ورتالىق كوممۋنيكاسيالار قىزمەتىندە حالىقارالىق گەپاتيتپەن كۇرەس كۇنىنىڭ اياسىندا جۇرگىزىلىپ وتىرعان قازاقستان مەن الەمدەگى گەپاتيت ماسەلەسىنە ارنالعان باسپا ءسوز كونفەرەنسيا ءوتتى دەپ حابارلايدى Qamshy.kz اقپارات اگەنتتىگى. كونفەرەنسياعا ق ر دەنساۋلىق ساقتاۋ مينيسترلىگى مەديسينالىق كومەكتى ۇيىمداستىرۋ دەپارتامەنتىنىڭ الەۋمەتتىك ماڭىزدى اۋرۋلار كەزىندە مەديسينالىق كومەك كورسەتۋ باسقارماسى باسشىسى گۇلنار سارسەنبايەۆا، ۇوتعو پروفەسسورى، مەديسينا عىلىمدارىنىڭ دوكتورى، باۋىردى زەرتتەۋ بويىنشا ەۋروپالىق قاۋىمداستىقتىڭ مۇشەسى، “International HepatoTransplantGroup” قاۋىمداستىعىنىڭ پرەزيدەنتى كۇلپاش قالياسقاروۆا، ۇلتتىق ونكولوگيا مەن ترانسپلانتولوگيا عىلىمي ورتالىعىنىڭ گەپاتولوگيا جانە گاستروەنتەرولوگيا ءبولىمىنىڭ مەڭگەرۋشىسى، م.ع.ك قاحارمان ەسمەمبەتوۆ، "AGEP'C" قف ديرەكتورى سەرگەي بيريۋكوۆ قاتىستى.
جىل سايىن 28 شىلدەدە الەمنىڭ كوپتەگەن ەلدەرى گەپاتيتپەن كۇرەس كۇنىن اتاپ وتەدى (World Hepatitis Day). بۇل كۇن ۆ گەپاتيتىنىڭ ۆيرۋسىن اشقانى ءۇشىن نوبەل سىيلىعىنىڭ لاۋرەاتى بولعان امەريكالىق دارىگەر بارۋح بلامبەرگتىڭ تۋعان كۇنى. ەڭ العاش بۇل كۇن حالىقارالىق گەپاتيتكە قارسى اليانستىڭ قولداۋىمەن 2008 جىلى اتاپ ءوتىلدى. 2011 جىلى بۇكىلالەمدىك دەنساۋلىق ساقتاۋ ۇيىمى (ددۇ) وسى كۇندى ءوز كۇنتىزبەسىنە ەنگىزىپ، حالىقارالىق گەپاتيتپەن كۇرەس كۇنى رەسمي دارەجەگە يە بولدى. ددۇ اتالمىش كۇندە الەم دارىگەرلەرىن حالىق اراسىندا اعارتۋ جۇمىستارىن جۇرگىزىپ، گەپاتيت تۋرالى جانە ونىڭ اسقىنۋىنان بولاتىن اۋرۋلار تۋرالى ايتۋعا شاقىرادى. سەبەبى الدىن الۋ شارالارىنىڭ، ونىڭ ىشىندە دياگنوستيكالىق تەكسەرۋلەر مەن گەپاتيتكە قارسى ەكپەلەردىڭ ماڭىزى زور.
ۆيرۋستى گەپاتيتتەر ادام دەنساۋلىعىنا اسەر ەتەتىن نەگىزگى قاۋىپ-قاتەر فاكتورلارىنىڭ ءبىرى بولىپ سانالادى. دۇۇ مالىمەتتەرى بويىنشا، گەپاتيت ۆيرۋسى الەمدە 2 ميللياردقا جۋىق ادامعا جۇققان. بۇل عالامشاردىڭ ءاربىر ءۇشىنشى تۇرعىنى. ادامدارعا الدىن-الۋ ءىس-شارالارى جايلى ايتىپ، اقپاراتتىق ماتەريالدار تاراتىپ جانە كۇماندى ىس-ارەكەتتەن اۋلاق بولۋعا شاقىرامىز.
سوندىقتان حالىقارالىق گەپاتيتپەن كۇرەس كۇنى ەڭ الدىمەن قالىڭ جۇرتشىلىق پەن مامانداردىڭ نازارىن وسى ماسەلەگە اۋدارۋعا، ءاربىر ەلدىڭ ازاماتىن گەپاتيتتىڭ الدىن-الۋ شارالارىن جاساتۋعا شاقىرۋعا باعىتتالعان.
پىكىر قالدىرۋ