"ەكسپو-2017" حالىقارالىق كورمەسى تاياپ كەلەدى. ءبارى ساقاداي-ساي، ەلوردانىڭ جىرتىعى جامالىپ، ارتىعى وزگە ايماقتارعا جونەلتىلدى. قانشا ايدان بەرى قۇرىلىسشىلار تىپىرشىپ، جول جوندەۋشىلەر ۇيقىلارىن ۇمىتىپ، ەڭبەك ەتۋدە. ەسكە سالا كەتەيىك، جاقىندا عانا استانالىق قاڭعىباستاردىڭ ءبارى دەرلىك كوكشەتاۋعا قۋىلعان. قالا ءبىرشاما تازارىپ قالعان بولار. الايدا وسىنداي دايىندىقتارعا اشىنعان قازاقتاردىڭ دا قاراسى كوبەيۋدە. ماسەلەن، كۇيىنگەن استانالىق تۇرعىن ءوز ويىن ينستاگرامداعى پاراقشانىڭ بىرىنە جاريالاپتى. مازمۇنى تومەندەگىدەي:  

«قۇرمەتتى استانالىقتار، 10 قىركۇيەككە دەيىن ءجونى ءتۇزۋ كيىمدەرىڭدى كيىپ جۇرىڭدەر. ءتىپتى، ءۇي ماڭىنداعى دۇكەننىڭ وزىنە ادەمى كيىنىپ شىعىڭدار. بولماسا، كوكشەتاۋدىڭ كوشەلەرىنەن ءبىراق شىعاسىڭدار. دوستىم، اباي بول! ءوز تاعدىرىڭا ءوزىڭ بالتا شاپپا. قوقىس جاشىگىنىڭ جانىنا مۇلدەم جولاما. ۇيىڭدە قوقىس جينالىپ قالسا دا بارما. 10 قىركۇيەكتەن سوڭ ءبارىن بىرگە تاستاي سالاسىڭ.

بازارلاردى مۇلدەم جاۋىپ تاستاۋ كەرەك. ءبىز دامىعان 50 مەملەكەتتىڭ قاتارىنا كىردىك ەمەس پە؟ قانداي بازار؟ شەتەلدىك قوناقتار ءبىزدى «حانشاتىر» مەن «كەرۋەندە» ساۋدا جاسايدى دەپ ويلاۋى ءتيىس ەمەس پە؟ ءدال وسىلاي ىستەسەڭىزدەر، «ناعىز استانالىقتار» دەگەن اتپەن بارلىق ب ا ق وكىلدەرى جازاتىن بولادى سىزدەر جايلى. كۇتىڭىزدەر! ءبىز وتە قوناقجاي بولىپ كورىنۋىمىز مۇمكىن. ەڭ باستىسى، قوناقتارىمىز ريزا بولسىن.

ال ءبىزدىڭ باۋىرساقتار مەن شەلپەكتەردى ەكسپو ۋاقىتىندا شەتەلدىڭ ەڭ مىقتى دەگەن ماماندارى دايىندايتىن بولادى. ءبارى ەتيكاعا، ەستەتيكاعا ساي بولۋى قاجەت.

11 قىركۇيەكتە قوناقتار كەتكەننەن كەيىن ءوزىمىز وتىرىپ شاي ىشەمىز. ءتىپتى، دورباعا سالاتىن سارقىت تا بولادى. ول ەكسپو-نىڭ بيۋدجەتىندە كوزدەلگەن.

ەڭ دۇرىس شەشىم، استانالىقتار 10 قىركۇيەككە دەيىن قالادان كەتۋى كەرەك. سەبەبى ولار وزدەرىنىڭ بىلمەستىكتەرىنىڭ كەسىرىنەن ەكسپو مەرەكەسىنىڭ شىرقىن بۇزۋى مۇمكىن.

قوناقتار كەلە جاتقاندا بالالارعا ايتادى عوي: «ءاي، سەندەر دالاعا بارىڭدار! ءقازىر قوناقتار كەلەدى!» قۇدايعا شۇكىر، كەڭ دالامىز بار! باراتىن جەرىمىز جوق ەمەس!»

شولۋشى: سابينا رامازان