بۇگىنگى تاڭدا مەديسينا سالاسى قارىشتاپ دامىپ كەلەدى. الەمدە ءتۇرلى زاماناۋي  مەديسينالىق قۇرىلعىلار شىعارىلىپ، ادامزات بالاسى تەحنيكانىڭ ارقاسىندا كۇردەلى وتا جاساتىپ، ءومىر سۇرۋدە. الايدا، كەيبىر سىرقاتتىڭ ناقتى ەمى ءالى كۇنگە دەيىن تابىلماي وتىر. سونىڭ ءبىرى — قاتەرلى ىسىك.

باتىس قازاقستان وبلىستىق دەنساۋلىق ساقتاۋ باسقارما باسشىسىنىڭ ورىنباسارى نۇردانات بەركىنعاليدىڭ مالىمەتىنشە،  ءسۇت بەزى وبىرىن الدىن الا انىقتاۋعا ارنالعان سكرينينگتەن 50-60 جاس ارالىعىنداعى ايەلدەردىڭ 78،2%-ى، اسقازان-وڭەش وبىرى بويىنشا 50-60 جاس ارالىعىنداعى تۇرعىنداردىڭ 86،6%–ى، توق جانە تىك ىشەك وبىرى بويىنشا 50-70 جاس ارالىعىنداعى تۇرعىنداردىڭ 79،8%-ى، ءتورت جىل سايىن وتەتىن قۋىقاستى بەزى وبىرى بويىنشا 50-66 جاس ارالىعىنداعى ەر ادامداردىڭ 99،2%-ى، ال بەس جىلدا ءبىر وتەتىن جاتىر مويىنى وبىرى بويىنشا 30-60 جاس ارالىعىنداعى ايەلدەردىڭ 76%-ى  تەكسەرىلگەن.

– بۇگىنگى كۇنى ونكولوگيالىق سىرقاتتار تەك دەنساۋلىق ساقتاۋ سالاسىنىڭ ەمەس، سونىمەن قاتار قوعامنىڭ الەۋمەتتىك جانە ەكونوميكالىق ماسەلەسىنە اينالىپ وتىر. باتىس قازاقستان وبلىسىندا جىل سايىن 1200-1300 تۇرعىن قاتەرلى ىسىك دەرتىنە شالدىعادى. قاتەرلى ىسىكتىڭ قاۋىپتىلىگى العاشقى ءبىرىنشى، ەكىنشى ساتىلارىندا اۋىرىپ مازالامايدى، ال قاسىنداعى باسقا اعزا مۇشەلەرىنە زاقىم كەلتىرىپ، دەرت اسقىنعاندا عانا بىلىنەدى. ونكولوگيالىق اۋرۋدىڭ العاشقى ساتىسىندا انىقتاۋ ءۇشىن تەكسەرىستەن ءجيى ءوتىپ تۇرۋ كەرەك.  قازاقستاندا ونكولوگيالىق اۋرۋلاردىڭ ءبىرىنشى ورنىندا ءسۇت بەزى قاتەرلى ىسىگى تۇر. ودان كەيىن وكپە، جاتىر جانە اسقازان قاتەرلى ىسىگى الىپ وتىر. قاتەرلى ىسىكتى سكرينينگ ارقىلى  العاشقى ساتىسىندا انىقتاۋ وڭ ناتيجە بەرەدى. اۋرۋدى كەش انىقتاۋ دەرتتىڭ اسقىنۋىنا الىپ كەلەدى. قاتەرلى ىسىك كولەمى كىشكەنتاي بولسا، ونىڭ ەمدەۋ جولى دا جەڭىل بولادى. وبىردى كەشەندى تۇردە، اتاپ ايتقاندا، حيرۋرگيالىق ءتاسىل، ساۋلەنى قولدانۋ مەن حيميالىق تەراپيا، سونداي-اق يممۋنوتەراپيا ارقىلى ەمدەيدى. ونكولوگيالىق دەرتكە شالدىعۋدىڭ  ناقتى سەبەبى بولماعانىمەن، بىرنەشە فاكتورلار اسەر ەتەدى. العاشقى فاكتور – پسيحولوگيالىق  كۇيزەلىس.  ۇزاق مەرزىمدى ۋايىم مەن كۇيزەلىستىڭ اسەرىنەن ادام اعزاسىنداعى يممۋندىق جۇيە السىرەپ، سوزىلمالى دەرت اسقىنادى. مىسالى، ايەل ادامداردا جاتىر موينىنىڭ ەروزياسى نە جاتىردا پاپيلوما ۆيرۋسى ءجيى كەزدەسەدى. مۇنداي كەزدە كەيبىرەۋى ەمدەلسە، كوبى ءمان بەرمەي جۇرە بەرەدى. سودان اسقىنۋلار جالعاسىپ، ونكولوگيالىق دياگنوز قويىلادى.  سونىمەن قوسا جامان اۋرۋعا قورشاعان ورتانىڭ دا اسەرى زور. ءومىر بويى مۇناي-گاز سالاسىندا نە تۇراتىن مەكەنىنىڭ اتموسفەراسىندا ۋلى توكسيندەر كوپ بولسا، ادام اعزاسىنداعى سوزىلمالى دەرت قوزادى. شىلىم شەگۋ دە، ىشىمدىك ءىشۋ دە ونكولوگيالىق دەرتكە اپاراتىن فاكتورلاردىڭ ءبىرى، – دەدى وبلىستىق ونكولوگيالىق ديسپانسەردىڭ ەمدەۋ ءبولىمى بويىنشا ديرەكتوردىڭ ورىنباسارى نۇرلان تولەمىسوۆ.

گۇلىم اقاپ،

باتىس قازاقستان وبلىسى