الماتىدا تۋعان قىزىنىڭ ەمىنە حالىقتان جىلارمان بولىپ اقشا سۇراپ، ىزىنشە جينالعان قاراجاتتى باسقا ماقساتقا جۇمساعان ايەل ايىپتى دەپ تانىلدى. بوستاندىق اۋداندىق سوتى اقمارال جاقسىلىقوۆانىڭ ارەكەتىن زاڭسىز دەپ تاۋىپ، قايىرىمدىلىق قورىنان وعان بەرىلگەن 12 ملن تەڭگەنىڭ 10 ملن. تەڭگەسىن قايتارىپ بەرۋ تۋرالى شەشىم شىعاردى. ەرىكتىلەر الگى اقشانى بىلتىر نەبارى 2 ايدا جيناپ، مۇقتاج جانعا تاپسىرعان ەكەن. الايدا، بۇيرەككە ءزارۋ بولعان جانەل جايلاۋوۆانىڭ اناسى بەلسەندى جاستار تابىستاعان قارجىنىڭ تەڭ جارتىسىن وزگە قاجەتتىلىكتەرىنە جاراتىپ جىبەرىپتى. ال، كەلىسىمشارتتا قوماقتى قاراجات تەك ناۋقاس قىزدىڭ وتاسىنا عانا جۇمسالۋى كەرەك دەپ كورسەتىلگەن. وسى تۇستا، 12 جاستاعى جانەلگە وپەراسيا ۇكىمەت تاراپىنان تەگىن جاسالعان. ال، قاجەتتى اعزانى قىزدىڭ تۋىسى ءوز ەركىمەن بەرگەن ەكەن. وسىنى ەسكەرگەن سوت بىرنەشە ايعا سوزىلعان داۋلى ىسكە نۇكتە قويدى. ەندى ايىپتالۋشى تاراپ سوتتىڭ شەشىمىن 1 ايدا داۋلاپ، اپپەلياسيالىق شاعىم تۇسىرە الادى دەپ حابارلايدى قامشى اقپاراتتىق اگەنتتىگى almaty.tv/kz-كە سىلتەمە جاساي وتىرىپ.    

«بوستاندىق اۋداندىق سوتىنىڭ شەشىمىمەن، اقمارال جاقسىلىقوۆا ايىپتى دەپ تانىلىپ، ەرىكتىلەرگە 10 ملن. تەڭگە قايتارىپ بەرۋگە مىندەتتەلەدى. قالعان 2 ملن. تەڭگەنى  باسقا قايىرىمدىلىق قورى بولگەندىكتەن، ول اقشا قايتارىلمايدى. سوت شەشىمى كۇشىنە ەنگەن كۇننەن باستاپ، ايىپتالۋشىلار ونى 1 ايدا قايتا قاراپ، اپپەلياسيالىق شاعىم تۇسىرە الادى»، - دەدى سۋديا ايگەرىم قالييەۆا.

ەستە بولسا، بىلتىر جازدا ءبىزدىڭ تىلشىلەر جانەل جايلاۋوۆانىڭ جاعدايىن كورسەتكەن ەدى. ول كەزدە قارشاداي قىز اقساي بالالار اۋرۋحاناسىندا ەم قابىلداپ جاتقان. دارىگەرلەر ناۋقاسقا شۇعىل تۇردە بۇيرەك قاجەت دەپ، دونور ىزدەۋگە كىرىسەدى. كەيىن تاپ سونداي وتانىڭ يزرايلدە جاسالاتىنى ءمالىم بولادى. وپەراسيا قۇنى شامامەن 30 مىڭ ەۆروعا باعالانعان. ىزىنشە، جاعدايى جۇتاڭ وتباسى شارق ۇرىپ، حالىقتان جىلۋ جيناۋعا كىرىسەدى. بۇل ىسكە الماتىنىڭ ەرىكتىلەر توبى دا جۇمىلىپ، ءتيىستى اقشانى جيناۋعا سەپتىكتەرىن تيگىزگەن ەدى.  ەندى قايتارىلعان اقشانى ەرىكتىلەر توبى جاردەمگە مۇقتاج باسقا بالالاردىڭ ەمىنە جۇمساۋدى كوزدەپ وتىر.