الماتىدا 7-9 جەلتوقساندا ورتالىق ازياداعى ەڭ ءىرى ينۆەستيسيالىق ءىس-شارا – «Almaty Invest-2016» IV حالىقارالىق ينۆەستيسيالىق فورۋم  وتەدى. بۇل تۋرالى الماتى قالاسى اكىمدىگىنىڭ باسپا ءسوز قىزمەتى حابارلايدى.

«Almaty Invest-2016» فورۋمى – بۇل قازاقستاندىق جانە حالىقارالىق ينۆەستورلارعا ينۆەستيسيالىق مۇمكىندىكتەر ۇسىنۋ جانە ولاردى تالقىلاۋ بويىنشا وتەتىن ءىس-شارا. فورۋم قوعام، بيزنەس جانە مەملەكەت اراسىندا ءوزارا ءىس-قيمىل جاساۋعا ارنالعان اشىق الاڭ بولىپ تابىلادى. ءىس-شارا جىل سايىن الماتى قالاسىنىڭ اكىمدىگىمەن وتكىزىلەدى. ءىس-شارا بارىسىندا 300 ملرد. تەڭگەگە ينۆەستيسيالىق جوبالار بويىنشا مەموراندۋمدارعا قول قويۋ جوسپارلانىپ وتىر.

فورۋم باعدارلاماسى ءۇش كۇنگە ەسەپتەلگەن. 7 جەلتوقساندا الماتى قالاسى اكىمىنىڭ ءتوراعالىق ەتۋىمەن وڭىرلىك ينۆەستورلار كەڭەسىنىڭ ءماجىلىسى وتەدى. 8 جەلتوقساندا فورۋمنىڭ نەگىزگى باعدارلاماسى وتەدى، وندا الماتى قالاسىنىڭ ساۋدا جانە قىزمەت كورسەتۋ سالاسى، تاماق ونەركاسىبى، ىسكەرلىك تۋريزم، مەملەكەتتىك-جەكە سەرىكتەستىك جانە يندۋستريالدىق دامۋ سەكىلدى 5 باسىم باعىتى بويىنشا ينۆەستيسيالىق مۇمكىندىكتەرى تالقىلاناتىن بولادى. سپيكەرلەر رەتىندە Carrefour، Leroy Merlin، Sanlas Holding، Tokyo Rope، EuroShop، UBS Asset Management، دۇنيەجۇزىلىك بانك، ەفكو جانە باسقا دا ۇيىمداردى قوسا العاندا، قالاعا ينۆەستيسيا سالعان نەمەسە ينۆەستيسيالاۋدى جوسپارلاپ وتىرعان ءىرى حالىقارالىق ۇيىمداردىڭ باسشىلارى شاقىرىلدى.

9 جەلتوقسان ارەكەت ەتىپ جۇرگەن كاسىپورىندار، ونەركاسىپتىك ايماقتار مەن تۋريستىك نىساندار بويىنشا قىزىعۋشىلىق تانىتقان ينۆەستورلار ءۇشىن ينۆەستيسيالىق تۋرلار ۇلگىسىندە وتەدى. بۇدان باسقا، KASE قور بيرجاسى جۇمىسىنىڭ تەتىكتەرى بويىنشا سەمينار وتكىزۋ، سونداي-اق «Almaty StartUp City» فورۋمىن وتكىزۋ جوسپارلانعان، ونىڭ شەڭبەرىندە «Almaty StartUp City-2017» باعدارلاماسىنىڭ تانىستىرىلىمى كورسەتىلەدى، الماتىلىق ستارتاپەرلەر ءۇشىن شەبەر-كلاسستار مەن ۆوركشوپتار وتەدى.