شەتەلدە تۇراتىن قازاقستاندىقتار كوپ. ولاردىڭ ءبىرى ەلگە قايتا ورالسا، ەندى ءبىرى سول ەلدە قالادى. شەتەلدە العان ءبىلىمى مەن تاجىريبەسىن قازاقستاننىڭ دامۋى جولىندا ايانباي ەڭبەك ەتۋ ءۇشىن قايتا ورالاتىندار دا كوپ. قامشى اقپاراتتىق اگەنتتىگى weproject.kz-كە سىلتەمە جاساپ شەتەلدە تۇرىپ جاتقان 3 قازاقستاندىقتىڭ قازىرگى ءومىرى مەن ەلدەن نەلىكتەن كەتۋگە بەل بۋعانى تۋرالى جازبانى نازارلارىڭىزعا ۇسىنادى.
ايگۇل جولداسوۆا
38 جاستا Project Costcontroller (ەكونوميست)، تۋعان جەرى – اتىراۋ، ءقازىر نورۆەگيانىڭ وسلو قالاسىندا 2007 جىلدان بەرى تۇرادى
مەن 10 جىل بۇرىن قازاقستاننان وسلو قالاسىنا كوشتىم. ول ۋاقىتتا اتىراۋداعى نورۆەگيالىق مۇناي كومپانياسىندا جۇمىس ىستەدىم. تاجىريبە الماسۋ بويىنشا مەنى وسلو قالاسىنا 2 جىلعا جۇمىس ىستەۋگە شاقىردى. 2009 جىلى داعدارىس بولىپ كومپانيانىڭ الەم بويىنشا ءبىراز فيليالى جابىلدى. ماعان نورۆەگيادا جۇمىس ۇسىنىلدى.
جاڭا جەرگە ۇزاق بەيىمدەلدىم. ادامداردىڭ قارىم-قاتىناسى، تاعامى بارلىعىنا ۇيرەنىسە المادىم. العاشقى ەكى جىلدا قاتتى قينالدىم. تەزىرەك ۋاقىت ءوتىپ قازاقستانعا ورالسام ەكەن دەپ ويلادىم. وتباسىم، دوستارىمدى قاتتى ساعىندىم. سەبەبى نورۆەگيامەن سالىستىرعاندا قازاقستاندىقتاردىڭ مىنەزى اشىق.
ءقازىر قازاقستانعا جىلىنا 2-3 مارتە بارامىن. سوڭعى رەت ءساۋىر ايىندا بولدىم. اكەم مەن ستۋدەنت كەزدەن ارالاسىپ جۇرگەن دوستارىم الماتىدا تۇرادى. اپكەم استانادا، قالعان تۋىسقاندارىم اتىراۋدا. سوندىقتان ءبىر جىلدا ءۇش مارتە وسى ءۇش قالاعا كەلۋگە تىرىسامىن.
قازاقستاندىق گازەتتەردى وقيمىن. ونىڭ ىشىندە اتىراۋلىق باسىلىمدار دا بار. سونىمەن قاتار Instagram مەن Facebook-تە قازاقستاندىق بلوگەرلەردىڭ جازباسىن ۇنەمى باقىلاپ وتىرامىن.
نورۆەگيادا ادام ءومىرىن جاقسارتۋ ماقساتىندا، بالالار بولشاعى مەن ينفراقۇرىلىمدى دامىتۋ ءۇشىن كوپتەگەن جۇمىستار اتقارىلادى. شەتەلدە تۇرعاننان كەيىن قازاقستاندا كوپتەگەن سالانى ءالى دە دامىتۋ قاجەت ەكەنىن تۇسىنەسىڭ. قوماقتى قارجىنى جەلگە ۇشىرىپ جاتىرمىز. ال جاعدايدى تۇزەتۋ ءۇشىن كىشكەنتاي قادامداردان باستاۋ كەرەك. ءار تۇرعىن وزىنەن باستاۋ كەرەك. ماسەلەن، تەك ءوز ۇيلەرىن عانا ەمەس پاتەر دالىزدەرىن، اۋلالاردىڭ كوركەيۋۋىنە، تازا بولۋىنا ءمان بەرۋ كەرەك.
مەن قازاقستاندى قاتتى ساعىندىم. ەندىگى جىلى قازاقستاندا تويىم بولادى. وزىممەن بىرگە 30-50 نورۆەگيالىقتى قوناق قىلىپ الىپ كەلەمىن. ولارعا قازاقستاندى كورسەتكىم كەلەدى. مەن قازاقستاندى ماقتان تۇتامىن.
دۋمان قىدىقوۆ
27 جاستا، Product Engineer، تۋعان جەرى — الماتى، تۇراتىن جەرى - حيۋستون، تەحاس شتاتى، اقش. حيۋستوندا 2008 جىلدان بەرى تۇرادى.
مەن شەتەلدە ءبىلىم الامىن دەپ وزىمە ماقسات قويدىم. مەكتەپتى ءبىتىرىپ، امەريكاعا وقۋعا كەتتىم. ەڭ الدىمەن ءتىل كۋرستارىن وقۋدان باستادىم. ودان كەيىن قارجىگەر ماماندىعى بويىنشا كۋرستارعا بارىپ ءجۇردىم. الايدا كۋرستىڭ جارتىسىنا كەلگەندە بۇل مەنىڭ قالاۋىم ەمەس ەكەنىن ءتۇسىنىپ، ماماندىعىمدى وزگەرتتىم. 2016 جىلى حيۋستون ۋنيۆەرسيتەتىن mechanical engineering (مەحانيكالىق ينجەنەريا) ماماندىعى بويىنشا ءبىتىردىم.
مەن ءۇشىن امەريكاعا بەيىمدەلۋ قيىنعا سوقپادى. العاشقى جىلدارى تمد ەلدەرىنىڭ ازاماتتىرىمەن تىعىز قارىم-قاتىناستا بولدىم. ودان كەيىن قالىڭدىعىم ەكەۋىمىز قورشاعان ورتامىز قازاقتار مەن ورىس ءتىلدى ازاماتتار ەكەنىن بايقاپ سانالى تۇردە ولاردان الشاقتاي باستادىق. سول ۋاقىتتا امەريكاندىق ءومىر سالتىنا ۇيرەنىسۋ پروسەسسى باستالدى.
مەن ءتۇرلى ستۋدەنتتىك ۇيىمدارعا جازىلدىم. ۋنيۆەرسيتەتتىڭ اتىنان تەننيس ويناي باستادىم. امەريكان فۋتبولىن جاقسى كورىپ قالدىم. سونىڭ ناتيجەسىندە مەنى حيۋستاندا شەتەلدىك ەمەس ءوز ادامى سەكىلدى قابىلدايدى. مەن بۇعان قۋانىشتىمىن. سەبەبى تىلدىك جانە مادەني كەدەرگىلەردەن وتە الدىم.
قازاقستاندا مەنىڭ انام مەن اعام تۇرادى. ولار مۇمكىندىگىنە قاراي اقش-قا كەلىپ تۇرادى. سوڭعى رەت قازاقستانعا 2008 جىلى بارعانمىن.
شەتەلدە ءبىراز ۋاقى تۇرعاننان كەيىن تۋىپ-وسكەن ەلگە دەگەن قارىم-قاتىناسىڭىز وزگەرەدى. شەتەلگە كوشىپ كەتكەندەر مەنىمەن كەلىسەدى. نەلىكتەن بىزدە مىناۋ جوق، نەمەسە اناۋ سالا دامىماعان دەگەن ويلار ءجيى مازالايدى.
مەن قازاقستان جاڭالىقتارىن باقىلاپ وتىرامىن. الايدا جۇمىس كەستەم وتە تىعىز بولعاندىقتان ءجيى قاراپ وتىرامىن دەپ ايتا المايمىن. كوشىپ كەتكەن ۋاقىتتان بەرى قازاقستان جاقسى جاققا قاراي وزگەردى. عالامتور ارقىلى جاڭا عيماراتتار، جولدار، مەيرامحانالار مەن ساۋدا ۇيلەرى سالىنعانىن كورەمىن. الايدا كولىكتىڭ بۇرىنعىمەن سالىستىرعاندا بىرنەشە ەسەگە كوبەيگەنى بار. ال اۆتوتۇراق از. بولاشاقتا بىرنەشە قاباتتى اۆتوتۇراقتار سالىنادى دەپ ۇمىتتەنەمىن. سونىمەن قاتار، ءىرى قالالار اراسىنداعى جولداردىڭ جاعدايى دا كوڭىل كونشىتپەيدى.
قازاقستان مەنىڭ وتانىم. سوندىقتان ەلىمدى، حالىقتى، قازاقستاندىقتارعا ءتان قوناقجايلىق پەن جىلىلىعىن ساعىنامىن. ايەلىم ەكەۋىمىز قازاقپىز. سوندىقتان ايىنا ءبىر مارتە ەت اسىپ، مانتى ءتۇيىپ، پالاۋ باسىپ ونى ىستىق ءسۇت قاتقان شايمەن ىشەمىز.
ەربول ەسقالييەۆ
33 جاستا، IT، Conoco Phillips مۇناي كومپانياسى، تۋعان جەرى — ارقالىق، ءقازىر سان-فرانسيسكو، كاليفورنيادا تۇرادى. اقش.
2003 جىلى مەن امەريكاندىق مۇناي كومپانياسىندا جۇمىس ىستەدىم. سوندا ءبىر جىل جۇمىس ىستەپ ەڭبەك دەمالىسىمدا اقش-تىڭ كاليفورنيا شتاتىنا باردىم. بىرنەشە اپتا وتكەننەن كەيىن اتا-انام اقش-تا قالۋعا كوندىردى. سوندا جوعارى ءبىلىم الۋعا كەڭەس بەردى. جۇمىستان شىعىپ، امەريكالىق ۋنيۆەرسيتەتكە تۇسۋگە تالپىندىم. اتا-انام مەنىڭ ساپالى ءبىلىم الۋىم ءۇشىن تۇراتىن جەرىمدى قامتاماسىز ەتتى. سول ءۇشىن ولارعا شەكسىز ريزامىن.
امەريكا حالقى جىلى كورىنگەنىمەن، وتە قاھارلى ەل. اقش-تا «If it’s not about the money، it doesn’t make sense» دەگەن ماتەل بار. ول «اقشا بارلىعىنىڭ باسى» دەگەن ماعىنا بەرەدى. 2009 جىلى Operations Management ماماندىعى بويىنشا جوعارى ءبىلىم الدىم.
اقش-تا قىسقا ۋاقىتقا بولسا دا كەلگەن ءتۇرلى ەل ازاماتتارى ونىڭ ءومىر ءسۇرۋ دەڭگەيى مەن قانشالىقتى دامىعانىنا ءتانتى بولىپ كەتەدى. ىسساپارمەن اقش-تىڭ بىرنەشە قالاسىندا بولدىم.
وسى ۋاقىت ارالىعىندا كوپ اداممەن دوستاسىپ ۇلگەردىم. قازاقستاننان كەلگەن قوناقتاردى قۋانا قارسى الامىن. عالامتور ارقىلى قازاقستان جاڭالىقتارىن ءبىلىپ وتىرۋعا تىرىسامىن.
مەن جىلىنا ءبىر رەت قازاقستانعا كەلۋگە تىرىسامىن. كوبىنە ەڭبەك دەمالىسىنا جوسپارلايمىن. ايەلىم ەكەۋىمىز دەمالىستى گاۆاييادا وتكىزەمىز بە الدە پاريجگە بارامىز با دەپ ۇزاق ويلانامىز دا، ناتيجەسىندە شىمبۇلاقتا كاۋاپ جەپ وتىرامىز.
سوڭعى 14 جىلدا قازاقستان جاقسى جاققا قاراي وزگەردى. ەكونوميكا دامىپ، مادەنيەت سالاسى دا جوعارى ساتىعا كوتەرىلگەنى انىق بايقالادى. جاقىن ۋاقىتتا وتانىما ورالىپ، ونىڭ دامۋىنا ۇلەس قوسامىن دەپ ۇمىتتەنەمىن.
اۋدارعان: اسەم المۇحانبەت
