فين عالىمدارى اۋادان الىناتىن سۋ مەن كومىرقىشقىلدان جەۋگە جارامدى اقۋىز تۇيىرشىكتەرىن جاساپ شىعاراتىن قۇرىلعى ويلاپ تاپتى. بۇل تۋرالى Qamshy.kz پورتالى Stan.kz سايتىنا سىلتەمە جاساپ حابارلايدى.

ونەرتاپقىشتاردىڭ پىكىرىنشە، اتالعان قۇرىلعى جەر بەتىندە اشتىقتىڭ الدىن الادى.

«تاجىريبەلىك تۇرعىدان قارايتىن بولساق، اقۋىزدى تاعامنىڭ بۇل ءتۇرىن جاساۋعا قاجەتتى زاتتىڭ بارلىعى اۋانىڭ قۇرامىندا بار. بولاشاقتا وسى تەحنولوگيانىڭ نەگىزىندە جاسالعان قۇرىلعىلاردى ءشول دالاعا نەمەسە اشتىق بولۋ ءقاۋپى بار جەردىڭ باسقا دا ايماقتارىنا ورناتۋعا بولادى. سونداي-اق، بۇل قۇرىلعىنى ۇيگە ورناتىپ، قاجەت جاعدايعا قولدانعان ابزال»، – دەيدى لاپپەەنرانتا (فينليانديا) تەحنولوگيالىق ۋنيۆەرسيتەتىنىڭ عالىمى يۋحا-پەككا پيتكانەن.

ونىڭ سوزىنە قاراعاندا، اۋىل شارۋاشىلىعىنىڭ وزگە ونىمدەرىمەن سالىستىرعاندا، ءونىمنىڭ بۇل ءتۇرىن ءوسىرۋ ءۇشىن ارنايى قۇنارلاندىرىلعان جەردىڭ قاجەتى جوق.

«بۇل اقۋىزداردى اۆتوماتتى رەجىمدە وسىرە الامىز جانە ول ءۇشىن ارنايى پەستيسيدتەر مەن توكسيندى تىڭايتقىشتاردى قاجەت ەتپەيمىز. بۇل ارقىلى اينالانىڭ لاستانۋى مەن جىلىجايلىق گازداردىڭ ءبولىنۋىن الدىن الۋعا بولادى»، – دەپ اتاپ ءوتتى يۋحا-پەككا پيتكانەن.