ۇلتتىق ونەردى ۇلىقتاپ جۇرگەن ءداستۇرلى انشىلەر بۇل جولى وسكەمەندە باس قوسىپ، اسەتتىڭ ءانىن قالىقتاتتى. قازاقستاننىڭ تۇكپىر-تۇكپىرىنەن كەلگەن جيىرمادان استام ونەرپازدىڭ ىشىنەن ايتۋلى ونەر بايگەسىندە وزا شاپقان استانالىق جاقسىكەلدى ماياساروۆ باس جۇلدەگە يە بولدى، دەپ حابارلايدى شقو اقپاراتتىق ورتالىعى.

اسەت نايمانباي ۇلى – قازىرگى قاراعاندى وبلىسى اقتوعاي اۋدانىندا دۇنيەگە كەلگەن قازاقتىڭ سۋىرىپ سالما اقىنى، ءانشى- كومپوزيتورى. زامانىنىڭ اسقاق اقىنىن ۇلىقتاۋعا ارنالعان «ءىنجۋ مارجان» اتتى رەسپۋبليكالىق بايقاۋ شقو ءداستۇرلى تۇردە وتكىزىلىپ كەلەدى. العاشقى بايقاۋ سەمەي قالاسىندا ۇيىمداستىرىلعان بولاتىن. بۇل جولى، رەسپۋبليكالىق بايقاۋ وسكەمەندە وتكىزىلدى.

ەكى كەزەڭدىك سايىستىڭ كوركىن قىزدىرعان 23 ءانشى سىن تەزىنەن ءوتۋدىڭ وڭاي بولماعاندىعىن سەزىنگەنى انىق. تالاپ بويىنشا ورىندالاتىن  اندەردىڭ ىشىندە اسەتتىڭ ءانى بولۋى مىندەتتەلدى. بايقاۋدا ەسىمى ەلگە بەلگىلى رامازان ستامعازييەۆ، جارقىن شاكارىم، ساۋلە جانپەيسوۆا، كلارا تولەنبايەۆا، ەرلان رىسقالي، بەرىك وماروۆ سىندى قايراتكەرلەر قازىلىق ەتتى.

– ۇلى ونەردىڭ كوشىن جالعاپ جۇرگەن ونەرپازدارىمىز وسىنداي كەڭ اۋقىمدى كونۋرستاردا شىڭدالادى. نازاردان تىس قالدىرماي ءداستۇرلى انشىلەرگە قولداۋ كورسەتكەن شقو باسشىلىعىنا العىسىمىزدى بىلدىرەمىز، – دەدى رامازان ستامعازييەۆ.

قازاق ءانىنىڭ قۇدىرەتى اسپانداعان جامبىل اتىنداعى دراما تەاترىنداعى ءان بايقاۋىنىڭ  شىمىلدىعى كەشقۇرىم جابىلدى.     بايقاۋدىڭ جابىلۋ سالتاناتىندا ءسوز العان شقو اكىمىنىڭ ورىنباسارى جاقسىلىق ومار رەسپۋبليكالىق بايقاۋ ءار ەكى جىل سايىن ءداستۇرلى تۇردە وتەتىنىن ايتىپ، جەڭىمپازداردى ماراپاتتادى. بايقاۋ قورىتىندىسى بويىنشا جارتى ميلليون تەڭگە باس جۇلدەنى استانالىق جاقسىكەلدى ماياساروۆ جەڭىپ الدى.  ءى ورىن الماتىلىق جاسۇلان ساقايەۆقا، ءىى ورىن تولەگەن شاكارىموۆ مەن ءبىرجان ءبازىلحانوۆقا بۇيىردى. جاسۇلان قوڭىروۆ  (الماتى)، بەيبىت مۇسايەۆ (تالدىقورعان) پەن سىرىم مۇحامەتجانوۆ (قاراعاندى) ءىىى ورىندى مىسە تۇتتى.

قامشى-اقپارات