قازاق دالاسىندا قارا قىلدى قاق جارىپ تۋرا تورەلىك ەتەتىن شىنشىل بيلەر بولعان، ولار وزدەرىنىڭ ءادىل ۇكىمدەرىن دە سىنىن دا ءدوپ باسىپ ايتقان. سىننىڭ ەستىلەردى ىزگى ەتەتىن، ەسسىزدەردى كۇلكى ەتەتىن كۇشىن قازاق حالقى قادىرلەگەن. سىندى ايتا بىلگەن اباي ءتىرى كەزىندە ءدۇيىم قازاققا تيىسىنشە تانىلا قويماعان ەدى. وسى ىسپەتتەس سىننىڭ حاس شەبەرى بولعان اشىربەك سىعاي دا جەتكىلىكتى ناسيحاتتالمادى. الايدا، ءتاڭىرى تالانت دارىتىپ، ب ا ق بەرگەن، ءبىلىمنىڭ كىلتىن تارتۋ ەتكەن تەرەڭ ويلى تۇلعا، اۋقىمى كەڭ ناعىز سىنشى تۋراسىندا سىر شەرتكىم كەلەدى.
يا، ول ءبارىبىر دە ءبىز قالاعانداي ءتيىستى دەڭگەيدە تانىمال بولا الماي كەتتى. بۇگىنگى كۇنى وسىنداي ءىرى ونەر قايراتكەرلەرىن كەڭىنەن ەلگە ناسيحاتتاۋدىڭ ورنىنا، شەگى جوق ءبىر كۇندىك جۇلدىزداردى اقشاعا بولا ناسيحاتتاۋ ۇزدىكسىز ءجۇرىپ جاتقانى دالمە-دال وسىنداي تۇستا نالىتادى.
مەن 2011 جىلى مەكتەپ ءبىتىرىپ، قازاق ۇلتتىق ونەر ۋنيۆەرسيتەتىنە قۇجاتىمدى تاپسىردىم. ءبىرىنشى شىعارماشىلىق ەمتيحاندى ويداعىداي وتكەرىپ، كەلەسى كەزەڭگە ءوتتىم. وندا الەم جانە قازاق ادەبيەتىنە قاتىستى سان ءتۇرلى ساۋالدار قويىلدى. توسىننان تۋرا ماعان قاراما-قارسى وتىرعان ورتاشا بويلى، الايدا، وزگەشە زور مىسى مەن سىربازدىعى اڭعارىلىپ-اق تۇرعان اشىربەك تورەباي ۇلى تەرەڭدىكتىڭ لەبى ەسكەن كوزدەرىمەنەن “سوڭعى وقىعان كىتابىڭىز قانداي؟” دەپ سۇراق تاستادى. بىردەن ءبىر اپتا بۇرىن عانا وقىپ تاۋىسقان اشىربەك سىعايدىڭ “تەاتر تاعىلىمى” اتتى كىتابى تۋراسىنداعى جەكە كوزقاراسىمدى ايتا جونەلدىم. (ايتپاقشى، بۇل ساۋالدىڭ يەسى اشىربەك سىعايدىڭ ءوزى ەكەندىگىن بىلمەي تۇرمىن) وقۋ بارىسىنداعى ويعا تۇيگەندەرىمدى، وقىرمان رەتىندە ەلەڭ ەتكىزگەن تۇستارعا توقتالىپ، مۇمكىندىگىم جەتكەنشە جان-جاقتى جىلىكتەپ بەردىم. بالكىم، بالاڭدىعى باسىم شىنايىلىقتىڭ اسەرى بولار كوپ ويلانباستان جالپى اۆتور حاقىنداعى بىرنەشە وقىس پىكىرلەرىمدى دە ورتاعا سالىپ جىبەرىپ، جاسقانباي ەمىن-ەركىن سويلەپ كەتىپپىن: “اۆتور - اشىربەك سىعاي سول سۇراقتاردىڭ جاۋابىن بىلە تۇرا، وقىرمانعا ناقتى ءتىل قاتپادى. تەك ەمەۋرىنمەن عانا ىمداپ، ءبىر شەتىن ءبىلدىردى. اتالمىش ءتاسىلدى ۇستانا وتىرىپ، وزدەرى باستارىن قوزعالتىپ، ويلانسىن، ىزدەنسىن دەگەنى شىعار مۇمكىن؟”. وسى تۇستا وتكىر ءھام سۇستى كوزدەرىمەن قادالا قاراعان اكىم تارازي ءوز مانەرىنە سالىپ جىميا “سەن، بالا، ءوزى اشىربەك سىعايدى تانىمايتىن با ەدىڭ؟..” دەدى. بويىمدى جيناپ، سەنىمدى تۇردە اشىربەك اعانى كۇندەلىكتى ومىردە كوزبە-كوز كورمەگەنىمدى ايتتىم. قازىلار مۇشەسىنىڭ ءبىرى قالماي قارقىلداپ دۋ كۇلە باستادى. ويلى جانارى كۇلىم قاعا روزا قاجىعالىم قىزى دا ەرىكسىز ەزۋ تارتتى. سول ساتتە-اق ىشتەي سارالاۋعا كىرىسىپ كەتتىم. “الدەنەدەن ءمۇلت كەتتىم بە؟ قاي كەزىن ارتىق ايتتىم؟! اياقاستى بۇلار نەگە جىلىپ سالا بەردى؟..” دەگەن كۇدىك جەي باستادى. سويتسە، باعانادان بەرى الگى كىتاپتىڭ اۆتورى - اشىربەك سىعاي دالمە-دال مەنىڭ الدىمدا وتىر ەكەن. ول كىسى “بوسسىڭ، بارا عوي، اينالايىن!” دەپ ەدى، ەكى بەتىم الماداي بولىپ، اۋديتوريادان شىعىپ كەتتىم.
سودان بەرى ول كىسىنى ۋنيۆەرسيتەت قابىرعاسىندا جۇرگەندە تالاي كوردىم. دارىستەرىن ارا-تۇرا تىڭدادىم. جاقىنداپ بارىپ، سويلەسۋگە، سۇراق قويۋعا سول كەزدەردە اسا باتىلىم بارمادى. تاۋدان ءۇش-تورت كيلوممەترگە شەگىنگەن كەزدە عانا تاۋدىڭ قانشالىقتى بيىك ەكەندىگىنە كوز جەتكىزۋگە بولادى. سول سياقتى اشىربەك اعانىڭ كەسەك تۇلعا ەكەنىن بىلسەك تە، ارامىزدا قازىنا جۇرگەنىن سەزسەك تە، جان دۇنيەسىنىڭ سيمفونياسىن جەتكىلىكتى دەڭگەيدە ەستي المادىق. تەك سيمفونيا كەنەتتەن كىلت توقتاپ قالعاندا عانا “سيمفونيا ءبىتىپ قالدى ما؟” دەپ سەنەر-سەنبەسىمىزدى بىلمەي بارشامىز الاسۇرىپ، ەلەڭ ەتۋگە سانامىز جەتتى. سەبەبى، بۇل ادامداردىڭ كۇندەلىكتى تىرشىلىكتە اسپانداعى قاپتاعان جۇلدىزدارعا ءمان بەرە بەرمەي، تەك اققان جۇلدىزدى كورگەندە عانا جالت بۇرىلاتىن ادەتى عوي.
ايتكەنمەن، اشىربەك اعانىڭ ەرەكشە كىشىپەيىلدىگىن، جوعارى دەڭگەيدە تالعامپازدىقپەن ادەمى ءارى ورىندى ازىلدەي ءبىلۋ قابىلەتىمەن قاتار، شەگەلەپ تۇرىپ تەرەڭنەن تالداپ، شەبەر تالقىلاپ بەرۋمەن بىرگە ءدوپ جەتكىزەتىن ايقىن شەشەندىگىن ىشتەي ءقادىر تۇتتىق. اسىرەسە، تۇنىپ تۇرعان ەنسيكلوپەدياداي ءبىلىم مەن دارىن يەسى بولعانىن ۇعىنعان ەدىك.
قازاقتىڭ نار تۇلعالارىنىڭ باسىم كوپشىلىگى اۋىلدان شىققان. اۋىل ۇلتتىق سانا-سەزىمنىڭ قاينار كوزى. زاڭعار تاۋلارداي اسقاق رۋح پەن ايرىقشا تەرەڭدىك يەلەرىنىڭ بىرەگەيى-اشىربەك تورەباي ۇلى سىعاي دا ءوزىنىڭ التىن تۇعىرى-وڭتۇستىك قازاقستان وبلىسى، كەنتاۋ قالاسىندا 1947 جىلى 11 قاڭتاردا جارىق دۇنيە ەسىگىن اشقان ەدى.
سوعىستان كەيىنگى جىلدار. وڭتۇستىك قازاقستان. بارشا حالىق تا، بولاشاق سىنشىنىڭ اتا-اناسى دا ەكى-اق جىل بۇرىن سوعىستى باستان كەشكەن وتانىن كۇندىز-تۇنى كىرپىشتەپ تۇرىپ قايتا قالپىنا كەلتىرىپ جاتىر. بالا اشىربەك ەلدى قالپىنا كەلتىرۋ ءۇردىسىن، جوندەۋ، قۇرۋ ەڭبەگىن كورىپ ءوستى. بالكىم، سول كەزدە-اق ول قازاق ونەرىن دە قالپىنا كەلتىرىپ، جوندەپ، تۇزەگىسى كەلگەن شىعار؟
الپىسىنشى جىلدار، جىلىمىق كەزەڭى. كۇللى كسرو بويىنشا ونەر جاڭعىرۋ ءۇردىسىن باسىنان كەشىپ جاتقان شاقتا، اشىربەك ءوزىنىڭ ءومىر جولىن تاڭداپ جۇرگەن جاس جىگىت، جوق، جاس سەرى جىگىتى ەدى.
جيىرماسىنشى عاسىردىڭ الپىسىنشى جىلدارى راسىندا دا الەم ونەرىنىڭ ساحناسىنا رەاليستىك سارىن، ساحنا تورىنە الەۋمەتتىك مانەر شىقتى. ال قازاق دالاسىندا تەاتر كوبىنەسە سوعىستىڭ الدىنداعى كونەرگەن داستۇرمەن كەلە جاتتى. جاس اشىربەككە مۇنداي ەسكىشىل تەاتردى كورۋ ۇنامادى. ول زامانعا ساي، وزىق، جاڭاشىل قويىلىمدار مەن تۋىندىلاردى كورگىسى كەلدى. مۇمكىن، سودان بولار، ول ءوزىنىڭ تىرناقالدى وتكىر سىني ماقالالارىن سول كەزدە جازا باستادى.
جالىندى الپىسىنشى جىلدار رەسەي مادەنيەتىنە ەۆتۋشەنكو، احمادۋلينا، ۆىسوسكيي سىندى دارا تۇلعالاردى، ال قازاق حالقىنا ولجاس سۇلەيمەنوۆ، مۇقاعالي ماقاتايەۆ، ورالحان بوكەي، شاكەن ايمانوۆ جانە ەندى-ەندى ونەرگە قادام باسىپ كەلە جاتقان اشىربەك سىعايدى سىيعا تارتقان ەدى. ايتسە دە، اشىربەكتىڭ باستى-باستى بەلەستەرى ءالى الدا، جيىرماسىنشى عاسىردىڭ سوڭعى شيرەگىندە جانە جيىرما ءبىرىنشى عاسىردىڭ ءبىرىنشى ون جىلدىعىندا كۇتىپ تۇردى. مىنەكەي، سول كەزدە كسرو-نىڭ ىدىراۋىمەن قوسا ىدىراپ بارا جاتقان قازاق ونەرىنە دە “ءاي دەيتىن اجە، قوي دەيتىن قوجا” اۋاداي قاجەت بولدى.
كسرو-نىڭ مۇناراسى قۇلاپ ءتۇستى، ون ءتورت ەل ازاتتىق الدى. ءسوسياليزمنىڭ قامالى قيراعان كەزدە قازاق ونەرىنىڭ سورەسى قۇلاپ قالماسىن دەپ تىرەپ قالعان قولداردىڭ ءبىرى - اشىربەك سىعايدىڭ قولى ەدى.
نەگە ەكەندىگىن بىلمەيمىن، ءبىراق مەن سول زامانداعى اشىربەك سىعايدى بىلاي كوز الدىما ەلەستەتەمىن. 1 مامىر 1968 جىل. “جازۋشىلار وداعى”. №47-كابينەت. شاعىن، الايدا مەرەكەلى ۇستەل. توردە وتىرعان تيمۋر ادىلبەكوۆ ەسىمدى بەدەلدى اقىن دالىزدەن ءوتىپ بارا جاتقان جاس اشىربەك سىعايدى بايقاپ قالدى.
تيمۋر: - ا نۋ-كا، مولودوي كريتيك، پودويدي سيۋدا!
جاس اشىربەك: - اسسالاۋماعالەيكۇم، تيمۋر سەيداحمەت ۇلى، بۇل راسىندا دا ءسىزسىز بە؟! –دەپ قولىن بەرىپ امانداستى، - ءسىز مەنى شىنىمەن شاقىردىڭىز با؟
تيمۋر: - كوممۋنيست نە دولجەن زدوروۆاتسيا پو مۋسۋلمانسكي... نۋ، لادنو! تى ۋ ناس، ۆيجۋ، نوۆەنكيي. لادنو، لادنو، نە ستەسنيايسيا! تى چيتال مويۋ نوۆۋيۋ پوەمۋ؟
جاس اشىربەك: - دا، چيتال، نو... قازاقشا سويلەۋگە رۇقسات ەتەسىز بە، اعا؟ “ءوفىسيالنىي” ءتىل، ارينە، ورىس ءتىلى... ءبىراق، ءبىز قايتكەندە دە قازاقپىز عوي!
تيمۋر: - اح، كاكوي ۋمنىي! (ورىندىققا جايعاسا بەرە، كوزىن بادىرايتا سىبىرلاپ، جوعارىعا كورسەتتى) ولار ءبىزدىڭ انا تىلىمىزدە كوپ سويلەسەك، جاقتىرمايدى. ءبىراق، سەنىڭ ايتقانىڭ بولسىن، اشىربەك! (ەسىكتى جاپتى). اششى سىنىڭدى جاسقانباي، قىسىلماي ايتا عوي، مەنىڭ پوەمام ساعان ۇنادى ما ءوزى؟
جاس اشىربەك (ءبىراز ويلانىپ): - وتە ۇنادى، اعا، ءبىراق...
تيمۋر: - ايتا ءتۇس، ايت، ايت!
جاس اشىربەك: - مىسالعا، ءسىزدىڭ تۋعان اناڭىز سىزگە باسىن ساجدە قىلىپ يسە ءجون بولار ما ەدى؟
تيمۋر (ءبىرشاما ءۇنسىز تۇردى دا): - تى سموتري، كاك يازىك پودۆەشان!
جاس اشىربەك: - ەسلي يا چتو-تو پوسمەل نە تاك سكازات، پروشۋ مەنيا يزۆينيت. يا سكازال، تو چتو دۋمايۋ. (دەپ ورنىنان تۇردى)
تيمۋر: - وتىرا بەر... اشىربەك، سەنىكى راس... جەر انا بىزگە تابىنعانى دۇرىس ەمەس تا شىعار! قالاي ايتسام ەكەن... (سىبىرلاپ) اشىربەك، تىڭداشى بەرى، اينالايىن، ءقازىر زامان باسقا، ءقازىر ادام اتاۋلى بارلىق تابيعات كۇشتەرىن يگەرىپ جاتىر، ول از دەسەڭ، ادامزات وتكەندە عانا كوسموسقا ۇشتى! بۇل – دۇلەي كۇش! سوندىقتان، وسى دۇلەي كۇشتى جىرلاۋ كەرەك! كونياك ىشەسىڭ بە؟
جاس اشىربەك: - جوق، راقمەت! بارا بەرسەم رۇقسات پا؟
تيمۋر: - جولىڭ بولسىن، جاس تالانت، جولىڭ بولسىن! (كۇلدى) ي سموتري، ۆسەگدا ستارايسيا گوۆوريت سۆويۋ مىسل تاك جە چەستنو ي پريامو! تى سموتري، كاك يازىك پودۆەشان!
كىم ءبىلسىن، وسى سياقتى وقيعا شىن ومىردە ورىن الماعان دا بولار. دەسەك تە، اشىربەكتىڭ جاس كەزىنەن باستاپ ايقىن كورىنگەن اقيقات سۇيگىشتىگى مەن تۋرالىعىن ايقىن اڭعارامىز. كەيىنىرەك اشىربەك سىعاي ءوزىنىڭ وسىلايشا اڭىزعا اينالارلىقتاي شىنشىلدىعىن كۇندەلىكتى ومىردە دە سان مارتە دالەلدەيدى. شاكەن ايمانوۆ دۇنيەدەن وزعان سوڭ تەاتر ءومىرى كۇرت توقتاپ قالعانداي بولدى. بۇل شىن مانىندە ءبىزدىڭ بارشا ونەر قاۋىمى ءۇشىن ۇلكەن تراگەديا ەدى. سول ساتتە اشىربەكتىڭ مەيرىمدى جۇرەگى مەن كەلەشەككە دەگەن جارقىن سەنىمىنىڭ قانشالىقتى تەاتر قاۋىمىنا قاجەت ءارى ورىندى بولعاندىعىن ايتپاساق تا ۇعىنىقتى.
اشىربەك تورەباي ۇلىنىڭ كوپتەگەن كىتاپتارىنىڭ ىشىنەن مەنىڭ وزىمە ۇنايتىنى “ىڭكار شاق” (1978). بۇل تىرناقالدى تۋىندىسى. ىشىندە اشىربەك سىعاي ءوزىنىڭ ءسوز شەبەرلىگىن، ەڭ باستىسى قايتالانباس اۋەزدى ءتىلىن جانە ەرۋديسياسىن تانىتادى. ارينە، ودان كەيىن شىققان الماتىنىڭ، جانە كۇللى قازاق توپىراعىنىڭ تەاتر سۇيەر قاۋىمىنا تانىلعان “سىر ساندىق” (1981). “ساحناعا ساپار” (1990). ال كسرو ىدىراعان سوڭ، بارلىق تەاترلار جابىلا جازداعان ەكونوميكالىق قيىندىقتار كەلسە دە، اشىربەك سوندا دا “جارناما الدىنداعى وي” “1993”، “ساحنا ساڭلاقتتارى” (1998؛ ايتپاقشى سول ەڭبەگى ەلەنىپ، قازاقستان مەملەكەتتىك سىيلىعىن 2000 الدى)، “تەاتر تاعىلىمى” (2003)، تولعام (2004)، “تالدىقورعان تەاترى” (2005) كىتاپتارى بىرىنەن سوڭ ءبىرى جارىق كورىپ جاتتى. اتالمىش تۇستا بۇنداي توم-توم ەنسەكلوپەدياعا بەرمەس ەرۋديسيا بالكىم تەك الاش زيالىلارىنا عانا ءتان بولعان شىعار دەگەن ويعا ەرىكسىز كەلەسىز.
“شاكىرت بولىپ كورمەگەن، ۇستاز بولىپ جارىتپاس!” دەمەكشى، كەزىندە حاديشا بوكەيەۆاعا ۇلگىلى شاكىرت بولا بىلگەن اشىربەك تورەباي ۇلىنىڭ ءوزى دە ءبىراز جىلدار بويى جەمىستى ۇستازدىق ەتە الدى. كوپشىلىك بىلە بەرمەس، دەگەنمەن، ول شاكىرت تاربيەلەۋدە بەرەرى بار بىلىكتى پەداگوگ قانا ەمەس، ءار تالىمگەرى ءۇشىن ايرىقشا جانىن سالعان مامان دا بولا ءبىلدى. اشىربەك اعاي ارينە شاكىرتتەرىن باسىپ-جانشىپ تاستامادى. ءوشىرۋدى ەمەس، ءوسىرۋدى ماقسات تۇتتى. ولاردىڭ ۇدايى مەيلىنشە مول ىزدەنىس ۇستىندە ءجۇرىپ، كوپتەپ ءارى كاسىبي دەڭگەيدە جازا بەرىپ، اقىر سوڭىندا وزىندىك قولتاڭبالارىن قالىپتاستىرۋىن، اشىلا-جەتىلە تۇسكەندەرىن قالادى. بۇل ونىڭ باستى تالابى ەدى.
ەگەر ءتىپتى اشىربەك سىعايدىڭ قازاق ۇلتتىق ونەر ۋنيۆەرسيتەتىندەگى ءوز شاكىرتتەرىنىڭ قاي-قايسىنا بولماسىن “اشىربەك ۇستازدىڭ ساعان بەرگەن ەڭ قۇندى ءۇش نارسەسى نە؟”، “اشىربەك سىعايدىڭ قاي كىتابى سەنىڭ ەڭ سۇيىكتى كىتابىڭ؟ نەلىكتەن؟”، “سەن اشىربەك سىعايدىڭ ورنىندا بولعانىڭدا، ەڭ الدىمەن وتاندىق تەاتر جايلى نە جازار ەدىڭ؟” دەگەن سىندى ساۋالداردى قويساق، ەش ويلانباستان دەرەۋ ءارى تولىققاندى، اۋقىمدى جاۋاپ الاتىنىمىزعا كامىل سەنەمىن. ويتكەنى، ولار ۇلاعاتتى ۇستازدىڭ كوزىن كوردى، ءسوزىن ەسىتتى. كەي قاسيەتتەرىن بويلارىنا بەيسانالى تۇردە ءسىڭىرىپ ۇلگەردى. تۇلعانىڭ ناقتى جەكە ومىرلىك تاجىريبەسىنە، ءجۇرىپ وتكەن دارا جولىنا سۇيەنە وتىرىپ ايتىلعان جان-جاقتى ءبىلىم نارىمەن سۋسىندادى. ۇستازدىڭ ارقاسىندا ولاردىڭ جالپى ومىرگە دەگەن وزىندىك جەكە تۇراقتى كوزقاراستارى پايدا بولدى.
ءيا، ول ءومىرىنىڭ سوڭعى جىلدارى ونەر ورداسىندا ءدارىس بەردى. شاكىرتتەرىنىڭ بارشاسىنا ءوزىنىڭ بويىنداعى دارىندى سىڭىرگىسى كەلدى مە، دەنساۋلىعىنا قاراماستان، ساعاتتاپ تۇرىپ وقىتۋ ىسىمەن اينالىستى. ايتكەنمەن، اشىربەك اعا ءوزىنىڭ سوڭعى كۋرسىنىڭ ديپلوم الۋ ءساتىن كورىپ ۇلگەرمەدى. 28 قاراشا 2014 جىلى تاڭەرتەڭ كۋرسى ۋاقىتىلى كەلەتىن اعايىن ادەتتەگىدەي تاپجىلماستان كۇتىپ وتىر. الايدا، ۇلاعاتتى ۇستاز شاكىرتتەرىنە ساباق بەرۋگە كەلمەي جاتىر... ستۋدەنتتەرگە كەيىنىرەك بەلگىلى بولعانداي، تەاتر عۇلاماسىنىڭ جۇرەگى بەس ساعات ون جەتى مينۋتتا ماڭگىلىككە توقتاپتى. سول كۇننەن باستاپ ءالى كۇنگە دەيىن سول ونەر ورداسى تۇرماق، كۇللى قازاق دالاسى جەتىمسىرەپ قالدى.
اشىربەك تورەباي ۇلىنىڭ ءومىر جولى كەز كەلگەن دارىن يەسىنىڭ ومىرىندەگىدەي تالاي-تالاي بۇلتارىس-قالتارىستاردان تۇردى. راس، ادامنىڭ ءومىرى، اسىرەسە، اشىربەك سىعاي ىسپەتتەس ءىرى تۇلعالى ادامنىڭ ءومىرى تەمىر جول سەكىلدى ءتۇزۋ بولماق ەمەس. تەمىر جول سياقتى ادام ومىرىندە دە بىرنەشە بەكەت بولادى. بالالىق شاقتىڭ كۇندەي جارقىراعان كوكتەمگى گۇلدەرگە تولى شاعىن بەكەت، جاستىق شاق دەگەن جازعى قىزۋعا تولى جاڭا بەكەت، ەگدە جاس دەگەن ادەتتە سوڭعى بەكەت. اشىربەك ءومىرىنىڭ بارلىق بەكەتتەرى تۋراسىندا بارىنشا سىر شەرتۋگە تىرىستىم. سوڭعى بەكەتتەن سوڭ ءومىر پويىزى جۇرمەيدى. سول تۇستان ءبىراتۇلا توقتايدى. الايدا، ونەر پويىزى ەشقاشان توقتامايدى. سول ونەر پويىزىنىڭ باعىتى قيسىق كەتپەسىن، قىزمەتى دۇرىس بولسىن دەپ تۇزەپ تۇراتىن جولدىڭ بويىنداعى مەحانيكتار ارينە سىنشىلار. تاپتىرماس ونەر مەحانيكتەرىنىڭ ءبىرى - اشىربەك سىنشى ەدى! ءيا، ءيا، قانشالىقتى اقان سەرى، اقتامبەردى جىراۋ ءار قازاقتىڭ قۇلاعىنا جاقىن بولسا، سونشالىقتى اشىربەك سىنشى دەگەن ءسوز تىركەسى دە ەرتەڭگى كۇنى بار قازاققا قۇندى دا ءقادىرلى ۇعىمداردىڭ بىرىنە اينالارى ءشۇباسىز. اسىرەسە، وتاندىق تەاتردى الەمدىك تەاتردىڭ دەڭگەيىنە جەتكىزۋدى ارمان ەتىپ، سول جولدا ايرىقشا قاجىرلىق تانىتىپ، تەر توككەن “قازاقتىڭ بەلينسكييى” - اشىربەك سىنشىنىڭ قازاق تەاترىنا سىڭىرگەن تەڭدەسسىز ۇلەسى تۋراسىنداعى شىندىق كەلەشەكتە قازاقستاننىڭ جاڭا تاريح وقۋلىقتارىنىڭ پاراقتارىنا ەنەدى دەگەن سەنىمدەمىن.
ريزا ىسقاق
استانا، 2017 جىل
