الەم كوز تىككەن استاناداعى دۇنيەجۇزىلىك ەكسپو-2017 كورمەسى قىزا تۇسكەن بۇل كۇندەرى بۇۇ-نىڭ «اكادەميالىق ىقپال» باعدارلاماسىنىڭ تۇراقتى دامۋى بويىنشا جاھاندىق حابى بولىپ تابىلاتىن ءال-فارابي اتىنداعى قازۇۋ-دا جاڭا جىبەك جولى ۋنيۆەرسيتەتتەرى اليانسىمەن بىرگە ۇيىمداستىرىلعان «Future Life، Future Leaders» اتتى حالىقارالىق جاستار فورۋمى ءوتتى. بولاشاقتىڭ ەنەرگياسى تاقىرىبىن ارقاۋ ەتكەن اۋقىمدى شاراعا جۇڭگو، ۇلىبريتانيا، تۇركيا، ەگيپەت جانە تمد ەلدەرىنىڭ جۇزدەن استام ستۋدەنتتەرى قاتىستى، دەپ حابارلايدى Qamshy.kz اقپارات اگەنتتىگى قازۇۋ-دىڭ باسپا ءسوز قىزمەتىنە سىلتەمە جاساي وتىرىپ.

جاستارمەن قاتار الماتىعا شەتەلدىك جوعارى وقۋ ورىندارىنىڭ باسشىلارى ات باسىن بۇردى. مارتەبەلى مەيماندار قازۇۋ-دا العاش رەت وتكەن جاڭا جىبەك جولى ۋنيۆەرسيتەتتەرى ءاليانسىنىڭ اتقارۋشى كوميتەتىنىڭ (UASR) كەزەكتى وتىرىسىندا باس قوستى. بۇل – شەتەلدىك ارىپتەستەردىڭ ءال-فارابي اتىنداعى قازۇۋ-عا ارتقان ۇلكەن سەنىمىنىڭ دالەلى. كۇن تارتىبىنە جاڭا جىبەك جولىن جاڭعىرتۋداعى ۋنيۆەرسيتەتتەر جۇرگىزگەن جۇمىستاردىڭ ناتيجەلەرى، ءبىلىم بەرۋ، عىلىم جانە يننوۆاسيا سالاسىنداعى ىنتىماقتاستىقتى تەرەڭدەتۋگە باعىتتالعان جوبالار شىعارىلدى.

ءال-فارابي اتىنداعى قازۇۋ رەكتورى عالىمقايىر مۇتانوۆ العى سوزىندە حالىقارالىق دەڭگەيدەگى اتالمىش شارالاردىڭ ماڭىزدىلىعىنا توقتالدى. «ءبىز زامان تالابىنا ساي ناقتى جوبالاردى قۇرۋعا مۇددەلىمىز. ق ر پرەزيدەنتى نۇرسۇلتان نازاربايەۆ پەن قحر ءتوراعاسى سي ءسزينپيننىڭ ءوزارا كەلىسىمى ناتيجەسىندە جۇڭگو ۇكىمەتىنىڭ گرانتى بويىنشا قازۇۋ-عا سۋپەركومپيۋتەر بەرىلىپ وتىر. ونىڭ نەگىزىندە ءبىز جاڭا جىبەك جولى ۋنيۆەرسيتەتتەرى ءاليانسىنىڭ حالىقارالىق IT-تەحنوپاركىن قۇرۋ جۇمىسىن باستاپ كەتتىك. بۇل ۋنيۆەرسيتەتتەر اليانسىنە كىرەتىن 130-دان استام جوو-عا ونلاين ءبىلىم بەرۋ، ءىرى بىرلەسكەن يننوۆاسيالىق جوبالاردى جۇزەگە اسىرۋعا زور مۇمكىندىكتەر بەرمەك»، – دەدى رەكتور.

جيىنعا قاتىسقان شەتەلدىك ارىپتەستەر قازۇۋ باستاماسىنا ۇلكەن قىزىعۋشىلىق تانىتىپ، قولداۋ ءبىلدىردى. ليۆەرپۋل ۋنيۆەرسيتەتىنىڭ پرورەكتورى دايانا بەرچ: «حالىقارالىق IT-تەحنوپاركىن قۇرۋ – اسا ءىرى ءارى اۋقىمدى جوبا. بۇل ءبىلىم مەن عىلىم سالاسىنداعى مەملەكەتارالىق ىنتىماقتاستىقتى جاڭا ساپالى دەڭگەيگە كوتەرەتىن بولادى. ليۆەرپۋل ۋنيۆەرسيتەتى الەمنىڭ ءتۇرلى ۋنيۆەرسيتەتتەرىمەن، ونىڭ ىشىندە ءال-فارابي اتىنداعى قازۇۋ-مەن بىرلەسىپ جۇمىس ىستەۋگە مۇددەلى»، – دەي كەلە، ۇلتتىق ۋنيۆەرسيتەتتىڭ جوعارى عىلىمي-يننوۆاسيالىق الەۋەتىن اتاپ ءوتتى. ال قحر-دىڭ الماتىداعى باس كونسۋلدىعىنىڭ مادەنيەت پەن ءبىلىم جونىندەگى اتتاشەسى ۆان سين پين باستامانىڭ جاڭا جىبەك جولى ەكونومي­كالىق بەلدەۋىن قۇرۋ ءجو­نىندەگى مەملەكەتارالىق اۋقىمدى جوبانى جۇزەگە اسىرۋعا ءوز ىقپالىن تيگىزەتىنىن ايتتى.  

سونداي-اق وتاندىق جانە شەتەلدىك جوعارى وقۋ ورىندارىنىڭ باسشىلارى حالىقارالىق جاستار فورۋمىنا قاتىسقان ستۋدەنت-جاستاردىڭ يننوۆاسيالىق زەرتتەۋ جۇمىستارىنا باعا بەردى. گونكونگ پوليتەحنيكالىق ۋنيۆەرسيتەتىنىڭ ۆيسە-پرەزيدەنتى انگەلينا يۋن: «ستۋدەنتتەر ءوز جۇمىستارىن تانىستىرۋ بارىسىندا قۋات كوزدەرىن ساقتاۋ جانە تۇراقتى دامۋ ءۇشىن قانداي جاسىل تەحنولوگيالار قولدانۋعا بولاتىندىعى جايلى ايتتى. جاستار بولاشاق كوشباسشىلار رەتىندە، ەڭ الدىمەن، بۇقارا حالىقتى، ونىڭ ىشىندە جاستاردى قۋات كوزدەرىن ۇنەمدەۋگە ۇيرەتۋ ماڭىزدى دەپ سانايدى. ءبىز قۋات كوزدەرىن ساقتاي بىلەتىن ءارى جاڭارتىلاتىن ەنەرگيانى ءوندىرۋدى مەڭگەرگەن كوشباسشىلاردى تاربيەلەپ شىعارۋىمىز كەرەك»، – دەپ، شارانىڭ ستۋدەنت-جاستاردىڭ ءوزارا تاجىريبە الماسۋ، مادەنيەتارالىق ديالوگ پەن تىلدىك بايلانىستى ارتتىرۋداعى باسىمدىقتارىن تىلگە تيەك ەتتى. 

جاھاندانۋ ءداۋىرىنىڭ جاستارى اشىق پىكىرتالاس الاڭىندا جاسىل ەنەرگيا سالاسىنداعى ءوز يدەيالارىمەن بولىسە وتىرىپ، ايماقتاعى جاستار اراسىنداعى ىنتىماقتاستىق پەن بىرلەستىكتىڭ مۇمكىندىكتەرىن، الەۋمەتتىك يننوۆاسيالار ارقىلى تۇراقتى قوعام قالىپتاستىرۋدىڭ ماسەلەلەرىن تالقىلادى. ءتۇرلى ايماقتاردان كەلگەن جاستار 5 قالا – استانا، الماتى، پەكين، گونكونگ پەن سياندا جاسىل تەحنولوگيا قۇرۋ يدەياسىن ۇسىندى. فورۋمعا قاتىسقان ءال-فارابي اتىنداعى قازۇۋ-دىڭ فيلوسوفيا جانە ساياساتتانۋ فاكۋلتەتىنىڭ 1-كۋرس ستۋدەنتى ەرلان شايحىعالي: «بارلىق ستۋدەنتتەر ءوز قالاسىن دامىتۋعا ارنالعان تۇراقتى دامۋ يدەياسىنا نەگىزدەلگەن جوبالارىن ورتاعا سالدى. مەن ارىپتەسىممەن بىرگە سۇيىكتى قالامىز الماتىدا تۇراقتى قوعامدىق كولىك جۇيەسىن دامىتۋعا ارنالعان جوبانى تانىستىردىم. ءبىزدىڭ جوبامىز قوقىستان الىناتىن بيوەتونول گازىن شىعارۋ جانە ونىمەن جۇرەتىن قوعامدىق كولىكتەردى ەنگىزۋدى كوزدەيدى»، – دەيدى. ءوز كەزەگىندە گونكونگ پوليتەحنيكالىق ۋنيۆەرسيتەتىنىڭ ستۋدەنتى حارمەني چانگ قازۇۋ قالاشىعىنان العان اسەرىمەن ءبولىستى. «قالاشىق وتە ۇلكەن ءارى جاپ-جاسىل ەكەن. ماعان قاتتى ۇنادى. ءبىز قازۇۋ تەحنوپاركىندە جۇزەگە اسىرىلىپ جاتقان ستۋدەنتتەردىڭ جاسىل تەحنولوگيا بويىنشا جوبالارىنا كۋا بولدىق. ستۋدەنتتەردىڭ جۇمىستارى بىزگە ەرەكشە شابىت سىيلادى. بۇل شارا مەن ءۇشىن ۇلكەن تاجىريبە مەكتەبىنە اينالدى. مەن ەندى ءوز ءبىلىمىم مەن كۇش-جىگەرىمدى بولاشاقتا قالاي قولدانۋدى بىلەمىن»، – دەدى ول.

ايتا كەتەرلىگى، اتالمىش شارالار قارساڭىندا قازۇۋ-دا ەكسپو-2017 حالىقارالىق كورمەسىن قولداۋ ماقساتىندا جاڭا جىبەك جولى ۋنيۆەرسيتەتتەرى اليانسىمەن بىرلەسىپ ۇيىمداستىرىلعان «جاسىل تەحنولوگيالار: قازاقستان مەن ورتالىق ازيا ۇلى جىبەك جولى بويىندا» اتتى حالىقارالىق جازعى مەكتەبى اشىلعان بولاتىن. شىلدە ايىندا گونكونگ پوليتەحنيكالىق ۋنيۆەرسيتەتىنەن باستاۋ العان جازعى مەكتەپ قازاقستانداعى جەتەكشى جوو-دا ءوز جۇمىسىن جالعاستىردى.

مۇنداي كەڭ اۋقىمدى حالىقارالىق جازعى مەكتەپ شاراسى قازاقستان ءبىلىم بەرۋ سالاسىندا تۇڭعىش رەت وتكىزىلدى. ەۋروپا مەن ازيا جوو-لارىندا وقيتىن جۇزدەگەن ستۋدەنتتەر مەن ماگيسترانتتار جازعى مەكتەپ كۋرستارىنا قاتىسۋعا نيەت ءبىلدىردى. دارىستەر مەن پىكىرتالاستاردى ءال-فارابي اتىنداعى قازۇۋ-دىڭ ۇزدىك پروفەسسورلارى مەن شەتەلدىك جەتەكشى ماماندار جۇرگىزدى. ستۋدەنتتەر جازعى مەكتەپ اياسىندا قازۇۋ مەن كولۋمبيا ۋنيۆەرسيتەتى بىرىگىپ ۇسىنعان «MDP Global Classroom» باعدارلاماسىنىڭ ۇيىمداستىرۋشىلارى وتكىزگەن «بۇۇ ۇلگىسى – جاڭا جىبەك جولى» اتتى كونفەرەنسياعا قاتىستى.

شارا بارىسىندا شەتەلدىك جوو باسشىلارى مەن ستۋدەنتتەرى استانادا ءوتىپ جاتقان ەكسپو-2017 كورمەسىن تاماشالاۋ مۇمكىندىگىنە يە بولدى.