇگىنگە جەتكەن ون مىڭداي كۇي مەن بەس مىڭداي ءانىمىز بار ەكەن! بابالاردان ميراس بولعان بۇل شىعارمالاردى دۇنيەگە اكەلگەن التىن ساۋساق انشىلەر مەن كۇيشىلەر ەدى عوي. بۇل كۇندە سول مۇرانى كوزدىڭ قاراشىعىنداي ساقتاپ، ەلگە ناسيحاتتاپ جۇرگەندەر تاعى دا سول انشىلەر مەن كۇيشىلەرىمىز ەمەس پە؟! ەندەشە، "التىن دومبىرا" كۇيشى مەن ءانشىنىڭ جولى عوي. نەگە "التىن دومبىرادان" ءانشى، كۇيشى ونەرپازدار سىرت ءقالادىى؟! ءبىرجاننىڭ قولىنداعى دومبىراسىن تارتىپ العان "جانبوتا پوشتابايشىلىق" قاشانعا دەيىن جالعاسادى؟! 
اقىرى باستاعان سوڭ، ايتايىن، قازاق قوعامىندا ءبىر قىزىق (بالكىم شىجىق) قۇبىلىس ورىن الىپ وتىر: ونەر دەسە، قازاقتىڭ كوز الدىنا اۋىز جىبىرلاتقىش فانەرششيك انشىلەر مەن ساقالى بار، مۇرتى جوق، شاپانىن سۇيرەتكەن ايتىسكەرلەر عانا كەلەتىن بولعان كۇنگە جەتتىك. بۇل كۇندە جۇرت دۇنيەدە بۇدان اسقان ونەر بار دەپ ويلامايتىن بولعان. ايتپەسە، ونەردىڭ تورەسى ءان مەن كۇي ەدى عوي، قاشاندا! بۇرىنعى قازاق ءۇشىن سولاي بولعان. "قۇلاقتان كىرىپ بويدى العان اسەم ءان مەن ءتاتتى كۇي" - ونەردىڭ اسىلى، جاۋھارى سانالعان. وسىلاي دەگەن اباي: "مال ءۇشىن جانىن جالداپ، قوبىز بەن دومبىرا الىپ، توپتا سارناعان" اقىنداردى جەك كورگەن. ال ءقازىر نە بولدىق: ءانشى مەن كۇيشىنى كۇرەسىنگە تاستادىق. ولاردىڭ اۋزىنداعى نەسىبەسىن فانەرششيكتەر مەن ۋاحابيت ايتىسكەرلەرگە جۇلىپ الىپ بەردىك. سالىستىرۋ ءۇشىن ايتايىن: امىرە قاشاۋبايەۆ اتىنداعى جانە جۇسىپبەك ەلەبەكوۆ اتىنداعى رەسپۋبليكالىق انشىلەر كونكۋرسىنىڭ باس بايگەسىن العان انشىگە بەرىلەتىن جۇلدە ەكى ءجۇز مىڭ تەڭگە. ال ايتىسكەرلەرگە بەرىلىپ جۇرگەن "التىن دومبىرانىڭ" قۇنى 120 مىڭ دوللار تۇرادى دەيدى، راس بولسا. استا توك وتەتىن استاردا تىگىلەتىن 50، 100 مىڭ دوللاردىڭ قىمبات كولىكتەرىن بىلاي قويىڭىز. ال سول استاردا قازاقتىڭ ءانى مەن كۇيىنە ورىن جوق. سەبەبى ۇكىلى دومبىرالى ءانشى مەن كۇيشى اس يەسىنە ءتيىمسىز. ويتكەنى ءانشى مەن كۇيشى ونىڭ ءبىر زاماندا كىم بولعانى بەلگىسىز (ءقازىر باتىر ياكي بي) اتا باباسىن ماداقتاپ، ماقتاپ، جىرلاپ، "نۇرلاپ" بەرمەيدى عوي. سوندىقتان قاي استا، ايت پەن تويدا بولسىن: "الاتاۋدان، ارقادان اقىندارىم كەلىپسىڭ"، ال "ءانشى مەن كۇيشىنى قويداي قۋ قامشىمەن" دەيتىن "تاپقا بولۋشىلىك" سالتانات قۇرىپ العان. ءتىپتى، دوس-جارانىڭ تويىنا بارساڭ، دومبىرا ورنىنا ديسك سۇرايتىن حالگە جەتتىك. 
مىنەكي، اعايىن، ونەر مەن ونەرپازدى وسىلاي الالايتىن بولدىق. سەبەبى ءانشى مەن كۇيشىدەن "پايدا" جوق. تىم بولماسا، "دۇرىستاپ" ۋاحابيست بولا المايدى))). ويتكەنى "قۇرعىر" ءان مەن كۇي تىم بيىك، تىم اسقاق. جەردەگى جەمگە كوزى قىزارىپ تۇسپەيدى. كىمنىڭ تارىسى پىسسە، سونىڭ تاۋىعى بولمايدى. ال ءقازىر بيلىككە "تاۋىق" كەرەك. ويتكەنى تاۋىقتان كەلەر ءقاۋىپ جوق. قيتۇرقى اعىمدارعا دا سولاي. "ءدىن تاراتۋ" ءۇشىن "تاۋىقتار" تاپتىرمايتىن "قۇس". "شىركىن، تاۋىق، شىر اينالار، جەمىڭ بولسا، قولىڭدا.