شىمكەنت قالاسىنىڭ 11 مولتەك اۋدانىندا تۋعان اكەسى بالاسىن كۇرەكپەن سوققىنىڭ استىنا الىپ جاتقان ۆيدەوسى جەلىدە پايدا بولدى ، دەپ حابارلايدى قامشى اقپاراتتىق اگەنتتىگى. 

جەلىنى شۋلاتقان سۋرەت پەن ۆيدەودا  تۋعان اكەسى 4 جاستاعى بالاسىن  اۆتوكولىكتىڭ رەزىڭكە دوڭگەلەگىنىڭ ورتاسىنا شىعا الماستاي ەتىپ قويىپ،  كۇرەكپەن باسىنان قايتا-قايتا ۇرۋمەن بولادى.  بۇل قاتىگەزدىكتىڭ كۋاگەرلەرى ەشتەڭە ايتپاستان جاي عانا تاماشالاپ تۇر. ۆيدەونى جىبەرگەن كىسى ءوز ەسىمىن قۇپيا ۇستاپ وتىر. جىبەرۋشىنىڭ ايتۋى بويىنشا، اكەسىنىڭ قاتىگەز ارەكەتتەرى كۇن سايىن قايتالانىپ وتىرادى ەكەن. ءبىر كۇنى باسىن كىرپىشپەن ۇرسا، كەلەسى كۇنى مازاق ەتۋدىڭ، قورلاۋدىڭ باسقا تۇرلەرىن تاۋىپ وتىرادى ەكەن. 4 جاستاعى بەيكۇنا ءبۇلدىرشىننىڭ دەنەسىنىڭ ساۋ جەرى قالماعان. كوك الا قويداي ساباپ بولعان سوڭ، قانتالاپ ، كوگەرگەن جەرلەرىن كەتىرۋ ءۇشىن ساعاتتار بويى سۋىق سۋدىڭ استىندا تۇرۋعا ماجبۇرلەيدى ەكەن.

ۆيدەودان بولەك كەلىپ تۇسكەن سۋرەتتەرگە قاراساق اكەسىنىڭ بۇل ارەكەتى جازالاۋ ەكەنى بايقالادى. بەلگىلى بولعان مالىمەتتەرگە سۇيەنسەك، بالانىڭ  اناسى قايتىس بولعان . ال ءبۇلدىرشىن اكەسىمەن بىرگە تۇرادى.

 ىشكى ىستەر دەپارتامەنتىنىڭ قىزمەتكەرلەرى اتالعان ءىس ورىن العان ايماققا جىبەرىلدى. 

دايىنداعان:  ايگەرىم تاۋباي