5 جاسىندا امەريكالىقتار اسىراپ العان قازاق قىزى 16 جاسىندا قازاقستانعا، وتانىنا قايتۋعا بەل بايلايدى. ءبىلىم الۋ ءۇشىن كەلدىم دەگەن قىزدىڭ ەلىنە ورالۋىنىڭ سەبەبى باسقا ەدى. دومبىرانىڭ سىڭعىىرلاعان ءۇنىن ەستىپ، وتانىنا بىرەۋ شاقىرعانداي بولدى جاننانى.

16 جاستاعى جاننا بۇگىندە كيمەپ ستۋدەنتى. قازاق ءتىلىن مەڭگەرۋدى قولىنا الىپ، تۋعان جەرى جايىندا كەڭ زەرتتەپ ءجۇر. ەلگە قايتۋعا اسىراپ العان اناسىنىڭ سەپتىگى تيگەن كورىنەدى. سەبەبى، امەريكالىق اناسى قىزعا جاستايىنان قازاقستاننىڭ مادەنيەتىن تانىستىرۋمەن كەلەدى.

جاننانىڭ امەريكالىق اتا-اناسى جاس كۇندەرىندە ازيا ەلدەرىنە ساياحات جاساۋدا ۇناتقان ەكەن. سول كەزدە وسى ءبىر كەرەمەت وڭىردەن بالا اسىراپ الۋدى ارماندايدى. كەيىن وزدەرىنىڭ تۇڭعىشتارى ومىرگە كەلگەن تۇستا وتاعاسى جۇرەك تالماسىنان كوز جۇمعان. ال جالعىزباستى انا جارىنىڭ ارمانىن ورىنداۋ ماقساتىندا بالا اسىراپ الۋ جولىن ىزدەستىرە باستايدى. تابادى دا. تاڭداۋى قازاقستاندا تاربيەلەنىپ جاتقان جانناعا تۇسكەن. ۇزاق ۋاقىتقا سوزىلعان اسىراپ الۋ پروسەسىن باستان وتكەرىپ، جەتىم قىزدى ءوز ەلىنە الىپ كەتەدى. ەل قاتارلى تاربيە بەرىپ، ءبىلىم اۋلىنا بار جاعدايدى جاسايدى. ونىڭ قازاق قىزى ەكەندىگىن ۇنەمى ەسىنە سالۋمەن بولادى.

«مەن كانزاستاعى (اقش) مەكتەپتە ءبىلىم الدىم. وندا ازيالىق ناسىلدەن ءۇش بالا عانا بولدىق. قازاقتار بولعان جوق. ول كەزدە مەن ءوز ەلىمنىڭ مادەنيەتى تۋرالى تىم از بىلەتىن ەدىم. انام ماعان قازاق ەكەنىمدى، تۋعان جەرىم قازاقستان دەپ اتالاتىندىعىن ۇنەمى ايتۋمەن بولدى. ول ماعان قازاق ءتىلىن ۇيرەتەتىن وقىتۋشى تابۋعا دا تىرىسقان ەدى. ءبىراق ونداي مۇمكىندىك بولمادى. بىردە مەن نيۋ-گەمپشيردە اسىراندى بالالارعا ارنالعان قازاق ءتىلدى جازعى لاگەر بارىن ءبىلدىم. انام مەنى سول جەرگە الىپ باردى. ناتيجەسىندە لاگەردى ۇيىمداستىرۋشى ەرىكتىلەردىڭ ءبىرى ەردەن مەنىڭ الماتىعا كوشىپ كەلۋىمە جاردەم بەردى»، – دەيدى جاننا.

ول لاگەردە جۇرگەن كەزدە قازاقتىڭ ءداستۇرلى داستارحانىنان ءدام تاتىپ، ۇلتتىق مادەنيەت تۋرالى تانىمىن كەڭەيتكەن. دومبىرا ۇنىمەن دە وسى جەردە تانىسقان ەكەن. ارتىنشا قازاق دالاسىنا كەلۋدى ماقسات تۇتادى. ويتكەنى ناعىز قازاق بولۋ ءۇشىن شەتەلدە ەمەس ءوز ەلىڭدە ءومىر ءسۇرۋ كەرەك. سوندىقتان دا قوسىمشا جۇمىس ىستەپ، قارجى جيناۋعا كوشكەن. ايتۋىنشا، العاشىندا قوناق ۇيگە تازالىقشى بولىپ ورنالاسادى، كەيىن ءوزى وقيتىن كوللەدجدىڭ مەديا ورتالىعىنىڭ سمم – مەنەدجەرى بولىپ قىزمەت ەتەدى.

جاننا يمەل 2016 جىلدان بەرى كيمەپ ستۋدەنتى. ول قازاق ءتىلىن ۇيرەنۋدى ءالى دە جالعاستىرۋ ۇستىندە. از ۋاقىتتىڭ ىشىندە ەركىن مەڭگەرىپ الۋدى ماقسات تۇتىپتى. سونىمەن قاتار قازاقستاندى دا زەرتتەۋ ۇستىندە ەكەن. بالا كۇنىنەن قالعان ەستەلىكتەرى جوققا ءتان. ءارى امەريكالىق تاربيەسى مەن مەنتاليتەتى بۇل ءوڭىردىڭ تابيعاتىنا ساي كەلمەيدى ەكەن. ول ساباقتان بوس ۋاقىتىندا بالالارعا اعىلىش تىلىنەن ءدارىس بەرەدى ەكەن. قازاق دالاسىنا كەلگەنىنە قۋانىشتى

«مەن قازاق تاعامىنا ابدەن ۇيرەنىپ الدىم. ءتىپتى ەت اسۋدى دا مەڭگەردىم. ادامدار مەنىڭ ارمانىم تۋرالى ەستىگەن كەزدە قولدان كەلگەنشە كومەك بەرۋگە تىرىسادى. مەنىڭ سوزدىك قورىم جاڭا سوزدەرمەن تولىقتى. قازاق ءتىلدى ورتادا ءوزىمدى ۇستاۋدى ۇيرەندىم. مەن قازاقستانعا كەلگەنىمە جانە بۇل شەشىمىمدى انامنىڭ قولداعانىنان باقىتتىمىن»، – دەيدى جاننا يمەل.

فوتو: ۆلاديمير ترەتياكوۆ