«ۇلىمدى جالعىز وسىرۋدەن باسقا امالىم جوق. ءيا، مەن ونىڭ اكەسىنىڭ ورنىن باسا المايمىن. ءبىراق بالا كەزىمدە مەن سەزگەن نارسەلەردى ۇلىم سەزبەۋ ءۇشىن بارىمدى سالامىن. ۇلىمنىڭ ءبىر ادامعا كەرەكسىز ەكەنىن ءبىلىپ وسكەنىن، سەزگەنىن قالامايمىن. اكەسى ۇلىمىزدىڭ دۇنيەگە كەلۋىن قالادى. ءبىراق كەيدە ومىردە بارلىعى ءبىز ويلاعانداي بولمايدى. ءيمانالىنىڭ اكەسىز وسۋىنە الىپ كەلگەن جاعدايلار بولدى. مەن ونىڭ ايەلى بولدىم. ايەلى بولعان كەزىمدە بالا تۋىپ بەردىم. مۇسىلمانشا نەكەمىز قيىلعان. اللاعا شۇكىر، ۇلىم زاڭدى دۇنيەگە كەلگەن»، – دەدى ءابۋوۆا.

الايدا پروديۋسەر ۇلىنىڭ اكەسىنە زاڭ جۇزىندە تۇرمىسقا شىقپاعان. سەبەبى ول وتباسىلى ازامات بولعان. ايتۋىنشا، تانىمال ءانشىنىڭ ايەلى ونىڭ كۇيەۋىمەن قارىم-قاتىناسىنان حابارسىز.

«اللانىڭ قالاۋىمەن بىلمەي-اق قويسا دەيمىن. مەن ول ايەلدىڭ دە، بالامنىڭ اكەسىنىڭ دە ءومىرىن قۇرتقىم كەلمەيدى. ال ەكەۋمىز قارىم-قاتىناسىمىز جايلى ەل بىلە باستاعان سوڭ ايىرىلىسىپ كەتتىك. ونىڭ ءبىرىنشى وتباسى بۇزىلسا، ءوزىمدى ەشقاشان كەشىرمەس ەدىم. قىزدارعا ايتارىم، ەشكىمنىڭ ەكىنشى ايەلى بولۋعا كەلىسپەسىن. ال مەنىڭ كەلىسكەن سەبەبىم – ونىڭ سەندىرە، جەتكىزە ايتقان جالعان اڭگىمەلەرى. «ءبىرىنشى ايەلىمدى سۇيمەيمىن. ەندى تەك سەنى سۇيەمىن» دەپ ايتاتىن. ال مەن جاس قىزدار سياقتى سوعان سەنىپ قالدىم. ونىڭ جالعان ەكەنىن ۇلىم دۇنيەگە كەلگەن سوڭ سەزدىم. ونىڭ كوزقاراسى، ماعان سويلەۋى، مىنەزى، قىلىقتارى – ءبارى-بارى وزگەرىپ كەتتى. ول كەزدە ونىڭ مەنى دە، ۇلىمدى دا قالامايتىنىن ءتۇسىندىم. «كەتە بەر، جولىڭ بولسىن» دەدىم. ول «سەنىڭ دە جولىڭ بولسىن» دەپ جاۋاپ قايتاردى»، – دەپ اعىنان جارىلدى تانىمال پروديۋسەر.

جاننا ءابۋوۆا ۇلىنىڭ اكەسىمەن 2013 جىلى ايىرىلىسقانىن، سودان بەرى ونىڭ ءوز پەرزەنتىن ىزدەمەگەنىن، قارجىلىق جاعىنان دا كومەكتەسپەگەنىن ايتتى.

الايدا ءابۋوۆا ونىڭ ەسىمىن اتاۋدى بولاشاقتىڭ ەنشىسىنە قالدىردى.

«ءيا، ول وتە تانىمال ادام. پرەزيدەنت ەمەس، ءبىراق تانىمال. ول دا شوۋ-بيزنەس الەمىنەن. ءبىر ورتادا جۇرگەندىكتەن كەزدەسىپ قالاتىن كەزدەرىمىز دە بولادى. ءبىراق تانىس ەمەس ادامدارداي ءوتىپ كەتەمىز. قازاق حالقى قاتتى جاقسى كورەتىن ءانشى. بالامنىڭ اكەسىنىڭ كىم ەكەنىن ايتامىن، تەك ءقازىر ەمەس. الدىمەن ۇلىم ءوسىپ، بۇل وعان كەرەك پە، سونى شەشىپ السىن. شامامەن جاسى 15-16-عا جەتسىن. ءوز بەتىمەن شەشىم قابىلدايتىنداي جاسقا جەتكەن سوڭ اقىلداسىپ شەشەمىز»،- دەپ مالىمدەدى جاننا ءابۋوۆا.

دەرەككوز: stan.kz