وتباسىلى بولۋ ۇلكەن جاۋاپكەرشىلىكتى تالاپ ەتەدى. ەرەسەك ادامداردىڭ ءوزى مۇنداي جاۋاپكەرشىلىكتەن باس تارتىپ جاتادى. سول ادامدار 11 جاستاعى كولۋمبيالىق بالادان ۇلگى السا ەكەن.

حۋان پابلو مەن ونىڭ ءىنى قارىنداستارى اكەسى تۋرالى ەشتەڭە بىلمەيدى. ولار اناسىنىڭ قاراۋىندا بولعان. الايدا ءبىر كۇنى اناسى ۇيىنەن شىعىپ، قايتا ورالمادى.

11 جاستاعى بالا اتا-اناسىز جانە وزىنە قاراپ وتىرعان 3 باۋىرىمەن قالدى.

حۋان ءىنى قارىنداستارىنا قامقور بولىپ، ولاردى بۇرىنعىسىنشا مەكتەپكە اپارىپ، ساباعىن قاداعالايدى. الايدا كوپ ۋاقىتىن قايىر سۇراۋمەن وتكىزەدى. باستاپقى كەزدە باۋىرلارىن تاپقان ازىن اۋلاق تيىن تەبەنمەن تاماقتاندىرىپ ءجۇردى. ۋاقىت وتە كەلە جاعداي ۋشىعا ءتۇستى. قوقىستان تاماق ىزدەۋگە تۋرا كەلدى.

ءوزى اش بولسا دا ەڭ الدىمەن باۋىرلارىن تاماقتاندىردى. ولاردان قالعان قالدىقتى جەدى. ءبىر كۇنى كورشىلەرى بالالاردىڭ جىلاعان داۋىسىن ەستىپ، ولاردىڭ ۇيىنە باس سۇعادى.

ۇيگە كىرىپ كەلگەندە كورشىلەرى تاڭقالعالىسىن جاسىرمادى. وتباسىنىڭ جاعدايىنا قاراماستان ءۇي تاپ-تازا، بالالاردىڭ كيىمى جۋۋلى، شاشى تاراۋلى بولعان. سىرتتارىنان ەرەسەك ادامنىڭ قاراۋىنسىز قالعان بالالارعا مۇلدە ۇقسامايدى. 11 جاستاعى «وتاعاسى» باۋىرلارىنا قامقورلىق كورسەتكەن. حۋاننىڭ ارەكەتى ماقتاۋعا تۇرارلىق.

كورشىلەرى بالالاردىڭ ۇزاق ۋاقىت ءوز بەتىنشە قالاي ءومىر ءسۇرىپ كەلگەندىگىنە تاڭقالدى. بالالاردىڭ اناسى دا، اكەسى دە تابىلمادى. سوندىقتان ولار مەملەكەتتىڭ قاراۋىندا بولادى.

كورشىلەرى ءوز جاسىنان ەرتە ەسەيگەن حۋان ەرەسەك ادامدارشا سويلەيتىنىن جانە ويلاۋ قابىلەتىنە تاڭقالعاندارىن ايتادى. ەندى حۋان ۋايىم-قايعىسىز قاراپايىم بالا سەكىلدى ءومىر سۇرە الادى دەپ ۇمىتتەنەدى. 

شولۋشى: سابينا رامازان