قازاق انشىلەرىنىڭ اراسىندا ءوز رۋىن فاميلياسىنا اينالدىرعان انشىلەر كوبەيىپ كەلەدى. باسقا ەمەس، كوپ الدىندا جۇرگەن ونەر جۇلدىزدارى ءوز اتىنا رۋىن جالعاپ الىپ ءجۇر دەپ جازادى "الاش ايناسى".

  فوتو: ori-kuan.kz

ايتالىق، نۇرلان البان، اشا ماتاي، سارا نايمان، اقىلبەك جەمەنەي، مايرا كەرەي. بارلىعى دا — ەل ءسۇيىپ تىڭدايتىن، ونەردە وزىندىك ورنىن قالىپتاستىرىپ ۇلگەرگەن بەلگىلى انشىلەر. بۇلاردىڭ ىشىندە باستاپقىدا باسقا اتپەن، ياعني ءوزىنىڭ تەگىمەن شىققاندارى دا بار.

مىسالى، تاڭدايىنا بۇلبۇل ۇيالاعان مايرا ءانشى العاشىندا مۇحامەد قىزى بولىپ شىققاندىقتان، جۇرت ونى ءالى كۇنگە سولاي اتاۋدان جاڭىلار ەمەس. تەگىن كەنەت كەرەي دەپ اۋىستىرعاندا، شىنى كەرەك، بارشا قازاق مايراعا ءبىر ءتۇرلى توسىرقاي قارادى.

ونىڭ ءمانىن ءانشىنىڭ ءوزى "ەۋروپا جۇرتىنىڭ مۇحامەد قىزى دەگەن ۇزىن تەكتى ايتۋعا ءتىلى كەلمەيتىندىگىمەن" تۇسىندىرۋگە تىرىستى. سونداي-اق سول تۇستاعى يسلامعا دەگەن تەرىس كوزقاراس "مۇحاممەد" اتاۋىنا ۇركە قاراپ، قاسيەتتى ەسىمدى كوزگە شىققان سۇيەلدەي كورسە كەرەك. سول سەبەپتى مۇحامەد قىزى كەرەيگە اينالدى.

رۋعا-جۇزگە ءبولىنۋ، ءتىپتى ءوز رۋىن ۇلتىنان جوعارى قويۋ دەگەن ماسەلە توڭىرەگىندە وزگە ەمەس، انشىلەردىڭ ءوزى نە ويلايدى؟

"ماعان شىمكەنت، اتىراۋ دەپ بولەتىندەر ۇنامايدى. سوسىن ءقازىر اۆتوكولىكتەردىڭ ارتىنا رۋلارىنىڭ اتىن جازىپ الۋ سانگە اينالىپتى. قاتارلاسىپ كەلىپ، بەتىنە "نە دەگەن بەيشارا، نە دەگەن قاراڭعى ەدىڭ" دەپ ايانىشپەن قارايمىن. دەڭگەيى، نامىسى رۋىنان اسپايدى"، - دەگەن ءانشى ساكەن مايعازييەۆ باسپا ءسوز بەتىندەگى سۇحباتتارىنىڭ بىرىندە.

تاريحشى مامبەت قويگەلدين دە انشىلەردىڭ بۇل قادامىن قۇپتاماي وتىر.

"مەنىڭشە، رۋىنىڭ اتىن تۋ قىلىپ ساحنا تورىنە الىپ شىعىپ جاتقان انشىلەرىمىز وزدەرىنىڭ نەگە بوي الدىرىپ، نەندەي قاۋىپكە جول اشىپ بەرىپ جاتقاندىعىن تۇسىنبەيتىن سەكىلدى. سوندىقتان مەن ولاردى "اينالايىندار" دەپ تۇرىپ، ءوز قاتەلىكتەرىن كەشىكپەي تۇسىنۋگە شاقىرار ەدىم. مەيلى، كىم بولسىن، رۋعا بولشەكتەۋ، رۋلىق سانانى قوزدىرۋ ارقىلى ابىرويعا كەنەلمەسى انىق. ويتكەنى ونەر دەگەننىڭ ءوزى – ۇلتتىق قۇندىلىق، سوندىقتان ۇلى ونەر تەك ۇلتتىق دەڭگەيدە كورىنىس تابادى. سوندىقتان رۋلىق سانا دەڭگەيىنەن ءوسۋىمىز كەرەك"، - دەيدى تاريح عىلىمدارىنىڭ دوكتورى مامبەت قويگەلدين.

دەرەككوز: "الاش ايناسى"