جول قاۋىپسىزدىك ەرەجەلەرى ادام قانىمەن جازىلعان دەپ بەكەر ايتىلماسا كەرەك. كولىك جۇرگىزۋشىلەرى دە، جاياۋ جۇرگىنشىلەر دە ەرەجەلەردى ساقتاي وتىرىپ جول اپاتىنان ساقتانۋعا بولاتىنىن بىلەدى. "ساقتىقتا قورلىق جوق" دەمەي مە؟ الايدا ەرجەلەرگە نەمقۇرايلى قارايتىن ادامدار دا تابىلىپ جاتادى. جول ەرەجەلەرىن ساقتامايتىن كولىك جۇرگىزۋشى ءوزى ءۇشىن دە، وزگەلەر ءۇشىن دە اسا ءقاۋىپتى. ءبىر جەڭىل اۆتو كولىك جۇرگىزۋشىسى جول ەرەجەسىندە كىشكەنە قاتەلىك جىبەرسە نەمەسە ءرولدى باسقارا الماي كەتسە قايعىلى جاعداي ورىن الماق.
الايدا جاياۋ جۇرگىنشىلەر دە تەلەفونعا ءۇڭىلىپ، ءتىپتى باعدارشامدا قانداي ءتۇس جانىپ تۇرعانىنا دا ءمان بەرمەيتىندەر بار. باعدارشامنىڭ قىزىل ءتۇسى جانىپ تۇرسا دا اسىعىپ، جۇگىرىپ وتەتىندەر بار ەكەنى جاسىرىن ەمەس. ونى كۇندەلىكتى ومىردە سىزدە، ءبىز دە كورىپ ءجۇرمىز.
ال ءقازىر فرانسيادا بولعان جاعدايعا توقاتالايىق.
ءپاريجدىڭ اشىق اسپان كۇندەرىنىڭ بىرىندە كوشە بويىندا ءبىر توپ ادام جولدى كەسىپ وتپەكشى بولادى. باعدارشامدا قىزىل جانسا دا ادامدار تەلەفوندارىنا قاراپ جولدان وتە بەرەدى.
وسى جۇرگىنشىلەردىڭ اراسىندا باعدارشامنان ءوتىپ بارا جاتقان ايەل دە بار. ول اسىعىپ بارا جاتقان كەزدە تىنىشتىقتى بۇزعان كولىكتىڭ تەجەگىشىنىڭ دىبىسىن ەستيدى. قاتتى شىققان تەجەگىش داۋسىن ەستىگىن ايەل شوشىپ ايقايلاپ جىبەرەدى. بەتىن قولىمەن جاۋىپ قالادى. ءبىراق... ول ەسىن جيعاندا قاسىندا ەشقانداي كولىكتىڭ جوق ەكەنىن اڭعارادى. تۇكتە تۇسىنبەي جان جاعىنا قاراي باستايدى دا مىنا سۋرەتكە كوزى تۇسەدى.
ايەلدىڭ تۋرا الدىندا ءوزىنىڭ ءقاۋىپتى سەزگەن ۋاقىتتاعى سۋرەتى تۇرادى. وندا «ولىممەن بەتپە-بەت كەلە بەرمە. جولدان وتەسىڭ بە باعدارشامعا نازار اۋدار» دەگەن جازبا بار.
مىنە، فرانسۋزدار جولعا نەمقۇرايلى قاراۋدىڭ ارتى قانداي بولۋى مۇمكىن ەكەنىن وسىنداي ارەكەتپەن حالىققا تۇسىندىرۋگە تىرىستى. ءدال وسى جاعداي كوپ ادامداردىڭ ويلانۋىنا سەبەپ بولارى انىق.
دايىنداعان: نازەركە مۇسا
