ادامدىق!، – دەگەن قايدا كەتكەن،
سىناماي، سوكپەي ءسىز ءبىز دەسەتىن؟
نە كۇن تۋدى؟ باسىڭىزعا دەمەڭىز،
ءبىر ءبىرىمىزدى كۇندەپ، «ءىز كەسەتىن!
اۆتور
«الماس قىلىش قىنعا توقتايدى – ادال جاندار شىنعا توقتايدى»، -دەگەن قازاقتىڭ ماقالى بار. سونداي-اق، «الارىڭ قالسا دا – ايتارىڭ قالماسىن»، -دەگەن ءبىر ءتامسىل ءسوز باردى. مەن نەگە مۇنى ايتىپ وتىرمىن؟! كۇنى كەشە-اق حالقى ۇكىلەپ ءۇمىت ارتىپ سايلاعان پارلامەنتتەگى «كەيبىر» دەپۋتاتتارىمىزدىڭ،اسىرەسە سوڭعى كەزدەگى «ورىنسىز جاعىمپازداناتىن!»، «جاعىمسىز قىلىقتارى» ءدۇيىم جۇرتتىڭجۇيكەسىن جۇقارتىپ، نارازىلىعىن تۋدىرعانى بەلگىلى. بۇل جاعداي «جاتقان جىلاننىڭ قۇيرىعىن باستى»-نىڭ كەرى بولدى دەۋگە بولادى. ولاي دەيتىنىم، بۇقارا حالىق بۇگىنگى بيلىكتەگى كەيبىرەۋلەر ويلاعانداي ساۋاتسىز، ماڭگۇرت توبىر ەمەس قوي! كىمنىڭ دە بولسىن جامان مەن جاقسىنى، اق پەن قارانى ايىرارلىقتاي ساۋاتى بار!
پارلامەنتتىڭ كيەلى مىمبەرىنەن «جاعىمسىپ – جاعىنۋدىڭ»، «پاتشاعا تابىنۋدىڭ» «ەكىجۇزىلىكتىڭ» ۇلگىسىن كورسەتۋشىلەردىڭ الدىڭعى لەگىنەن كورىنگەنحۋانىش سۇلتانوۆ اعامىزبەن،بىرنەشە جۇزدەگەن مىڭ وقىرمانى بار فەيسبۋك الەۋمەتتىك جەلىسىن جاپتىرۋدى تالاپ ەتكەن بەكبولات تىلەۋحان قاناي ۇلى باۋىرلارىمىز،وسى جاعىمسىز قىلىقتارىمەن حالىق الدىندا وزدەرىنىڭ «تىرنەكتەپ جيعان» ابىروي بەدەلدەرىن ايرانداي توكتى دەۋگە بولادى.حالىقتىڭ بۇلارعا دەگەن نارازىلىعى جايلى جازىلعان سىن پىكىرلەردى، تەك وسى الەۋمەتتىك جەلىنىڭ وزىنەن-اق مىڭداپ وقۋعا بولار ەدى. بۇل جايلى دەپۋتاتتارىمىز وزدەرى دە كورىپ ءبىلىپ وتىرعان بولار. ءسوزىمىز دالەلدى بولۋى ءۇشىن، بۇل جەردە سولاردىڭ ىشىنەن قىسقاشا ەكى-بىر عانا مىسال كەلتىرىپ كورەلىك…
بەلگىلى قوعام قايراتكەرى، پروفەسسور امانگەلدى ايتالى ۇلى:
مەن قۋانىش سۇلتانوۆتى سىيلايمىن دا، ايايمىن دا. ول دىنمۇحامەد قونايەۆتى تاقتا وتىرعاندا ماقتاپ، تاقتان تۇسكەندە كولبينگە ۇنايمىن دەپ سىناعانداردىڭ ءبىرى! قازاقستان كومپارتياسى ورتالىق كوميتەتىنىڭ قازاقستان كومپارتياسى ورتالىق كوميتەتىنىڭ Vءىىى (1987ج.) پلەنۋمىندا ءىس پەن ءسوزدىڭ الشاقتىعىن، ساياسي سەنىمنىڭ تومەندىگى، ساياسي تاكاپارلىق، مەنمەندىك، قۇر ماداق بيلىكتىڭ بەدەلىن تۇسىرەتىندىگىن ايتا كەلىپ، قۋانىش سۇلتانوۆ بىلاي دەگەن ەدى: «وسى تۇستا مەنىڭ ويىما مىناداي سۇراق ورالادى: ءبىرىنشى باسشىلىقتىڭ اتاعىن اسپانعا كوتەرگەن كىم؟ كوپتەگەن بەلگىلى باسشىلار، وزدەرى ورتالىق كوميتەتتىڭ مۇشەلەرى،جىلدان جىلعا ۇدەتە ءتۇستى، اۋەلى «قۇرمەتتىدەن» باستاپ، سونان سوڭ نە سەبەپتى «اسا قۇرمەتتىگە»، ودان كەيىن «كورنەكتى قايراتكەرگە» اينالدىردى؟ حالىقتىڭ اراسىندا قانداي پىكىر تۋعىزدى، جاستارعا قانداي ۇلگى كورسەتتى؟». («سوسياليستىك قازاقستان»، 17مارت، 1987جىل.) ال پرەزيدەنتتى جارىسا ماقتاعان دەپۋتاتتار بۇگىن جاستارعا قانداي ۇلگى كورسەتىپ وتىر؟ «قۇلداردىڭ ماقتاعانى ەشتەڭەنى دە بىلدىرمەيدى» دەگەن وسى ەمەس پە؟ قازاقستاندىقتار نۇرسۇلتان ءابىش ۇلىنىڭ ەڭبەگىنە شىن باعاسىن بەرەدى، ءبىراق جارامساقتاردىڭ ماقتاۋىن حالىق قابىلدامايدى. پرەزيدەنت تە قابىلداماس دەيمىن. ماقتاۋ پسيحولوگيالىق شەگىنەن شىققاندا ماداقتاعان تۇلعاعا دا جاعىمسىز پىكىر تۋدىرادى، ماقتاتىپ وتىر دەگەندەي وي قالدىرادى، اينالىپ كەلگەندە بەدەلىنە دە كولەڭكە تۇسىرەدى. وسىدان تابىنۋسىز مادەنيەت بولمايدى، ال مادەنيەتسىز تابىنۋ ءقاۋىپ دەگەن ءسوز شىققان.قازىرگى جاستار اقپاراتتىق زاماننىڭ جاستارى ، ءوزىمىزدى وزگەمەن سالىستىرىپ باعالايدى، ارزان سوزدەرگە الدانبايدى. تاريحي تۇلعانىڭ بەدەلىن باعالاۋ مەن وعان تابىنۋدىڭ اراسىن ايىرا ءبىلۋ ساياسي مادەنيەتى بىزگە جەتپەي جاتىر»، – دەگەن پروفەسسور اعامىز، بۇگىنگى پالمامەنتتەگى ءبىر عانا كەيىپكەرىمىزدىڭ بار بولمىسىن باعالاي وتىرىپ، ءبىزدىڭ جوعارىداعى تۇلعالاردىڭ ساياسي مادەنيەتىنىڭ جەتىسپەۋشىلىگىن «سوقىرعا تاياق ۇستاتقانداي» ەتىپ، ءوزىنىڭ وي پىكىرىندە اشىق جازىپتى. ەلدىڭ، حالىقتىڭ تاعدىرىن شەشەدى دەپ سەنىم جۇكتەگەن دەپۋتاتتارىمىزدىڭ سيقى وسى بولسا، بۇعان نە دەۋگە بولادى، اعايىن؟!الەمدەگى تالاي ەلدىڭ پارلامەنت، سەنات دەپۋتاتتارىنىڭ وتىرىسىن قاراپ وتىرساق، بىزدەگىدەي جاپپاي جالاڭ ءسوز قۋىپ، جالتاقتاپ – جاعىمسىپ جاتقانداردى كورمەيمىز. كەرىسىنشە، ەلىنىڭ، حالقىنىڭ تاعدىرى ءۇشىن، قوعامى مەن جەكە باستارىنىڭ ار تازالىعى ءۇشىن، قىزىل كەڭىردەك بولىسىپ، جاعا جىرتىسۋعا دەيىن بارىپ جاتاتىنىن تالاي كوردىك! الايدا، ءبىزدىڭ دەپۋتاتتارىمىزدان ونداي قىزۋ ىسكەرلىكتى ازىرگە كوردىك دەپ ايتا المايمىز. بارلىعىنىڭ دەرلىك ايتاتىندارى، تەك جەڭىس پەن جەتىستىگىمىز عانا. نەمەسە، بىرەۋلەرىمىزدىڭ عۇمىرىمىز جەتپەيتىن بولاشاقتىڭ قيالي ەرتەگىسى! ءسوز بەن ءىستىڭ ايىرماشىلىعى جەر مەن كوكتەي! بىزدە دەپۋتاتتارىمىز قىزۋ تالقىعا سالىپ، تۇبەگەيلى ءبىرجاقتى شەشىمگە كەلتىرەتىن، كەزەك كۇتتىرمەس ماسەلەلەر شاش ەتەكتەن دەسەك تە بولادى. ءبىراق، دەپۋتاتتارىمىز وندايعا بەلسەنە بارىپ جاتقان جوق. وتىرىستاردا، وزدەرىنىڭ كەيبىرەۋلەرىنىڭ الاڭسىز مۇلگىپ ۇيىقتاپ الاتىندارىنداي، جالاڭ سوزدەرى مەن حالىقتى سەندىرىپ الداۋسىراتىپ قويىپ، قوعامدى دا وزدەرىندەي تىپا-تىنىش مۇلگىتىپ قويدى! «سەن تيمەسەڭ مەن تيمەن»، – دەگەندەي، وزدەرىنىڭ جايلى ورىندارىندا وتىرىپ الىپ،«مۇلگىگەن ءولى قوعامدا» ءومىر ءسۇرۋ، اسارىن-اساپ جاسارىن جاساعان كەيبىر دەپۋتاتتارىمىزعا ىڭعايلى بولعانىمەن، بۇل ەڭ بەرگىسى ەلىمىزدىڭ جاڭاشا سەرپىنمەن بۇدان دا قارقىندى دامۋىنا،كۇن ساناپ لاستانىپ بارا جاتقان قوعامىمىزدىڭ تازارۋىنا، حالىق تىرلىگىنىڭ بۇدان دا جاقسارىپ تۇلەۋىنە كەرى اسەرىن تيگىزىپ وتىرعاندىعى ايتپاسا دا بەلگىلى جاعداي! سول ءۇشىن دە «ەنەم ساعان ايتامىن، قىزىم سەن تىڭدا!»، -دەگەندەي، قۋانىش سۇلتانوۆ اعامىزعا باعىتتاي وتىرىپ،ءوز وي پىكىرىمدى بۇل جەردە اشىق ايتايىن!
قۇرمەتتى قۋانىش سۇلتانوۆ اعا!
ءسىز سوناۋ سوۆەت زامانىندا قازاق سسر جوعارعى سوۆەتىنىڭ دەپۋتاتى بولىپ، كەيىننەن ءبىراز جىلدار ديپلوماتيالىق قىزمەت اتقارىپ، 2001 جىلدان بەرى قايتادان بىردە سەنات، بىردە ءماجىلىس دەپۋتاتى بولىپ كەلە جاتقان قازىرگى دەپۋتاتتارىمىزدىڭ ىشىندەگى ەڭ تاجىريبەلى ادامداردىڭ ءبىرىسىز. حالىق سىزدەردىڭ سىڭىرگەن ۇشان-تەڭىز ەڭبەكتەرىڭىزدى جوققا شىعارمايدى، ارينە. ەڭبەكتەرىڭىزگە لايىقتى سىي-سياپاتتارىڭىزدى دا العان ادامسىزدار. كەزىندە ءوزىڭىز «جالت بەرىپ جاعىنىپ، ءتاۋ ەتىپ تابىنعان» مەملەكەت جانە قوعام قايراتكەرى، دىنمۇحامەد احمەت ۇلى قونايەۆتىڭ؛ «بيلىككە كوتەرىلدىم، ءبىراق حالىقتان الاسا ەكەنىمدى ۇمىتپادىم، قايتىپ اشار ەسىگىمدى قاتتى جاپپادىم. ءتۇپتىڭ تۇبىندە ورالار ورتام – ەل ءىشى، اعايىن ورتاسى. باسار جەرىم دە، بارار جەرىم دە – قارا جەر. قاستەرلەي بىلسەم ءقادىرىمنىڭ كەتپەسىن ءبىلدىم. پاناڭ دا ەل، داناڭ دا ەل. سوعان ارقا سۇيەدىم، سودان ۇيرەندىم.» -دەگەنىن، ءسىز بىزدەن دە جاقسى بىلەسىز! ءسىز سول كەمەڭگەر اعامىزدان ۇلگى المادىڭىز با؟! حالىق سىزدەردى سىيلايدى، قۇرمەتتەيدى. سىزدەر ەلىمىزدىڭ تاۋەلسىزدىگىنىڭ نىعايۋىنا، وركەندەپ دامۋىنا، گۇلدەنىپ كوركەيۋىنە زور ۇلەس قوسقان ادامسىزدار. سول ءۇشىن دە حالىق بۇگىنگە دەيىن سىزدەردىڭ سول ەڭبەكتەرىڭىزدى ەلەپ،سىزدەرگە قۇرمەتپەن قاراپ كەلدى. الايدا سىزدەر سوڭعى كەزدەرى،سول حالىقتىڭ قۇرمەتىنە لايىق بولا الماعاندارىڭىز وكىنىشتى-اق!
ءار نارسەنىڭ شەتى، شەگى دەگەن بولماي ما؟! ەلباسىن قولداۋلارىڭىزعا ەشكىم دە قارسى ەمەس. ءارى، ەلباسىمىز قولداۋشىلار مەن سىزدەر سياقتى «جاعىمسىپ جاقتاۋشىلار مەن جالاڭ ماقتاۋشىلارعا» دا كەندە ەمەس! ەلباسىمىز: «- مەنى قولپاشتاپ ماقتاعاندارىڭىزدى توقتاتىڭىزدار، مەن ونداي سوزگە الداناتىن جاستا ەمەسپىن!!!»، -دەگەندى تاۋەلسىزدىك مەرەكەسىنىڭ جيىنىندا دا قايتالاپ ايتقانى ەستەرىڭىزدە شىعار! شىن مانىندە بۇگىندەرى ءىسى دە، جاسى دا «قارتتار ۇيىنە» لايىق بولىپ بارا جاتقان «پارلامەنت ءۇيى» -اتتىكيەلى ورىندى،ەندى بۇدان ءارى قورلاماڭىزدار! ول ورىن سىزدەردىڭ وسى قىلىقتارىڭىز سياقتى ويلارىڭىزعا كەلگەندى قاۋساپ، ەرىككەننىڭ ەرمەگى بولدىراتىن ورىن ەمەس! ول – ەل تاعدىرىن شەشەتىن كيەلى وردا، قاسيەتتىورىن! سول ءۇشىن دە وعان لايىقتى ءبىلىمدى جاستارعا ءوز قادىرلەرىڭىزبەن ورىندارىڭىزدى بوساتىپ بەرىپ، «بەينەتتەرىڭىزدىڭ زەينەتىن كورىپ» نەمەرە-شوبەرەلەرىڭىزدىڭ جانىندا الاڭسىز عۇمىر كەشكەندەرىڭىز ابزال بولار ەدى! بۇل ءسوزىم سول پارلامەنتتەگى «اسارىن اساپ – جاسارىن جاساعان»، ءوزىڭىز سياقتى ەل اعالارى،بۇگىندە جاسى 80 -گە كەلگەن ۆلاديسلاۆ كوساريەۆ، جاسى 75-تەن اسقان روزاقۇل حالمۇرادوۆتان باستاپ، جاستارى 70-تەن اسقان ءۋاليحان بيشىمبايەۆ، تولەش كەنجين، شالاتاي مىرزاحمەتوۆ، قانات ساۋدابايەۆ جانە الدان سمايىل سىندى اعالارىمىزدىڭ دا قۇلاقتارىنا التىن سىرعا دەمەكپىن!!!. سىزدەردىڭ سانالارىڭىزعا سىڭگەن كەڭەس ءداۋىرىنىڭ يدەالارى مەن «اتاق ابروي ءۇشىن جاعىمسىپ – جاعىنۋدىڭ» ۇلگى ونەگەلەرى، بۇدان بىلاي بۇگىنگى جاس مەملەكەتىمىزدىڭ بولاشاعى ءۇشىن، ءارى جاس مەملەكەتىمىزدىڭ بولاشاق يەگەرلەرى جاستارىمىز ءۇشىن دە قۇت اكەلمەسى حاق! جاڭا مەملەكەتكە جاڭاشا يدەامەن، جاڭاشا كوزقاراسپەن قاراپ، سەرگەك ويلاپ، سەرپىندى جۇمىس جاسايتىن جاستار قاجەت!!! وسىنى تۇسىنىڭىزدەر، قۇرمەتتى اعالار!!!
قادىرمەندى بەكبولات تىلەۋحان قاناي ۇلى باۋىرىم!
مەن ءسىز جايلى ماعلۇماتتاردان تولىق حاباردارمىن دەسەم دە بولادى. شىنىمدى ايتسام، حالىق اراسىندا اتاق ابىرويىڭىز دا، بەدەلىڭىز دە وزگەلەردەن اناعۇرلىم بيىك، ناعىز ۇلتجاندى دەپ تانىلعان ازاماتسىز. الاي دا، سول ءقادىر قاسيەتىڭىزدى، ءوزىڭىزدى قۇرمەتتەيتىن حالىق الدىندا اپ-ساتتە-اق شايىپ العانىڭىز، وكىنىشتى-اق! ءسىز (05/12/2016 ) -دا وتكەن «وتاندىق بۇقارالىق اقپارات قۇرالدارىنىڭ باسەكەلەستىگى جانە دامۋى ماسەلەلەرى تۋرالى» ماجىلىستەگى ۇكىمەت ساعاتىندا فەيسبۋك جەلىسىنىڭ قازاقستاندا ساياسي ارەناعا اينالىپ كەتكەنىنە قىنجىلىس ءبىلدىردىڭىز. ونى Baq.kz. –تەن وقىپ بىلگەن بۇقارانىڭ وزىڭىزگە دەگەن نارازىلىعى مەن قارسىلىعىن، وسى جەلىدەن ءوزىڭىز دە كورىپ ءبىلىپ وتىرسىز! ءسىز: «باياعىدا مىنبەگە شىعىپ، ءسوز الۋ ءۇشىن، اقپارات تاراتۋ ءۇشىن دالەلدەنگەن ەڭبەگىڭ، قوعامدا پىكىر ايتاتىن بەدەلىڭ بولۋى كەرەك ەدى. باياعىدا، ەڭ بولماسا پىكىر ايتۋ ءۇشىن 100 قويدان 101 قوزى الۋىڭ كەرەك بولاتىن. ال ءقازىر ەرىنبەگەن ەتىكشى، ۇيالماعان ءانشى بولاتىن زامان تۋدى. شەكسىز مايدان باستالىپ كەتتى. تىزەسىنە نوۋتبۋگىن قويىپ ويىنا كەلگەنىن جازا بەرەدى. ەلىنە قۇرمەتى قالعان جوق. مۇنىڭ ءبارى، بىرىنشىدەن، مادەنيەتتىڭ جوقتىعىنان. تەكتىلىكتىڭ بولماۋىنان دەپ ويلايمىن. مىسالى، فەيسبۋك اقش-تا وتباسىمەن بالىق اۋلاۋعا بارعاندارى سەكىلدى دەمالىستارىنىڭ سۋرەتىن سالاتىن الەۋمەتتىك جەلى بولىپ سانالادى. ال، بىزدە، قازاقستان قوعامىندا بۇل ساياسي ارەناعا اينالىپ وتىر. وسىنى اۋىزدىقتاۋ ءۇشىن نە ىستەۋ كەرەك دەگەن ماسەلە اقپارات مينيسترلىگىنىڭ الدىندا تۇر»، -دەدىڭىز! http://qamshy.kz/home/show/13243
مىنە، قانداي سوراقىلىق! وسىلاي ايتۋعا حالىقتان ۇيالمادىڭىز با؟! الدە سول حالىقتى «ايتقانعا كونىپ ايداۋعا جۇرە بەرەتىن نادان، ماڭگۇرتتەنگەن توبىر دەپ ويلادىڭىز با؟!». كەزىندە مارقۇم زامانبەك نۇرقادىل اعامىز: «اقىلدى بيلىك – نارازى حالىقتىڭ سەبەبىمەن كۇرەسەدى، اقىماق بيلىك – نارازى حالىقتىڭ وزىمەن كۇرەسەدى!»، -دەگەن ەكەن. وسىعان قاراپ سىزدەردىڭ دەڭگەيلەرىڭىزدى دە شامالاۋ قيىن ەمەس-اۋ.. «ساق ادام ساندىعىن بەكىتە الادى. ەستى ادام ءتىلىن تيا الادى. ءبىراق، ەشكىم ويىن تيا المايدى.»، -دەپ شاكارىم بابامىز بەكەر ايتپاعان عوي! جالپى ەلدىڭ زيالىسى دا، تىرەگى دە سىزدەر عانا ەمەس قوي! سىزدەردىڭ دەڭگەيلەرىڭىزدەگى زيالىلار ەلىمىزدە جۇزدەپ، مىڭداپ سانالاتىنىن ۇمىتپاڭىزدار! «باي بولساڭ حالقىڭا پايداڭ ءتيسىن – باتىر بولساڭ جاۋىڭا نايزاڭ ءتيسىن» -دەمەكشى، حالقىنىڭ ءقادىرىن ءبىلىپ ونى قۇرمەتتەمەسە، ولارعا پايداسى تيمەسە، ولاردىڭ مۇڭ-مۇقتاجىنا قۇلاق اسىپ ولارمەن ساناسپايتىن بولسا، ونداي دەپۋتاتتاردىڭ حالىق ءۇشىن قاجەتى قانشا؟! ال، مۇنداعى ءسىزدىڭ شامبايىڭىزعا ءتيىپ وتىرعان الەۋمەتتىك جەلىدەگى بىرنەشە مىڭداعان حالىقتىڭ ەركىن وربىتكەن وي پىكىرلەرىنە كەلسەك، ول – ءبىزدىڭ بۇگىنگى قوعامىمىزدىڭ شىنايى بەت-بەينەسىن ايقىنداپ، سارالاپ-سالماقتاپ وتىرعان «حالىق» اتتى «ءادىل- تارازى» ەكەندىگىن ءسىز باسقالاردان دا ارتىق ءبىلىپ، ءتۇسىنۋىڭىز كەرەك ەدى!!! ەلىمىزدى وركەندەسىن، دامىسىن دەگەن بيلىك،سىزدەر سياقتى حالىقتى ناداندىققا، قاراڭعىلىققا يتەرمەلەمەيدى! كەرىسىنشە، ولاردىڭ پىكىرلەرىمەن ساناسىپ، سول حالىقتى تولعاندىرىپ جۇرگەن ماسەلەلەرگە دەندەپ كوڭىل بولمەس پە ەدى!.. «باسى اۋىرماعاننىڭ قۇدايمەن ءىسى جوق» -دەمەكشى، مىناۋ حالىقتىڭ ارقاسىندا جايلى ورىنعا جايعاسىپ العان سوڭ، ويىمىزعا كەلگەنىن ىستەيمىز دەسەڭىزدەر وڭباي قاتەلەسىزدەر! سىزدەردىڭ كوزدەرىڭىز ەكەۋ بولسا، حالىقتا ميلليونداعان كوز بار! قازاقستان تاۋەلسىزدىگىن العالى بەرگى شيرەك عاسىردا، عاسىرعا تاتىرلىق جەتىستىكتەرگە جەتتى دەسەك، ول – ەلباسىمىزدىڭ ساليقالى ساياساتىن ءبىر اۋىزدان قولداپ، ەلباسىمىزدىڭ تىرەگى بولعان وسى حالىقتىڭ ادال ەڭبەكتەرىنىڭ، توككەن ماڭداي تەلەرنىڭ ناتيجەسى ەكەنىن ۇمىتپاڭىزدار! قاي ەلدە بولسىن قوعامدى قۇراتىن دا، كەرەك دەسەڭىزونى كۇيرەتەتىن دە سول حالىقتىڭ ءوزى ەكەنىن ەستەن شىعارماڭىزدار! ءسوز سوڭىندا ايتارىم: ايگىلى عۇلاما لۇقپان حاكىم بىردە بالاسىنا بىلاي دەپ وسيەت ايتقان ەكەن: «ۇلىم، دانالىق نەمەسە حيكمەتكە جەتكىڭ كەلسە – جۇرەگىڭدى ءولى كۇيگە دۋشار ەتپە، مىسكىن كورسەڭ بىرگە وتىر، ادامداردى ماقتاۋعا ارنالعان ماجىلىستەن قاشىق ءجۇر، تومەن ادامداردى قادىرلە، قۇلدى ازات ەت، عارىپكە پانا بول، پاقىرعا قولىڭدى سوز. وسىلاي جاساپ داعدىلانساڭ، كولدەنەڭ قاۋىپ-قاتەردەن امان جۇرەسىڭ، بۇل امالدار سوعىسساڭ قۇرالىڭ بولادى، جالاڭاش قالساڭ شاپانىڭ بولادى.»، -دەگەن ەكەن. سونداي-اق، «ءومىر اتتى تەڭىزدەگى باستى شىراعىڭ – ادامدىعىڭ. ودان ايىرىلساڭ، باعىت-باعدارىڭنان ايىرىلعانىڭ، جولىڭنان اداسقانىڭ!»، -دەپ اكىم ىسقاق اعامىز ايتقانداي، ادامدىق دەگەن ۇلى قاسيەتتەرىڭىزدى جوعالتپاڭىزدار، اعايىن!
«كەيدە، ءبىر مينۋتتىق سابىرلىعىڭىز – ءسىزدى ءجۇز كۇندىك وكىنۋدەن قۇتقارۋى مۇمكىن»، -دەگەن جۇڭگو حالقىنىڭ ناقىل ءسوزى باردى. سول ايتقانداي، سىزدەر سياقتى ەلدىڭ، حالىقتىڭ تاعدىرىنا جاۋاپ بەرەتىن تۇلعالار، ءاربىر ىستە قىزبالىققا سالىنبايسابىرلىق تانىتىپ، «ءالىپتىڭ اياعىن باعىپ»، -دەگەندەي ويلانىپ سويلەۋدىڭ ەش ارتىعى بولماس ەدى! مەن سىزدەردىڭ ەڭبەكتەرىڭىزدى جوققا شىعارىپ سىناپ-مىنەيىن دەگەن ويدان اۋلاقپىن. «تاسادا جاتىپ تاس اتقانشا» ايتارىمدى اقساقال رەتىندە اشىق ايتقانىما تۇسىنىستىكپەن قارارسىزدار دەپ سەنەمىن! بۇعان وقىرمان قاۋىم دا ءوز وي پىكىرلەرىن اشىق ايتىپ قوسا جاتار دەگەن ۇمىتتەمىن!
باعدال اقىن ۇلى
ق ر جۋرناليستەر وداعىنىڭ مۇشەسى
دەرەككوز: elana.kz
