37 جاستاعى ستەفاني دەكەر 5 جىل بۇرىن بالالارىنىڭ ءومىرىن ساقتاپ قالۋ ءۇشىن ءوز دەنساۋلىعىن قۇربان ەتتى. دەكەرلەر وتباسى تۇراتىن گەنريۆيلل قالاشىعىندا تابيعات اپاتى بولدى. 2012 جىلى قۇيىن كەلىپ جولىندا كەزدەسكەننىڭ بارلىعىن قيراتىپ، شايىپ كەتىپ وتىردى. ستەفاني ءدال سول كەزدە بالالارىمەن ۇيگە كىرگەن ەدى. ايەل بالالارىن بىردەن جەرتولەگە اپارۋعا بەكىنەدى. الايدا تەرەزەنىڭ جانىنان ءوتىپ بارا جاتىپ اۋلاداعى باتۋت شار سەكىلدى اسپانعا ۇشىپ بارا جاتقانىن بايقايدى. تەرەزەلەر سىنىپ، ءۇي قۇلاپ كەتەتىندەي بولعان. ءقاۋىپسىز جەرگە بارۋعا ۇلگەرمەيتىنىن بىلگەن ستەفاني بالالاردى توسەنىشكە وراپ، ءوزى ۇستىنە جاتىپ الادى. اناسى بالالارىن دەنەسىمەن جابۋ ارقىلى قىزى مەن ۇلىنىن ءومىرىن ساقتاپ قالعان.

ستەفانيلەردىڭ ۇيىنە تورنادو كەلىپ، بارلىعى قيراپ جاتقاندا ءۇي قيراندىلارى جان-جاققا ۇشىپ جاتتى. بالالارعا ەشتەڭە بولمادى. سەبەبى بارلىعىن اناسى كوتەردى.

بولات باعان ايەلدىڭ اياعىنا ءتۇسىپ، اياعىن مورت سىندىرىپ جىبەردى. سونىمەن قاتار، دارىگەرلەر ستەفانيدىڭ وكپەسى زاقىمدانعانىن جانە بىرنەشە جەرىندە سۇيەگى سىنعانىن انىقتاعان. بالالارىنىڭ دەنساۋلىعى مەن ءومىرىن ساقتاۋ ءۇشىن ءوزىن قۇربان ەتكەن انانىڭ اياعىن دارىگەرلەر ساقتاپ قالا المادى. ونى كەسۋگە تۋرا كەلدى.

دەكەر ستەفاني كۇيەۋى مەن بالالارىنىڭ قولداۋى مەن دەمەۋىنىڭ ارقاسىندا قالىپتى ومىرگە قايتا كەلگەنىن ايتادى. ءوز ىسىنە ەشقاشان وكىنبەيتىنىن جانە باۋىر ەتى بالالارى ءۇشىن ءومىرىن دە قۇربان ەتۋگە دايار ەكەنىن، ولاردىڭ دەنساۋلىعى ءۇشىن قايتا سول ارەكەتتى جاساۋعا دايىن ەكەنىن ايتادى.

وسى جاعدايدان كەيىن ستەفاني دەكەر مۇگەدەكتەرگە قول ۇشىن بەرەتىن قور اشتى. ءقازىر ول جۇرە المايتىن جاندارعا كومەكتەسىپ، قولداۋ كورسەتىپ ءجۇر.

ستەفاني وتكەن جاعدايدان كەيىن ومىرگە دەگەن كوزقاراسى تۇبەگەيلى وزگەرگەنىن جانە بۇرىن ءوزى ءۇشىن قىمبات دەپ ويلاعاندارىنىڭ كوبىنىڭ ەشقانداي ماڭىزى جوق ەكەنىن تۇسىنگەنىن ايتادى. 

دايىنداعان: اسەم المۇحانبەت