قاپشاعاي جاساندى سۋ قويماسىنىڭ جاعالاۋىندا 150-دەن استام دەمالىس بازالارى ورنالاسقان. جازدىكۇنى شومىلۋ ناۋقانىنىڭ باستالۋىمەن قاپشاعاي قالاسىنىڭ تۇرعىندار سانى ءۇش ەسەگە ۇلعايادى. بۇل ورىندار جانە ولاردىڭ ۇسىنىستارى تۋريستەردىڭ قالاۋى مەن جاعدايىنا قاراي الۋان ءتۇرلى بولىپ كەلەدى.  

قاپشاعاي جاساندى سۋ قويماسىنىڭ جەكە كاسىپكەرلىككە وتپەگەن ايماعىندا دەمالۋشىلارعا اكىمشىلىك تاراپىنان جاسالعان جاعداي راسىمەن كوڭىل قۋانتادى. قالا اكىمدىگى قولعا العان ءىس جاقسى ناتيجەلەرىن كورسەتتى. ارنايى كولىكتۇراعى، قازاق ۇيلەر، بالالارعا ارنالعان ويىن الاڭقايلارى جاسالعان.

جەكەمەنشىك دەمالىس ايماقتارىنىڭ ورنالاسۋى مەن قىزمەتى جاقسى بولعانىمەن، باعاسى شارىقتاپ تۇر. قاراپايىم حالىقتىڭ قالتاسى كوتەرەتىن دەمالىس ايماقتارىنا كەلەر بولساق، قويىلعان باعاسىنا ساپاسى ساي كەلمەيدى، سىلاپ-سيپاپ جاساي سالعان شالا-جانسار تىرلىك قانا.

ءبىر وتباسىنا تاۋلىگىنە دەمالۋ قۇنى 45000 تگ بولاتىن «MoreLux» دەمالىس ورنىن باسقا دەمالىس ورىندارىمەن سالىستىرىپ كورەلىك. جاعالاۋعا 1 مينۋتتا جەتۋگە بولاتىن قۇمدى جاعاجايى بار، سۋدا ءجۇزۋ سپورتىمەن اينالىسۋعا قولايلى جاعداي جاسالعان، اشىق ءجۇزۋ قاۋىزدارى جانە فيندىق ساۋنا، شەزلونگتى تەرراساسى، بيليارد جانە ستول تەننيسى بار. ءقوناقۇي بولمەلەرى كونديسيونەر، تەگىن Wi-Fi-مەن، سپۋتنيكتىك تەلەارنالارمەن جابدىقتالعان. بايانباي تولەگەن ەسىمدى كەلۋشىنىڭ ايتۋى بويىنشا،  قوناق ۇيدەگى تازالىق، قىزمەتكەرلەردىڭ سىپايىلىعى، مەيرامحاناداعى تاعامداردىڭ دامدىلىگى ءقوناقۇي قىزمەتىنىڭ باعاسىنا تۇرارلىق.

ال، «الەكس» دەمالىس ورنىنا كىرۋ قۇنى ادام باسىنا 500 تگ، ونىڭ وزىندە بەلگىلەنگەن ناقتى ورىن جوق. كەلۋشىلەر بوس جەرگە بارىپ، توسەنىشتەرىن توسەپ دەمالا بەرەدى. ءبىراق كۇنۇزاققا شەكتەن تىس قابىلدانعان كۇن كوزى دەنساۋلىققا كەرى اسەرىن تيگىزۋى ابدەن مۇمكىن. توبەسى جابىق تاپشانداندار كولەمىنىڭ ۇلكەندەۋىنە قاراي بەس مىڭنان جيىرما مىڭ تەڭگەگە دەيىن جالعا بەرىلەدى. كولىك دەمالىس ايماعىنا كىرگىزىلمەيدى. دەمالىس ايماعىنىڭ تازالىعى، سۋدىڭ تازالىعى جايىندا ايتار بولسام، كوپ جاعدايدا ساپاسى سىن كوتەرمەيدى. قوناقتارعا كورسەتىلەتىن قىزمەت كەلۋشىلەردى دەمالىس ايماعىنا كىرگىزىپ جىبەرۋمەن عانا شەكتەلەدى.

اتالاعان دەمالىس ورنىنا كەلۋشىلەردىڭ ءبىرى ايماقتىڭ قىزمەتىنە رازى ەمەس ەكەنىن جەتكىزدى. ونىڭ سەبەبى كەلۋشىلەر ايماققا كىرەر كەزدە دە، تاپشانداردى جالداۋ ءۇشىن دە اقشا الاتىندارىن ايتتى. سوعان قاراماستان كيىز ۇيلەردىڭ جاعدايى ءماز ەمەس. قالاداعى كۇيبەڭ تىرشىلىكتەن ءبىر ءسات دەمالۋعا كەلەتىن قوناقتاردىڭ جاعدايى دۇرىس جاسالماعان.

وسىدان شىعاتىن قورىتىندى: ءقوناقۇيدىڭ باعاسى قانشالىقتى قىمبات بولسا، سونشالىقتى كورسەتىلەتىن قىزمەت تە ساپالى بولادى. الايدا وعان ەكىنىڭ ءبىرىنىڭ قالتاسى كوتەرە بەرمەيتىنى انىق. بۋرابايدا دەمالىس اقىسى شەتەلدە دەمالۋمەن سالىستىرعاندا تىم قىمبات دەپ باعالاپ جۇرگەن وتانداستارىمىز ەندىگىدە قاپشاعاي دەمالىس ورىندارىنىڭ باعاسىنا نارازىلىق تانىتپاسىنا ەشكىم كەپىلدىك بەرە المايدى.

ايتا كەتەتىن جايت، قالا تۇرعىندارى مەن قوناقتار اراسىندا تانىمالدىلىققا يە دەمالىس ورنىنىڭ باعاسى مەن ساپاسىنا قاراماستان كەلۋشىلەردىڭ قاتارى ازايعان ەمەس.

كەيىنگى جىلدارى قاپشاعاي سۋ قويماسىنىڭ دەمالىس بازالارىنداعى جاعدايدى جاقسارتىپ، قىزمەت تۇرلەرىنىڭ ساپاسىن ارتتىرۋعا اكىمشىلىك تاراپىنان كۇش سالىنىپ جاتىر. باعاسىنا ساپاسى ساي قىزمەتتى الداعى ۋاقىتتا ەلىمىزدىڭ بارلىق دەمالىس ورىندارىنا كورسەك دەيمىز.

كەلەشەكتە قاپشاعاي قالاسىنىڭ اۋماعىندا جوبالىق اتاۋى «جاڭا ىلە» بولىپ كەلەتىن ءىرى تۋريستىك ورتالىق جانە ويىن-ساۋىق قالاشىعىنىڭ قۇرىلىسى جوسپارلانۋدا.

 گۇلىم لەپەسباي