«قامشى» پورتالى بۇعان دەيىن بەلگىلى ءدىنتانۋشى قايرات جولدىبايدىڭ «نامازحانالاردىڭ جابىلۋى» جايلى كوتەرگەن دابىلىن جاريالاعان ەدى.

بۇگىن، ق ر ءدىن ىستەرى جانە ازاماتتىق قوعام ۆيسە-مينيسترى بەرىك ارىن ەل اۋماعىنداعى نامازحانالاردىڭ جابىلۋ سەبەبىن ءتۇسىندىردى. 

ۆيسە-مينيستردىڭ ايتۋىنشا، ءۇش جىل بۇرىن قابىلدانعان ەرەجەگە سايكەس، نامازxانالار مەملەكەتتىك ورگانداردان ءۇش ءجۇز مەتر شالعاي جەردە ورنالاسۋى ءتيىس. الايدا بولاشاقتا اتالعان ەرەجەگە وزگەرىستەر ەنگىزىلۋى ابدەن مۇمكىن.

«بۇل ەرەجە 2013 جىلى قابىلدانعان بولاتىن. ول كەزدە ءدىن ىستەرى اگەنتتىگى بولعان. سول ەرەجەگە سايكەس، قۇقىق قورعاۋ، اسكەري جانە تاعى باسقا مەملەكەتتىك ورگانداردىڭ 300 مەترلىك راديۋسىندا سونداي ءدىني ورىندار (نامازxانالار -اۆت.) ورنالاسپاۋى كەرەك. ەندى، ۋاقىت وزگەرىپ جاتىر عوي. مىسالى، كەيبىر جەرلەردە ول ورنالاسقاننان كەيىن وندا باسقا ءبىر مەكەمەلەر اشىلىپ جاتىر. مىسالى، وسىعان بايلانىستى استانا قالالىق ءدىن ىستەرى باسقارماسى تەكسەرىس جۇرگىزىپ، سول نورمالاردىڭ ورىندالۋىن قاداعالاپ وتىرادى» دەدى ب.ارىن.

ۆيسە-مينيستر سونداي-اق الەۋمەتتىك جەلىلەردە xالىقتىڭ نامازxانالاردىڭ جابىلۋىنا قاتىستى الاڭداۋشىلىعىنان حاباردار ەكەنىن جەتكىزدى. وسىعان بايلانىستى الداعى ۋاقىتتا ەرەجەگە وزگەرىستەر ەنگىزىلۋى ابدەن مۇمكىن. «ءبىز وسى ماسەلەگە قاتىستى بارلىق ۇسىنىستاردى قاراپ جاتىرمىز. بولاشاقتا ەرەجەلەرگە وزگەرىستەر ەنگىزىلگەن كەزدە سول ۇسىنىستاردىڭ بارلىعىن قارايمىز. ءدال ءقازىر تەك سول ەرەجەگە سايكەس كەلمەيتىن نامازxانالار عانا جابىلدى. دەگەنمەن، ءاربىر فاكتى بويىنشا تەكسەرىس جۇرگىزىلەدى»- دەپ اتاپ كورسەتتى ۆيسە-مينيستر.

ەسكە سالا كەتسەك، قايرات جولدىباي ۇلى ءوزىنىڭ الاڭداۋشىلىعىندا «ناماز وقيتىن ادام ايتەۋىر ءبىر جولىن تاۋىپ، اللا مىندەتتەگەن پارىزىن وقيدى. ءبىراق قاي جەردە؟ بەيبەرەكەتسىزدىككە ءوز قولىمىزبەن يتەرمەلەمەي، ءوز ەلىمىزدىڭ ءقادىرىن تۇسىرمەي نامازحانا اشۋعا نە كەدەرگى؟! اشۋعا ەمەس، بار نامازحانانى جابۋعا نە سەبەپ؟ ەكسترەميزمنەن ساقتانۋ ما؟ نامازحانانىڭ بۇرىشىنا "بۇل جەردە ۋاعىز ايتۋعا بولمايدى" دەسەك، جەتكىلىكتى ەمەس پە؟ كىممەن سويلەسسەم، بارلىعى بيلىكتىڭ بۇل شەشىمىنە نارازى. مۇسىلمانداردى بيلىككە نارازى كوڭىلگە يتەرمەلەيتىن مۇنداي ىستەرگە كىم جاۋاپتى؟ جوق الدە "كاپىر بيلىك" دەيتىن تاكفيريلەرگە ءوز قولىمىزبەن دالەل دايىنداپ بەرىپ جاتىرمىز با؟ ولاي بولسا، تاكفيريلەرمەن كۇرەسىپ، بوسقا شابىلىپ قايتەمىز؟!»، - دەگەن ەدى.