قازاقستاندا ازاماتتارعا ءدىني ماسەلەلەر بويىنشا ونلاين-كەڭەس بەرەتىن «قاۋىرت جەلى 114» - www.114.kz سايتى ىسكە قوسىلدى دەپ حابارلايدى Qamshy.kz اقپارات اگەنتتىگى.

«قاۋىرت جەلى 114» ءدىن ىستەرى جانە ازاماتتىق قوعام مينيسترلىگىنىڭ قولداۋىمەن دىندەردى زەرتتەۋ ورتالىعى قاۋىمداستىعىمەن بىرلەسىپ جۇزەگە اسىرىلۋدا. جوبا ازاماتتارعا ءدىني ماسەلەلەر بويىنشا كاسىبي جانە ۋاقىتىلى كومەك كورسەتە الادى.

ماماندار تەلەفون ارقىلى جانە سايتتىڭ ونلاين رەجيمىندە تۇرعىنداردىڭ دىنگە قاتىستى ساۋالدارىنا جاۋاپ بەرىپ، دەسترۋكتيۆتىك ءدىني اعىمداردان زارداپ شەككەندەرگە پسيحولوگيالىق قولداۋ كورسەتەدى. كونسۋلتاسيالىق كەڭەس قازاق جانە ورىس تىلدەرىندە جۇرەدى.

«قاۋىرت جەلى 114» سايتىندا مەملەكەتتىك ءدىني ساياسات بويىنشا وزەكتى اقپاراتتار، ءدىني قاتىناستارعا ارنالعان ماقالالار مەن سۇحباتتار، ساراپشىلار پىكىرلەرى جاريالانعان.

«قاۋىرت جەلى 114» - قازاقستاندا عانا ەمەس، تمد كەڭىستىگىندە جۇزەگە اسىرىلىپ وتىرعان بىرەگەي باستاما سانالادى.

ايتا كەتەيىك، سوڭعى ءۇش ايدا (2017 جىلعى 1 ءساۋىر مەن 31 ماۋسىم ارالىعىندا) «قاۋىرت جەلى 114» ماماندارىنا ازاماتتاردان 144 ءوتىنىش كەلىپ ءتۇستى. ەڭ كوپ وتىنىشتەر مەن شاعىمدار قاراعاندى، الماتى، وڭتۇستىك قازاقستان جانە اقتوبە وبلىستارىنان كەلىپ تۇسكەن.

ماماندار حابارلاسقان ازاماتتار ىشىندە يسلام ماسەلەلەرىنە قاتىستى ساۋالداردىڭ ەكى ەسەگە وسكەنىن ايتىپ وتىر. كوپشىلىگى حيدجاب جانە ورامال تاعۋ، ناماز وقۋ، ورازا ۇستاۋ جانە يسلامداعى اجىراسۋ ماسەلەلەرى بويىنشا اقپارات بىلگىسى كەلەدى.

ەسكە سالا كەتەيىك، كەڭەس بەرۋ تەگىن ءارى قۇپيا تۇردە جۇرەدى. قوڭىراۋلار قالالىق تەلەفونىنان «114» نومەرىن تەرۋ ارقىلى قابىلدانادى. وعان قوسىمشا قوڭىراۋلار مەن حابارلامالار WhatsApp نومەرى ارقىلى: +7 777 0000 114، سونداي-اق، www.114.kz. سايتىندا ونلاين تۇردە قابىلدانادى.