الماتىنىڭ بۇگىنگى اۋا رايىنا قاراپ، جەلتوقسان باستالىپ كەتتى مە دەپ قالاسىز. ايتايىن دەگەنىم باسقا ەدى... تاڭەرتەڭ اۆياكاسسالاردىڭ بىرىنە سوقتىم. كەزەكتە ەشكىم بولماعاندىقتان بيلەتىمدى الىپ، سىرتقا تەز شىقتىم. جالاڭباس جۇرگەندىكتەن تاڭعى سۋىقتىڭ “كايفىن” ۇستاعىم كەلمەي، اياعىمدى جىلدامىراق باستىم. شاپشاڭ ءجۇرىسىمدى قايتەيىن، قىرسىق قىلعاندا ماشينا ەسىگى اشىلماي قالدى. ءپۋلتتى ولاي ءبىر باسامىن، بۇلاي ءبىر باسامىن. اۆتوكولىك بىلق ەتەتىن ەمەس. قانشا مىقشىڭداسام دا قازاقشا بايانداما تىڭداعان اسقار مامين سياقتى بەدىرەيگەن كۇيىنەن اينىعان دا جوق. قايتادان ولاي ءبىر باسام، بۇلاي ءبىر باسام. ەسكى ماشينام ەلەڭ قىلاتىن ەمەس. ابىگەرى شىققان سەرىك احمەتوۆتى سىرتىنان باقىلاعان نۇرلان نىعماتۋلين سياقتى ءالى بەزەرىپ تۇر. قىرسىق قىلعاندا، باعدارشام تەجەگەن اۆتوبۋستىڭ ءدال قاسىما توقتاعانىن قايتەرسىڭ... ماڭدايىمنان تەر بۇرق ەتە قالدى. الگى اۆتوبۋس ىشىندەگى جولاۋشىلار دارمەنسىز قالپىمدى راحاتتانا باقىلاپ تۇرعانداي اسەر الدىم. مۇمكىن، ەشكىم قاراماعان دا شىعار؟ ابىگەرلەنگەندە ءبارى “قوس كورىنەدى” ەمەس پە؟ ءپۋلتتى قايتا قايتا باسىپ جاتىرمىن. ارا اراسىندا ماشيناعا ەشقانداي قاتىسى بولماسا دا كۋرستاستارىمدى، كلاستاستارىمدى سىباپ قويامىن. ايدالاداعى ۇكىمەتتىڭ ادرەسىنە دە ءبىراز بالاعات كەتتى. ءپۋلتتى تاعى دا باسامىن. جۇمىس ىستەپ تۇرعانىنىن انىق بىلسەم دە باتەرەياسىن قايتا قايتا تەكسەرىپ قويامىن. ماشينا بىلق ەتپەيدى. ەندى مەملەكەتتىك تىلدە جامان سوزدەردى توگىپ جاتىرمىن. ءبىر كىسىنىڭ ەكى ءتىلدى قاتار قولدانۋ تۋرالى ەسكەرتپەسى ەسىمى ءتۇسىپ، اراسىندا رەسمي تىلدە دە سىباپ قويامىن. رەاكسيا جوق. ەندى نە ىستەيمىن؟ تاڭعى سۋىقتا باسىمدى توڭدىرىپ تۇرام با، وسىلاي؟ ودان دا ماشينانى وسىندا تاستاپ، تاكسيلەتىپ ۇيگە بارايىن دەپ شەشتىم. ارى قاراي كەتىپ بارا جاتسام، و توبا، “بالاعاتتانۋعا ارمانسىز شومىلعان” ماشينام باسقا جەردە تۇر. سويتسەم، باعانالى بەرى (مەنىكىنەن اۋمايتىن) باسقا ماشيناعا “ءتيىسىپ” تۇرىپپىن. قانىم باسىما شاۋىپ ءجۇرىپ، ونىڭ نومىرىنە دە قاراماعانمىن عوي. سويتسەم، بارىنە ءوزىم كىنالى ەكەنمىن. ماشينامنىڭ ءپۋلتى بىرەسە ىستەپ، بىرەسە ىستەمەي تۇرعاندىقتان، ەسىگىن سيگناليزاسياعا قويماي، كىلتپەن جاۋىپ كەتكەن ەدىم. داۋىسىنان ايرىلعان "حوندا" بايعۇس الىستا تۇرىپ، قالاي بەلگى بەرسىن؟ باسقا ماشيناعا “قىرىنداعانىمدى” كورىپ، ىشتەي قىزعانعان دا شىعار؟ وبالى نە كەرەك، ەشتەڭە بىلدىرگەن جوق...