«قامشى» پورتالى «التىن دومبىرا» ايتىسى تۋرالى جان-جاقتى اقپارات جاريالاپ كەلدى. بۇعان دەيىن دە حابارلاعانىمىزداي،  جەلتوقساننىڭ 3-4ء-ى كۇندەرى الماتىداعى رەسپۋبليكا سارايىندا ەل تاۋەلسىزدىگىنىڭ 25 جىلدىعىنا ارنالعان «جاسامپازدىقتىڭ 25 جىلى» اتتى ايتىس ءوتتى. ايتىستىڭ باس جۇلدەسى «التىن دومبىرانى» مۇحتار نيازوۆ ەكىنشى رەت الدى. ول ءتىپتى كەلەشەكتە «التىن دومبىرانى» تاعى دا يەلەنگىسى كەلەتىنىن ايتقان.

ايتىستىڭ جۇلدە بەرەر ساتىندە حالىق باس جۇلدەنىڭ بەرىلۋىنە نارازى بولىپ، «بولاتبەك» دەپ ايعايلاپ تۇرىپ العان ەدى. حالىقتى الماتى اكىمى باۋىرجان بايبەكتىڭ ءوزى «سابىرعا شاقىرعان» بولاتىن. سوعان قاراماستان قوعامدا ايتىستىڭ ادىلدىگى تۋرالى الۋان پىكىر تۋىنداپ جاتىر. ايبوز اقىن ايبەك قالييەۆ بولسا، «ەلدى بىرلىككە شاقىراتىن «التىن دومبىرا» ايتىسى وسىلايشا ەل اراسىنا ىرىتكى سالاتىن بولسا، ەندى وتكىزبەي-اق قويۋ كەرەك شىعار»، - دەگەن ەدى.

ارتى داۋعا ۇلاسقان «التىن دومبىرا» ايتىسىنىڭ سوڭعى نۇكتەسىن ايتىستىڭ جاناشىرى، جۇرگىزۋشىسى ءجۇرسىن ەرماننىڭ ءوزى «شالقار» راديوسىنا بەرگەن سۇحباتىندا قويدى:

 «التىن دومبىراعا» وڭىرلىك ايتىستاردا باس جۇلدە، 1-ورىن، 2-ورىن العان قازاقستانداعى ءقازىر ەڭ ۇزدىك 20 اقىن جينالدى. ءوزىڭ ايتىپ وتىرعانداي ولاردىڭ كەز كەلگەنىنىڭ «التىن دومبىرانى» يىعىنا اسىنىپ كەتۋگە قاقىسى بار. «التىن دومبىرانىڭ» الدىندا مەن ءوزىم ەركەبۇلان قاينازار، مەيىربەك سۇلتانحان، بولاتبەك نەمەسە مۇحتار نيازوۆ – وسىلاردىڭ بىرەۋى الاتىن شىعار دەپ ويلادىم. ايتىستىڭ ءبىرىنشى كۇنىن كورگەننەن كەيىن، جوق، بۇل ويىم بەكەر ەكەن، رۇستەم قايىرتاي ۇلى مەن ءومىرجان كوپبوسىنوۆتىڭ بىرەۋى الاتىن بولار دەپ ساۋەگەيسىدىم. ايتىستىڭ سوڭىندا، مىنەكي، مۇحتار نيازوۆ ەكىنشى رەت «التىن دومبىرانى» جەڭىپ الدى. جەڭىپ العاندا بىرەۋدەن سۇراپ العان جوق،  ءوزىنىڭ ونەرىمەن تارتىپ الدى.

مۇحتار بيىل ءبىرىنشى رەت باس جۇلدە الىپ تۇرعان جوق، بىرنەشە رەت الىپ تۇر. ويتكەنى، مۇحتار بابىندا جۇرگەن، وسى ايتىس ونەرىنىڭ قازىرگى كوشاسشىلارىنىڭ ءبىرى. ءبىراق، الەۋمەتتىك جەلىلەردە، ءتىپتى زالدىڭ وزىندە وڭ جاق قاناتىندا بىرنەشە ادام سوعان شۋىلداپ، قارسىلىق ءبىلدىرىپ جاتتى. مەن ويلايمىن، تالعامعا تالاس جوق.

ءبىراق، كەشە كوزى تىرىلەر مەملەكەتتىك سىيلىقتى الىپ جاتقاندا، و دۇنيەلىك بولعان مۇقاعالي ماقاتايەۆ الا الماي قالدى. سول كەزدە وسى قازاق نەگە شۋىلدامادى. مىنا قازاق ءان ونەرىنىڭ ۇلكەن تۇلعاسىنىڭ ءبىرى بولعان، ەكى قازاقتىڭ ءبىرى ءانىن ايتىپ جۇرگەن كەڭەس دۇيسەكەيەۆ الماي قالعاندا وسى قازاق نەگە شۋىلدامادى. ال، ەندى، بۇل جەردە دە تالاسۋعا بولادى. قازىلار القاسىنىڭ قۇرامىندا التى بىردەي ايتىسكەر اقىندار وتىردى. وسى ايتىستىڭ بۇكىل قۇپياسىن، سىرىن بىلەتىن، اق جول باستاعان داۋلەتكەرەي، باۋىرجان قاليوللا، مۇحامەدجان، قويلىباي، قونىسباي سياقتى – وسىلار نەگە مۇحتارعا جىعىلدى دەپ ويلايسىز؟ مۇنىڭ وزىندىك سەبەبى بار. كونسەرتىمىزدە ايتتىق، ايتىستىڭ ەڭ باستى كريتەرييى: سوزگە جاۋاپ بەرۋ، شاپپا شىعىپ ايتىسۋ، اياق استىنان ءسوز تابۋ. بولاتبەك جامان اقىن دەپ ايتا المايمىن، ول دا ماڭداي الدى اقىندارىمىزدىڭ ءبىرى. دەگەنمەن، ەپتەپ تولعاپ كەتەتىنى كوبىرەك، حالىق پوەزياسىن جاقسى بىلەدى، كىتاپتار وقيدى، سول سارىنعا سالىپ تولعاپ كەتەتىنى بار، قاتتى جاۋاپتاسىپ ايتىسۋعا بارا قويمايدى. ءبىراق، وتە كوركەم ولەڭدەردىڭ، جاۋھار جىرلاردىڭ اۆتورى. مىنە، وسىنى سالىستىرا وتىرىپ ايتىستىڭ سوزىمەن سويلەگەن مۇحتارعا باسىمدىق بەرگەن شىعار دەپ ويلايمىن. ءبىراق وسى «التىن دومبىرانىڭ» جۇلدەسىنە سونشا شۋلايتىنداي، مۇنىڭ بايگەسىن ماسكەۋلەرگە ۆاسيا الىپ بەرگەن جوق، ءوزىمىزدىڭ ايتىسەر اقىندار جىل سايىن بىرەۋىنە بەرىلەدى.

الداعى جىلداردا بولاتبەكتىڭ «التىن دومبىرانى» جۇلىپ الاتىنىنا كامىل سەنەمىن.  الەۋمەتتىك جەلىدە بۇگىن با، كەشە ما جازىپتى عوي ءوزى دە مەن ريزامىن وسى شەشىمگە دەپ. وعان دا 3 ميلليون تەڭگە كولەمىندە بايگە بەرىلدى. ءبىرىنشى ورىن دەگەن دە وڭاي شارۋا ەمەس جيىرما اقىننىڭ ىشىنەن. سوندىقتان، مەنىڭ پىكىرىم وسىنداي «التىن دومبىرانىڭ» قورتىندىسى جونىندە.

قامشىگەر: نازەركە لابيحان