كەشەن، 23 مامىردا  كوشىپ كەلە جاتىپ، شەكارا قىزمەتكەرلەرى اقشاسىن الىپ قويعان گۇلجان ءماۋىتحان قىزىنىڭ ماسەلەسىنە بايلانىستى  استانادا كەزەكتى مارتە  باسپا ءسوز ءماسليحاتى ءوتتى. جيىنعا قوعام بەلسەندىلەرى، زاڭگەرلەر جانە جۋرناليستەر قاتىستى.

«جۇرت دەگەندە جۇمىلىپ، ەل دەگەندە ەگىلەتىن» قانداستاردىڭ قوعامدىق رەزونانس تۋدىرعان ماسەلەسى 3 اي وتسە دە ءوز شەشىمىن تاپقان جوق. «مايقاپشاعاي» كەدەندىك باقىلاۋ بەكەتىندە 59900 اقش دوللارىنان ايىرىلعان جەسىر اناعا بايلانىستى ءبىرىنشى سوت وتىرىسى 17 ناۋرىزدا زايسان قالاسىندا وتكەن بولاتىن. سوت ۇكىمى 234-باپ بويىنشا گۇلجان ءماۋىتحانقىزىن ايىپتى دەپ تانىعان. سونىمەن قاتار، 68 مىڭ تەڭگە ايىپپۇل سالىپ، قالعان 40 مىڭ دوللاردى مەملەكەتكە كىرىس رەتىندە اۋدارعان ەدى. الايدا، ءبىرىنشى سوت شەشىمىن ادىلەتسىز دەپ نارازى  بولعان جۇرتتىڭ قاراسى كوپ. ەندى اپەللياسيالىق سوت وتىرىسى 1 ماۋسىمدا وسكەمەن قالاسىندا وتەدى.

 «كوزىمنىڭ تىرىسىندە ۇرپاقتارىمىزدىڭ  ءوز ەلىندە وسىپ-ونگەنىن كورەيىن، «ەلىم، جۇرتىم»  دەپ كەلگەنبىز. ءقازىر ءوز اقشامىزدان ءوزىمىز ايىرىلىپ دالادا ءجۇرمىز. ەكىنشى سوت وتىرىسىنان ءۇمىتىم كوپ»،- دەيدى گۇلجان ءماۋىتحان قىزى.

بۇل ماسەلە ۇلتتىق يميدجىمىزگە كەرەعار ەكەنىن العا تارتقان قوعام بەلسەندىلەرى ءوز كەزەگىندە الداعى اپەللياسيالىق سوت وتىرىسىن ءجىتى نازاردا ۇستايتىنىن جەتكىزدى.

 ابزال قۇسپانوۆ، زاڭگەر:  «قىلمىستىق جاۋاپقا تارتىلۋ ءۇشىن، قولدانىستاعى زاڭناماعا سايكەس بۇل كىسىلەردىڭ تاراپىنان سۋبەكتيۆتى ارەكەت دالەلدەنۋ كەرەك. ونداي ارەكەت دالەلدەنگەن جوق. سونىمەن قاتار مەملەكەتكە، قر-نىڭ بيۋدجەتىنە ەشقانداي زالال كەلىپ وتىرعان جوق. دەمەك، بۇل جەردە قىلمىستىق قۇرام جوق.  بار بولعانى ءبىر جاپىراق قاعازدى تولتىرۋدى بىلمەگەن»

مۇحتار تايجان، قوعام قايراتكەرى:  «وسى مەملەكەتتىڭ ازاماتى رەتىندە، قازاق رەتىندە وسىنداي جاعداي ءۇشىن سىزدەن كەشىرىم سۇرايمىن. مەملەكەتىمىزدىڭ سوت جۇيەسىندە تۇسىنىكسىز جاعدايلار بار. قانشا قارجىنى جىمقىرعان قىلمىسكەرلەر بوستاندىقتا ءجۇر. ال، قاراكوز قانداستارىمىز بىلمەستىك ءۇشىن جاۋاپكەرشىلىككە تارتىلىپ، 6 ايدان بەرى اۋرە-سارساڭعا ءتۇسىپ ءجۇر. مۇلدە تۇسىنىكسىز»

عالىم بايتۋك، قوعام قايراتكەرى: «وسى كەزدە اباي ءتىرى بولسا: «قايران، قازاعىم-اي» دەپ كۇرسىنەر ەدى... كيريلليسا ءقارىپىن تانىمايتىندىعىن پايدالانىپ، بۇلاي الداۋ ۇيات نارسە»

جاۋدى دا جات كورمەگەن قازاقپىز.  اتا-جۇرتىن ىزدەپ كەلگەن قانداستارعا ءدال بۇلاي وپاسىزدىق جاساۋ ەشقانداي مورالدىق-ەتيكاعا دا، رۋحاني-ادامگەرشىلىككە دە جاتپايدى.  جەسىر انانىڭ كوز جاسىن كورەر كوز، ەستىر قۇلاق بولارىنا ءبىز سەنەمىز...

وسى ءىس بويىنشا قر-نىڭ باس پروكۋراتۋراسىنا بۇگىن شاعىم تۇسىرىلەدى جانە ءىستىڭ ناتيجەسى  ءبىزدىڭ نازاردا  بولادى. 

نازەركە ءورقارا