جاقىندا 5 جاستاعى قىز جوعالىپ كەتىپ، ول پەدوفيلدىڭ پاتەرىنەن تابىلعان. قاراعاندىلىق 50 جاستاعى ەر ادامدى قۇقىققورعاۋ ورگاندارى قىزمەتكەرلەرىنىڭ تەرگەۋى الەۋمەتتىك جەلىگە تارالىپ كەتتى.  ۆيدەودا ول 5 جاستاعى بالانى قالاي الداپ پاتەرەنى كىرگىزىپ، زورلاعانىن ايتىپ بەردى.

«مەن قىزدى كەزدەستىرىپ قالدىم. وعان كامپيت پەن شىرىن ساتىپ الىپ بەردىم. ولاردى ۇيدە ءىشىپ، جەۋدى ۇسىندىم. قىز كەلىستى» دەدى ۇستالعان ەر ادام.

 50 جاستاعى قاراعاندى تۇرعىنىنا قاتىستى قىلمىستىق ءىس قوزعالدى.

بۇل قازاقستاندا بالا زورلاۋ بويىنشا تىركەلگەن العاشقى دا، وكىنىشكە وراي سوڭعى قىلمىستىق ءىس ەمەس. الەم بويىنشا،  ءار 2 مينۋتتا ءبىر بالا زورلانادى. ال 18-گە تولماعان ءار ءۇشىنشى قىز جىنىستىق بوپسالاۋدىڭ قۇربانى بولادى. وسىنداي ستاتيستيكانى كورىپ تەك قازاقستاندا عانا ەمەس الەم بويىنشا جاعدايدىڭ مۇشكىل ەكەنىن بايقايمىز.

 مامانداردىڭ ايتۋىنشا، بەيكۇنا بالالارعا جىنىستىق قورلىق كورسەتەتىن ادامداردىڭ كوبى وزدەرى دە كىشكەنتاي كەزىندە زورلىقتى باستان وتكەرگەندەر.

كەيبىرىندە پسيحيكالىق اۋىتقۋشىلىق بولادى. دەپرەسسيادا ءجۇرىپ، رۋحاني دەرتىنەن ارىلا الماي جۇرگەندەر دە وسىنداي پاسىق قادامعا بارادى. پەدوفيلدەردىڭ اراسىندا گوموسەكسۋاليستەر دە وتە كوپ كەزدەسەدى ەكەن. ال پەدوفيل ايەلدەر قۇربان رەتىندە قىزدارعا قاراعاندا ۇلداردى كوپ تاڭدايدى.

ستاتيستيكا بويىنشا، بالالاردى زورلاعانداردىڭ 30% وتباسىنىڭ ءبىر مۇشەسى بولادى. ونىڭ ىشىندە وگەي  اكەسى، اتاسى، اعاسى جانە ت.ب.

ال 16% وتباسى مۇشەسى ەمەس. ءبىراق ءوز قۇربانىن جاقسى تانيدى. وتباسىمەن تىعىز ارالاسىپ، كوپ جىلدار بويى بالاعا قامقورلىق تانىتىپ، وتباسىنىڭ سەنىمىنە كىرگەندەر.

وندايلار ايلار بويى كەيدە جىلدى جىلعا سوعىپ بالا مەن ونىڭ اكە-شەشىسىنىڭ سەنىمىنە كىرۋ ءۇشىن ءوزىن تەك جاقسى قىرىنان كورسەتۋگە تىرىسادى. بالانى قىدىرتىپ، كيىم الىپ بەرىپ بالامەن جەكە قالۋ ءۇشىن ءتۇرلى ايلاعا بارادى. كوبى بالانىڭ وعان تولىق سەنىم ارتپاعانىنا كوزى جەتپەگەنشە ءوزىنىڭ ارام ارەكەتىن جاسامايدى.

پەدوفيلدەر جانىڭدا ءجۇر...

مامانداردىڭ ايتۋىنشا، پەدوفيلدەر ادەتتە ۇيىندە اتا-انا ماحابباتى مەن جىلۋلىعىن جەتكىلىكتى دەڭگەيدە كورە الماي جۇرگەن، ەموسيونالدى قولداۋعا ءزارۋ بالالاردى تاڭدايدى.

ال كەيبىرى نازارىن تولىق ەمەس وتباسىنا اۋدارادى. سەبەبى وندا كوبىنە  بالاعا دەگەن تولىق باقىلاۋ بولمايدى. پەدوفيلدەر اناسى نەمەسە اكەسى جۇمىس ىستەپ جاتقان ۋاقىتتا بالاسىنا قارايتىنىن ايتىپ، قامقور ادام رەتىندە كورىنگىسى كەلەدى.  

سونداي جاقىن تانىستاردىڭ نەمەسە وتباسى مۇشەسىنىڭ بالانى قورقىتىپ، ۇركىتىپ بىرنەشە ۋاقىت بويى ونى زورلاپ جۇرگەن جاعدايلار دا  ءجيى بولىپ تۇرادى. بالالار پسيحولوگى وكسانا چولاك مۇنداي كەزدە بالانىڭ زورلىق كورىپ جۇرگەنىن انىقتاۋ ءۇشىن بالانىڭ ويىنىنا ءجىتى ءمان بەرۋگە كەڭەس بەرەدى.

«كىشكەنتاي بالالار باستان وتكەرگەنىن، ءىس جۇزىندە باسقا ادامدارعا نەمەسە ويناعاندا ويىنشىقتارعا قايتالايدى. ونىڭ بويىندا اگرەسسيا، شامادان تىس قورقىنىش پايدا بولسا دابىل قاعۋ كەرەك» دەيدى وكسانا چولاك.  

پسيحولوگ پەدوفيلدەردىڭ كوپتەگەن قۇيتىرقى ايلانى پايدالاناتىنىن ايتادى. ماسەلەن، قۇپيا ساقتاۋ ويىنى. سەبەبى بالا تابيعاتىنان  قۇپيا ايتۋدى، تىڭداۋدى جاقسى كورەدى. قۇپيا - ەرەسەكتىك ومىرگە ءبىر تابان جاقىنداتقانداي كورىنەدى ولارعا. سوندىقتان قۇپيا ايمالاسۋ، ماحاببات ويىنى، ءسۇيىسۋ جانە ت.ب ايلانى ويلاپ تاۋىپ ونى ەكەۋىمىزدىڭ قۇپيامىز دەپ ابدەن ساناسىنا سىڭىرەدى.

ماماندار مۇنداي كەزدە بالامەن ەموسيونالدى تۇردە بارىنشا جاقىن بولۋعا كەڭەس بەرەدى. ول سىزدەن ەشتەڭەنى جاسىرماي، بارلىعىن اشىق ايتىپ بەرە الاتىنداي سەنىمدى قارىم-قاتىناس ورناتۋ قاجەت.

بالاڭىزعا بىرەۋ ءوز اتا-اناسىنان قۇپيا ساقتاپ، ايتپاۋى كەرەك ەكەنىن وتىنسە، ياعني ول ادامنىڭ جامان ەكەنىن جانە ول مۇنى اتا-انا ۇرىساتىندىقتان جاسىرۋىن سۇراپ وتىرعان جوق ەكەنىن ءتۇسىندىرىڭىز.

بالاڭىزبەن كوپ ۋاقىت وتكىزۋگە تىرىسىڭىز.

ونىڭ بوس ۋاقىتتا نەمەن ايلانىساتىنىن ۇنەمى سۇراستىرىپ وتىرىڭىز.

ال مەكتەپ جاسىنا دەيىنگى بالالارعا بەيتانىس ادامدارمەن قالاي سويلەسىپ، ولاردان قانداي ءقاۋىپ كەلۋ مۇمكىن ەكەنىن ەرتەگى تۇرىندە جەتكىزۋ قاجەت.

«كەز كەلگەن اتا-انا قايعىنىڭ الدىن العىسى كەلەتىندىگى ورىندى. سوندىقتان، وقىس وقيعالار كەزىندە ونىڭ ءوزىن قالاي ۇستاپ، قانداي ارەكەت جاساۋ قاجەتتىگىن ەرتەگى ارقىلى ءتۇسىندىرۋ كەرەك. ماسەلەن، كىشكەنتاي قويانعا بەلگىسىز ايۋ جاقىنداعاندا، ول دەرەۋ قاشىپ كەتتى. سەبەبى، ونىڭ اناسى وعان تانىمايتىن جاندارمەن مۇلدە سويلەسپەۋدى ۇيرەتتى دەگەن سەكىلدى. بالا ءوزىن سول قوياننىڭ كەيپىندە سەزىنەدى. بۇل ونىڭ الەمگە دەگەن كىرشىكسىز كوزقاراسىن كىرلەتپەۋگە  جانە پسيحيكاسىنا زاقىم كەلتىرمەۋ ءۇشىن قاجەت.  ال قيىن جاعدايعا تاپ بولعاندا، باستان وتكەرگەنى تۋرالى ەستە قالعان ءساتتى باسقا جارقىن ىستەرمەن الماستىرۋعا تىرىسۋ كەرەك. ءبىراق، وكىنىشكە وراي بالا ەشقاشان بۇرىڭعىداي بولا المايدى» دەيدى بالالار پسيحولوگى وكسانا چولاك.

پەدوفيلدى قالاي تانۋعا بولادى؟

ەرەسەك ادام تۇگىلى كىشكەنتاي بالالارعا سەكسۋالدى نەگىزدە زورلىق كورسەتۋشىلەر كوبەيگەن زاماندا بالاعا ساق بولۋ كەرەك ەكەنى انىق. قاۋىپسىزدىك شارالارىن قولدانۋ كەرەك. كۇندەلىكتى ارالاسىپ-قۇرالاسىپ جۇرگەن كورشىڭ نەمەسە ۇيگە كەلىپ جۇرگەن جاقىنىڭ سونداي ارەكەتكە بارۋى مۇمكىن بولسا، جاعداي تىپتەن ناشار. بالانى سىرتقى ءقاۋىپتى فاكتورلار مەن ادامداردان قورعاۋ ءۇشىن پەدوفيلدى ونىڭ پەدوفيل ەكەنىن انىقتاي الۋ كەرەك. مۇنىڭ وڭايعا سوقپايتىنى انىق. سەبەبى پەدوفيلدەر باسقا ادامدار سەكىلدى كۇلەدى، قالجىڭداسادى، جۇمىس ىستەيدى، وقيدى ت.ب. دەسەك تە، پسيحولوگتار ولاردى انىقتاۋدىڭ باستى قاعيدالارى بار ەكەنىن ايتادى.

ولار:

پەدوفيلدەر ەرەسەكتەرگە ونشا ءمان بەرمەسە دە، كىشكەنتاي بالالارعا ەرەكشە قىزىعۋشىلىق تانىتادى. ولار بالالاردى ۇلكەن ادام سەكىلدى قابىلدايدى. ماسەلەن، ءسىز ەرەسەك ادامعا قانداي قارىم-قاتىناس جاساساڭىز ولار دا بالالارمەن سولاي سويلەسۋى مۇمكىن.

پەدوفيلدەر ادەتتە بارلىق بالانى جاقسى كورەتىنىن جانە وزدەرىن ءالى كۇنگە دەيىن بالا سەكىلدى سەزىنەتىندەرىن ايتادى.

پەدوفيل تەك ەگدە جاستاعى ادام ەمەس، 20-دان ءسال عانا اسقان جاپ-جاس جىگىتتە، ايەل دە بولۋى مۇمكىن. سوڭعىسى كوپ كەزدەسە بەرمەيدى.

ساقتىق شارالارى

ماماندار بالانى جاقىن تانىس ەمەس ادامدارمەن تاستاماۋعا كەڭەس بەرەدى. ءتىپتى تۋىس اعايىندىلاردىڭ ءوزىن بالامەن جەكە قالدىرماۋ كەرەكتىگىن ايتادى. سەبەبى قازىرگى زاماندا  ولاردان دا ءقاۋىپ ءتونۋى مۇمكىن.

بالا كۇتۋشىنى جالداساڭىز مىندەتتى تۇردە جاسىرىن كامەرا ورناتىڭىز.

بالاڭىزدى عالامتوردا كىممەن سويلەسىپ جۇرگەنىن قاتاڭ باقىلاۋدا ۇستاڭىز. بالاڭىزدىڭ جەلىدە وتىرعان ۋاقىتى مەن  سايتتارىن قاراڭىز. سەبەبى پەدوفيلدەر بالانى الەۋمەتتىك جەلى ارقىلى دا تابۋى مۇمكىن.

بالاڭىزعا وزگە ادامدار ونىڭ ۇياتتى جەرلەرىن ۇستاۋعا بولمايتىنىن جانە ونداي جاعداي بولا قالسا ايقايلاپ، قاشۋ كەرەكتىگىن ۇيرەتىپ قويىڭىز.

بالالارعا اۋەستىگى بار ادامدار تۋرالى ءجيى ەستيتىنىمىز وتە وكىنىشتى. پەدوفيليا سەكىلدى اۋىر ناۋقاسقا ۇشىراعان ادامداردىڭ ارەكەتى كۇن ساناپ ارتىپ كەلەدى. بۇل تۇستا تەك قۇزىرلى ورگاندارعا سۇيەنىپ قانا قويماي، ءاربىر ادام بەيتانىس بالاعا قامقورلىق تانىتىپ، ونىڭ جانىندا كەتىپ بارا جاتقان ادامعا ءجىتى ءمان بەرسە. بەيكۇنا، ەشقانداي ارامدىعى مەن جامان ويى جوق بالا كەز كەلگەن ادامعا يلاناتىنى انىق قوي. ونىڭ ءتۇرلى-تۇستى الەمىن قارا كۇيەمەن بىلعاماۋ ءاربىر ەرەسەكتىڭ مىندەتى. پەرىشتەدەي پاك بالانىڭ پسيحيكاسىن بۇزىپ، كوڭىلىنە قاياۋ ءتۇسىرۋ ارقىلى تۇتاس ەلدىڭ بولاشاعىنا بالتا شابامىز. بۋىنى قاتپاعان، ءومىردى ەندى تانىپ كەلە جاتقان بالانى امان-ەسەن ۇلكەن ومىرگە قادام باستىرۋ ءبىزدىڭ، ۇلكەندەردىڭ مىندەتى.

اسەم المۇحانبەت