86 جاستاعى دجەففري ۋوكەردىڭ ينستاگرامداعى پاراقشاسى ونىڭ سۇيىكتى جارىنىڭ سۋرەتتەرى مەن جارىنا دەگەن ىستىق سەزىممەن كومكەرىلگەن سوزدەرگە تولى. جاسى كەلگەن رومانتيك بۇگىندە عالامتوردىڭ جۇلدىزىنا اينالعان، جاستار ودان باقىتتى بولۋدىڭ كىلتىن سۇراپ كۇندە جازاتىن كورىنەدى.

دجەففي ۋوكەر ينستاگرام پاراقشاسىن نەمەرەلەرى مەن شوبەرەلەرىنىڭ سۋرەتتەرىن قاراپ وتىرۋ ءۇشىن اشقان. ءسويتىپ الەۋمەتتىك جەلىنى ۇلكەن وتباسىنداعى تاتۋلىقتى ساقتاپ تۇراتىن بىردەن ءبىر كۇش دەپ تۇسىنەدى.

ءوزىنىڭ پارقشاسىنا سۇيىكتى جارى پولينانىڭ سۋرەتتەرىن سالا باستايدى. دجەففري مەن پولينا 1951 جىلى وتاۋ قۇرىپ، بۇگىنگى كۇنگە دەيىن سەزىمدەرى ءبىر سۋىماستان باقىتتى عۇمىر كەشىپ كەلەدى.

تۆيتتەر قولدانۋشىسى لورەن سكەلل دجەففەر ۋوكەر جايلى جازعاننان كەيىن قاريا ءاپ ساتتە جۇلدىز بولىپ شىعا كەلەدى.

86 جاستاعى عاشىق قاريا مۇنداي وزگەرىستى كۇتپەگەن ەدى، الايدا سۇيىكتى جارىنىڭ سۋرەتتەرىن سالىپ، سەزىمىن ءبىللدىرۋدى ءالى دە جالعاستىرىپ كەلەدى. بۇگىندە ونىڭ پاراقشاسىن 25 مىڭنان كوپ وقىرمان وقيدى. 

شولۋشى: گۇلىم جاقان