ءدىن ىستەرى جانە ازاماتتىق قوعام مينيسترلىگىندە مىسىرداعى قازاقستاندىقتاردىڭ قاتىسۋىمەن بولعان جاعداي تۋرالى پىكىر ايتىلدى، دەپ جازادى Qamshy.kz اقپارات اگەنتتىگى. 

ءدىن ىستەرى جانە ازاماتتىق قوعام مينيسترلىگى مىسىرعا ءتىل كۋرسىنا وقۋعا بارعان التى قازاقستاندىق ستۋدەنتتىڭ قاتىسۋىمەن بولعان جاعداي تۋرالى پىكىر ءبىلدىردى.

ق ر ءدىن ىستەرى جانە ازاماتتىق قوعام ءمينيسترىنىڭ كەڭەسشىسى باقىتجان قۇلەكەيەۆتىڭ ايتۋىنشا، كاير قالاسىنداعى تىلدىك كۋرستارىندا وقيتىن قازاقستاندىق التى تىڭداۋشى مىسىردىڭ قۇقىق قورعاۋ وراگاندارىنىڭ قىزمەتكەرلەرىمەن ۇستالىپ، سول مەملەكەتتە ەكەندىگى انىقتالدى.

ۆەدومستۆو وكىلدەرى اتالعان وقيعا وڭ شەشىلىپ، ازاماتتارىمىز ەلگە امان-ەسەن ورالاتىندىعىنا ۇمىتتەنەتىنىن جەتكىزدى.

«وسى وقىعا بايلانىستى ءدىن ىستەرى جانە ازاماتتىق قوعام ءمينيسترى ن. ەرمەكبايەۆ شەتەلدىك وقۋ ورىندارىنا جاستارىمىزدىڭ باقىلاۋسىز شىعىپ كەتۋ ماسەلەسىن بىرنەشە رەت كوتەرگەن بولاتىن»، - دەپ اتاپ ءوتتى ءمينيستردىڭ كەڭەسشىسى.

جاستارىمىز، شەتەلگە ءدىني ءبىلىم الۋ ماقساتىندا شىعىپ، راديكالدى ءدىني اعىمدار يدەولوگتارىنىڭ ىقپالىنا تۇسەدى. بۇل قازاقستاندىقتاردىڭ شەتەلدەگى ءدىني وقۋ ورىندارىنا بارۋىنىڭ رەتتەلمەگەن تاجىريبەسىنىڭ سالدارى بولىپ تابىلادى. بۇگىنگى تاڭدا 300-گە جۋىق ازاماتتارىمىز شەتەلدە وسىنداي جاعدايدا ءبىلىم الۋدا. ولار كوبىنەسە ەگيپەت پەن ساۋد ارابياسىندا ءبىلىم الادى. اتالعان ازاماتتاردىڭ ءبىر بولىگى ءتۇسىندىرۋ جۇمىستارىننىڭ ناتيجەسىندە ەلگە ورالدى.

«اتالعان مەملەكەتتەردە احۋال بۇگىنگى تاڭدا كۇردەلى ەكەندىگىن ءتۇسىنۋ قاجەت. ول جاقتا تەرروريزمگە قارسى جانە جالپى كوشى-قون ءتارتىبى كۇشەيتىلدى. وسىعان بايلانىستى، ەگەر راديكالدى اعىمداردىڭ جاقتاۋشىسى بولماساڭىز دا، ماركاز دەپ اتالاتىن كۇماندى وقۋ ورتالىقتارىندا، ءدىني نەمەسە تىلدىك كۋرستارىندا وقيتىن بولساڭىز، جەرگىلىكتى ارنايى ورگاندار مەن پوليسيانىڭ نازارىنا دەرەۋ ىلىگەسىز»، - دەپ باسا ايتتى ب. قۇلەكەيەۆ.

وسىعان بايلانىستى، مينيسترلىك وسىنداي جاستاردىڭ اتا-انالارىنا بالالارىن وسىناۋ وقۋ ورىندارىنا جىبەرمەس بۇرىن ماسەلەنىڭ دۇرىستىعىن مۇقيات ويلاستىرىپ، بارلىعىن اقىلعا سالۋعا كەڭەس بەرەدى.

باقىجان قۇلەكەيەۆ ءوزىمىزدىڭ وقۋ ورىندارىمىز بار ەكەنىن ەسكەرتتى. مىسالعا، الماتىداعى «نۇر-مۇباراك» ۋنيۆەرسيتەتى مەن ەلىمىزدەگى مەدرەسەلەردىڭ جۇيەسى بار. «سونداي-اق، نەلىكتەن ءتيىستى ماماندىق الىپ، بولاشاقتا تابىس كوزدەرىن تابا الاتىن باسقا دا ءبىلىم الۋدى ويلاماسقا»، - دەيدى ءمينيستردىڭ كەڭەسشىسى.

قازاقستان مۇسىلماندار ءدىني باسقارماسى بۇدان بىلاي شەتەلدە كەلىسىمسىز ءبىلىم الىپ كەلگەن تۇلعالاردى جۇمىسقا قابىلدامايتىنىن جاريالادى.

قازىرگى ۋاقىتتا ءدىني قىزمەت تۋرالى زاڭناما جوباسىن ازىرلەنۋدە. وسى جۇمىس شەڭبەرىندە، شەتەلدە تەولوگيالىق ءبىلىم الۋمەن بايلانىستى قوعامدىق قاتىناستاردى رەتتەيتىن نورمانى ۇسىنىلاتىن بولادى.

«بىرنەشە نۇسقالار بار. ءبىز ولاردى باسقا ۆەدومستۆولاردىڭ ساراپشىلارىمەن تالقىلاۋ ۇستىندەمىز. ولاردىڭ ءبىرى قازاقستاندا باكالاۆريات دەڭگەيىندە جوعارعى ءدىني ءبىلىم العاننان كەيىن جانە تىركەلگەن ءدىني بىرلەستىكتەردىڭ جولدامالارى بويىنشا عانا شەتەل مەملەكەتتەرىندە رۋحاني (ءدىني) ءبىلىم الۋدى قاراستىرادى. ماگيستراتۋرا جانە دوكتورانتۋرا دەڭگەيى بويىنشا ءبىلىم الۋعا شەكتەۋلەر قاراستىرىلمايدى. ەگەر ءدىني بىرلەستىكتە قازاقستان اۋماعىندا ءتيىستى ءبىلىم بەرەتىن مەكەمەسى بولماعان جاعدايدا عانا وقىتۋ قاراستىرىلۋى مۇمكىن.

اتالعان نورما بويىنشا قويىلاتىن شەتەلگە شىعۋعا شەكتەۋ ازاماتتاردىڭ ءبىلىم الۋداعى باستى قۇقىقتارىن بۇزبايدى.