ساكەن مايعازييەۆ، ءانشى:  مەرەكەنىڭ بەرەكەسىن كەتىرمەيىك!

"اۋليە ۆالەنيتين" دەپ ات قويىپ، ايدار تاعىپ، وزگەنiڭ قاڭسىعىن تاڭسىق قىلۋ – ويسىزدىق پەن ءالجۋازدىعىمىزدىڭ بەلگiسi دەر ەم. سوسىن، "قوزى كورپەش بايان سۇلۋ" كۇنى دەپ جۇرگەندەردى دە قولدامايمىن. بىرىنشىدەن، بۇل كۇندى تويلايتىنداي تاريحىن "بiزگە دە جۇعىستى بولسىن" دەپ اتاپ وتەتiندەي مەيرام كورىپ تۇرعان جوقپىن. ولار قوسىلماعان، باقىتسىز عاشىقتار. نە ءۇشىن تويلاۋىمىز كەرەك؟ ءبىز قازاق ەجەلدەن اناسىن قۇرمەتتەپ، تىنىشتىعىن وتباسىنان تاپقان ەلمىز. تەك قانا مەرەكە كۇندەرi ەمەس، كۇن سايىن الاقانىمىزعا سالىپ، ايالاپ جۇرۋگە ءتيىس نازىك جاندارىمىزدى، جارلارىمىزدى، عاشىقتارىمىزدى نەگە بەلگىلى ءبىر كۇندەردە عانا ەلەپ-ەسكەرۋىمىز كەرەك؟(جىميىپ) قالاي ايتساق تا،قوسىلماعان عاشىقتاردىڭ كۇنىن اتاپ ءوتۋ دەگەنگە كەلىسە المايمىن. باۋىرجان تۇرابايەۆتىڭ مىنا ءبىر قۇيتىرقى قالجىڭى، ءازىل اڭگىمەسى ەسiمە ءتۇسiپ وتىر (كۇلiپ): "ءلايلى مەن ءماجنۇن، قىز جىبەك پەن تولەگەن، قوزى كورپەش پەن بايان سۇلۋ سياقتى عاشىقتاردى ءبارى اسپەتتەيدى، كورەر ەم سولار قوسىلىپ، 1 جىل بىرگە تۇرسا، نە بولارىن" دەگەن ەدi. ءازىل اڭگىمە بولعانىمەن... ءبىز نەگە ءومىرىنىڭ سوڭىنا دەيىن ءبىر جاستىقتا قارتايىپ، كەيىنگىگە ۇلگى بولارلىقتاي وتباسى بولعان جانداردىڭ ءومىرىن ۇلگi ەتپەيمiز؟ سوڭى ولىممەن اياقتالعان وقيعالاردى العا تارتا بەرۋ جانە ونى تويلاۋ تومپاقتاۋ سياقتى. قۇنانبايدى دارەتسىز ەمىزبەگەن زەرەنى نەگە ۇلگى ەتىپ الماسقا؟ تاعى ءبىر ايتا كەتەرلىك جايت، "قوزى مەن بايان كۇنi" سياقتى بەكiتiلمەگەن بەيرەسمي مەيرامدارمەن مەرەكەنiڭ بەرەكەسiن كەتiرمەۋiمiز كەرەك دەپ ويلايمىن. ەشقانداي مەملەكەت تاراپىنان قولداۋ جوق، بەلگىلى ءبىر توپ وكىلدەرى شىعارىپ جۇرگەن مۇنداي مەرەكەلەردi ويلاپ تابا بەرەتiن بولساق بiزدە قوسىلماعان عاشىقتار از ەمەس قوي. مۇنداي ماسەلەلەردiڭ الدىن الۋ جولى وتباسىنداعى تاربيەدەن باستالادى. "بالاڭدى تاربيەلەپ اۋرە بولما، ول ءبارىبىر وزىڭە ۇقسايدى. ءوزىڭدى تاربيەلە!" دەگەن جاقسى ءسوز بار عوي. ءوزى اراق ىشەتىن اكە بالاسىنا قالاي «اراق ىشپە» دەيدى. مەنىڭ وتباسىمدا بۇل مەيرام تويلانبايدى. ۇلىم دا بۇل كۇندى مەرەكە رەتىندە قابىلدامايدى. اللاعا شۇكىر، بالامدى بارىنشا قازاقى تاربيەمەن وسىرۋگە تىرىسامىن. سوندىقتان، وتباسىنداعى تاربيەنى دۇرىستاعانىمىز ابزال دەپ ويلايمىن. سەبەبى، "ۇيادا نە كورسەڭ، ۇشقاندا سونى ىلەسىڭ!"

جانداربەك بۇلعاقوۆ، ايتىسكەر اقىن: قوسىلعىشتىڭ ورنى اۋىسقانىمەن، قوسىندىنىڭ ءمانى وزگەرمەيدى!

جالپى ءبىز كوپ نارسەنى اقتاپ الۋعا بەيىم حالىقپىز عوي. ءقازىر دە ۇلتىمىزدىڭ تانىمىنا جات رۋحاني تامىرىمىزدى بالتالاۋعا نەگىزدەلگەن مەيرامداردى اقتاپ، ۇلت ساناسىنا ءسىڭدىرىپ جىبەرگىسى كەلەتىندەر جوق ەمەس. ماسەلەن، «ۆالەنتين كۇنىنە» بايلانىستى: «كىمنىڭ باسىندا بولمايدى، جاس كەزىندە ماحاببات بولۋ كەرەك» دەگەن ۇعىممەن ءومىر سۇرەتىن جاستار تۇرماق، اتا-انالار دا بار. ءوزىنىڭ قىزىنا كەلگەن جىگىتتى ماقتانىشپەن اڭگىمە قىلىپ وتىرعان انالاردى دا ءوز كوزىممەن كوردىم. ءبىر بولمەگە كىرىپ الىپ، ويىنشىعىن قۇشاقتاپ جىلاپ وتىرعان قىزىنا: «نە بوپ قالدى تاعى دا؟ جىگىتىڭمەن ۇرىسىپ قالدىڭ با؟ ءبىر-بىرىڭدى رەنجىتە بەرسەڭدەر نەسىنە جۇرەسىڭدەر؟» دەگەن سياقتى اقىل ايتاتىن اقىماق اتا-انالاردىڭ سانى ارتىپ بارا جاتقانى جاسىرىن ەمەس. بۇرىن اكەسى بالاسىنا اقىل ايتقاندا، "سەن ات جالىن تارتىپ مىنەتىن جاسقا كەلدىڭ" دەپ ايتاتىن ەدى، ءقازىر "سەن قىزعا باراتىن جاسقا كەلدىڭ" دەپ ۇرىساتىن بولدى. اتا-انانىڭ اۋزىنان شىققان ءسوز بالانىڭ بولاشاعىنا ەلەۋلى اسەرىن تيگىزەدى. بۇعان زاڭ ەمەس، ۇيدەگى تاربيەنىڭ دۇرىستىعى عانا شەكتەۋ قويا الادى. ءبىراق، اقىل ايتاتىن اكەنىڭ ءوزى جۇمىسىنداعى حاتشى قىزعا شوكولاد سىيلايدى، ۇيدەگى انانىڭ ءوزى باستىعىنان 8 ناۋرىزعا گۇل الادى. باستىعى بەتىنەن سۇيگەنگە كوزى جانىپ جۇرگەن اتا-انا بالاسىنا ۆالەنتين كۇنىن تويلاما دەپ ايتا الا ما؟ ءقازىر ەلباسىنىڭ ءوزى «بالالاردى دۇرىس جولعا تاربيەلەيىك، مەدرەسەگە بەرەيىك» دەگەن ۇندەۋ تاستاپ جاتىر، الايدا، اتا-اناسى تۋرا جولدا بولماعان بالانى، ءبىز قالاي تىيا الامىز؟

ءدال ءقازىر بىزگە "بالاڭىز 14 اقپاندا قايدا كەتىپ بارا جاتىر؟" دەگەن ساۋالعا جەدەل جاۋاپ كەرەك. "بالام قايدا بارادى، نەگە ول ءاتىر سەۋىپ جاتىر؟" دەگەن ماسەلە ءقازىر ولاردى قىزىقتىرمايدى، ويتكەنى، شەشەسىنىڭ سەريالدان، اكەسىنىڭ گازەتتەن، قالا بەردى عالامتوردان كوز الۋعا مۇرشاسى جوق. بۇرىنعىلار بالالارىن اقشام نامازىنان كەيىن دالاعا شىعارمايتىن ەدى، ال قازىرگىلەردىڭ بار ايتاتىن اقىلى: "تۇنگى ون ەكىدەن كەشىكپە!". ونىڭ ۇستىنە، شەشەسى قىزىنا: "اكەڭ ءبىلىپ قويماسىن، ەستىرتپەي كەل" دەپ ءۇيدىڭ كىلتىن بەرەدى. بۇل – ەكەۋدىڭ بىرىگىپ اكەسىن الداۋى، اقىماق قىلۋى. بىرىنشىدەن، بالانى وتىرىك ايتۋعا تاربيەلەسە، ەكىنشىدەن سۋىت جۇرىسكە داعدىلاندىرادى. بۇل كۇنى دۇكەندەردى، مەيرامحانالاردى جاۋىپ تاستايمىز دەسەك تە، ناتيجە شىعۋى ەكىتالاي. سەبەبى، تاربيە – تال بەسىكتەن. اتا-انانىڭ وزىنە ءبىراز ناسيحات جاساپ، ۇيدەگى اتموسفەرانى وزگەرتۋ كەرەك دەپ سانايمىن.

كەلەسى ءبىر ماسەلە، بۇگىندە مەكتەپ وقۋشىلارىنىڭ اراسىندا جىگىت قاراتۋدا باسەكەلەستىك پايدا بولعان. "ماعان بىلتىر 5 «ۆالەنتينكا» كەلگەن، بيىل 10 كەلدى" دەپ جاتادى. جارىستىڭ اتى – جىگىت قاراتۋ. «قازاننان قاقپاق كەتسە، يتتەن ۇيات كەتەدى» دەيدى ەمەس پە؟ مەكتەپتە باسشىلىقتان، باسقاسىنا ۇيدەن تىيىم بولماسا، ەرتەڭ اركىم ويىنا كەلگەن مەيرامدى شىعارىپ الىپ، تويلاي بەرەتىن بولادى. ءبىر تانىمال ادام، بۇگىن جالاڭاشتار كۇنى دەپ، ءوز شالبارىن شەشىپ، الەۋمەتتىك جەلىگە سالسا، وقۋشىلار دا سونى قايتالاۋدان تايىنبايتىن بولعان قوعامدا ءجۇرمىز.

ۇشىنشىدەن، اقپاننىڭ 14-دە عانا ەمەس، ب ا ق ارقىلى، 1 اي بۇرىن، ءتىپتى 1 جىل بۇرىن اۋزى دۋالى، ەلگە ءسوزى ءوتىمدى كىسىلەر ناسيحات ايتقانى دۇرىس دەپ ويلايمىن. ونىڭ ۇستىنە سوڭعى جىلدارى ءبىز ۇلتشىلمىز، ءبىز پاتريوتپىز دەگەن ويدىڭ ىزىمەن مەرەكە "قوزى كورپەش بايان سۇلۋ" كۇنى رەتىندە وزگەرتىلىپ، ەسىمدە جوق، ايتەۋىر ءساۋىردىڭ ءبىر كۇنىنە اپارىپ تاعىلدى. بۇل جەردە «مەن «موسكۆا» دەگەن اراقتى ىشپەيمىن، «قازاقستان» دەگەن ۆينو ىشەمىن» دەگەن سياقتى عوي. «قوسىلعىشتىڭ ورنى اۋىسقانىمەن، قوسىندىنىڭ ءمانى وزگەرمەيدى». اتى اۋىسقانىمەن، ازعىندىق مەيرامى!

ءقازىر ءبارى دە اشىق-جاريا. مەن ءوزىمنىڭ نەكەلى جارىمدى كوشەدە قۇشاقتاۋعا ارلانامىن، ال ونىڭ جانىندا، تانىسقاندارىنا ءالى 1 اي بولماعان، نەكەسى قيىلماعان جاستاردىڭ قۇشاقتاسۋدان ارىعا بارىپ جاتقانى قانشاما؟! كەز كەلگەن الەۋمەتتىك جەلىلەردى اشىپ قاراساڭىز، ارتىنان قانشا وقىرمانى، تىڭدارمانى بار تانىمال ادامدار داستارقان باسىندا ايەلىن قۇشاقتاپ وتىرعان، كوپتەگەن سۋرەت سالادى. ۇلتتىڭ قايماقتارى بولىپ جۇرگەن تۇلعالاردىڭ ءوزى ءسويتىپ جاتقاننان كەيىن، ونسىزدا ەلىكتەگىش حالىقتىڭ ۇرپاقتارى كورگەنىن ىستەمەي مە؟ سونىمەن قاتار، انشىلەردىڭ ىشىندە ۇيلەنگەنىن جاسىرىپ جۇرگەن انشىلەر بار عوي، ولار ءبىر يمانى تاسىعاندىقتان، شاريعي نارسەدەن اتتاپ كەتۋدەن قورقىپ ەمەس، جانكۇيەرلەرىم ازايىپ قالادى دەگەن ارزان ويمەن جاسىرىپ جۇرگەندەي. ەستى ەركەك ۇيلەنگەنىن جاسىرمايدى، كەرىسىنشە، ايەلىن جاسىرادى. ءبىز وسى نارسەنى شاتاستىرىپ الىپ جاتقان سياقتىمىز...

جارىلقاسىن داۋلەت، سازگەر: ماشيناسىن سىرىپ السا، توبەلەسە كەتۋگە دايىن تۇراتىن اكەلەر، قىزىنىڭ ارىنا سىزات تۇسسە دە، قىڭق ەتiپ جاتقانىن بايقامايسىڭ.

ۆالەنتين كۇنى – حالىقتى  ازعىندىققا شاقىراتىن مەيرام. ونى بىرەۋلەر «قوزى كورپەش-بايان سۇلۋ» دەپ وزگەرتىپتى. جاپالاقتى تاسپەن ۇرساڭ دا، تاستى جاپالاقپەن ۇرساڭ دا جاپالاق ولمەي مە؟ ءوزىڭىز ويلاپ كورىڭىزشى، قوزى كورپەش، بايان سۇلۋ دەگەن كىمدەر؟ قوزىنى قودار ءولتىرىپ تاستاعان سوڭ، بايان دا وزىنە قول جۇمساپ ءولدى دە، ءبىر مولاعا كىردى. ءوزىن-وزى ءولتىرىپ، جانازاسى شىقپاي، ءبىر مولاعا جاتقان ادامدى كىمگە ۇلگى قىلىپ وتىرمىز؟ بيىك ۇيدەن قۇلاپ ءولىپ جاتقان بالالار از با ەدى، اعايىندار؟! بۇل مەيرامنىڭ اتىن وزگەرتىپ "اقىل" تاپقان "دانا" ادام جايلى نە ايتۋعا بولادى؟ قوبىلاندى باتىر جىرىنداعى قۇرتقانىڭ، الپامىس باتىر جىرىنداعى گۇلبارشىننىڭ وبرازى قۇرىپ قالعانداي، وزىنە-وزى قول جۇمساعان بەيباقتاردىڭ ەسىمىن دارىپتەۋ وتە قورقىنىشتى نارسە. ءبىز وسكەلەڭ ۇرپاقتى سۋيسيدكە ءوز قولىمىزبەن يتەرمەلەپ جاتقان جوقپىز با؟ بىرەۋ ءولىپ، سونىڭ ارتىنان ەكىنشىسى ءوزىن ولتىرسە، ەرلىك پە؟ "ويباي، وسىنى الماسام ولەم، ونسىز ءومىر جوق" دەپ جۇرگەن 18-20-داعى "ماحاببات پەرىشتەلەرىنىڭ" ۇيلەنگەن سوڭ جارتى جىل نە ءبىر جىلدان سوڭ ءبىر-بىرىن كورمەستەي بولىپ، اجىراسىپ جاتقان وقيعالاردىڭ كۋاسى بولعانمىن. وتباسىنىن ىرگەسىن جاستاردىن بىر-بىرىنە دەگەن ماحابباتى ۇستاپ تۇرمايدى، اللاعا دەگەن ماحابباتى بەرىك ەتەدى.

ۆالەنتين كۇنىن تويلاۋ بىزگە زيان بەرمەسە پايدا بەرمەيدى. مىسالى، بۇل كۇن زينا جاساۋعا شاقىرادى. قىزىڭ پاكتىگىنەن ايىرىلادى. اتا-اناسىن قورلاپ، ابىرويىنا داق تۇسىرەدى. قىزى بار ءۇي ارلى قىزىن جوعالتسا، ۇلى بار ءۇي سورلى ۇلىنان ايىرىلۋى مۇمكىن. ويتكەنى، قورلانعان قىزدىڭ اعاسى نە اكەسى بارىپ ۇلدى ۇرىپ، جازىم ەتۋى مۇمكىن. ءبىر ەمەس، ەكى ۇيگە وپات كەلەدى. مۇنداي وقيعالار ءدال وسى كۇنى ارتاتىنىن ەسكەرسەك، قانشاما ءۇي قارا جامىلۋى مۇمكىن.

ءقازىر فەيسبۋك دەگەن الەۋمەتتىك جەلىدە جالاڭاشتانعان سپامدار قاپتاپ كەتتى. اسىرەسە تانىمال ادامداردان قايتا-قايتا تارالادى. بۇنى ەشكىم ادەيى تاراتىپ وتىرعان جوق، تاراتىلىپ وتىر. بۇل جەردە ايتپاعىم، مايمىلدار ءوز اراسىندا ءبىر مايمىل قۇلاپ قالسا، قالعاندارى وزدەرiءنىڭ قۇلاماعاندارىنا ءماز بوپ، شىقىلىقتاپ كۇلەدى. مىناۋ ۆالەنتين كۇنىن اتاپ ءوتىپ جاتقاندار، ەرتەڭ زيالى قاۋىم «قوي» دەپ قارسى شىققاندا الگى سپامدى جاساعاندار مىسالداعى مايمىلدار سەكىلدى زيالى قاۋىمعا كۇلەدى. نەگە؟ سەبەبى، "پاراقشالارىڭدا جاريالاپ جاتقاندارىڭ اناۋ" دەمەي مە؟ سوندىقتان، قوعامنىڭ قايماعى بولىپ جۇرگەن جاندار، ءاربىر سوزدەرىن ىستەرىمەن سايكەستەندىرىپ ايتسا، سالماقتىراق شىعار ەدى. اكەسى دە ۇلىنا ءسوزى ءوتىمدى بولىپ، «يماندى بول» دەي الۋ ءۇشىن، الدىمەن ءوزى يماندى بولۋى كەرەك قوي. ال، قازىرگى اتا-انا ءوزى ءبىرىنشى ماحاببات كۇنىن تويلايدى، ودان شىققان بالانى نە دەپ تىياسىڭ؟ ماشيناسىن سىرىپ السا توبەلەسە كەتۋگە دايىن تۇراتىن اكەلەردىڭ، قىزىنىڭ ارىنا سىزات تۇسسە دە قىڭق ەتiپ جاتقانىن بايقامايسىڭ. اكە ءوزى دۇيەقوڭىز، اشكوز بولا تۇرىپ، بالاسىنا اقشا دەگەن جامان نارسە دەسە يلانا ما؟ بالا ەستىگەنىن ەمەس، كورگەنىن ىستەيدى ەمەس پە؟ سوندىقتان، ءبىز اعا بۋىن ىسىمىزبەن وسكەلەڭ ۇرپاققا ۇلگى بولۋىمىز كەرەك. قاستەرلەپ ۇستاۋعا ءتيىس ماحابباتتى ۆالەنتينگە ءبىر، قوزى كورپەشكە ءبىر تىقپالاپ ءقادىرىن كەتىرمەي، ەكەۋدىڭ اراسىندا جاسىرىن ۇستاپ، ايالاپ، باعالى ەتكەنىمىز دۇرىس.

ايدار تۇرعانبەك، ءانشى: ماحاببات ماقتانىش ەمەس!

مەن جانە مەنىڭ وتباسىم ءۇشىن مۇنداي مەرەكە جوق. ءبىز ءۇشىن ءار كۇن مەيرام. مەن ماحابباتىمدى ءبىلدىرۋ ءۇشىن بەلگىلى ءبىر كۇندى كۇتپەيمىن. اركىم ءوز قاراماعىنداعىلارعا جاۋاپتى عوي، مەن قارىنداستارىمنىڭ دا مەرەكەلەۋىنە جول بەرمەيمىن. ۆالەنتين كۇنىن نە قوزى مەن بايان كۇنىن پايدالانىپ سەزىمىڭدى ءبىلدىرۋ دەگەندى قولدامايمىن، سەبەبى سەزىم ايتپاي-اق تۇسىنىسەتىن، ەكى ادامنىڭ عانا اراسىنداعى نارسە. وزگەلەر تۇگىلى، ول ەكى ادام ءبىر-بىرىن جاقسى كورەتىندەرىن كوزىنەن، ارەكەتىنەن ءتۇسىنۋى ءتيىس. الەۋمەتتىك جەلىلەردە ماعان "ايەلىڭىزدىڭ سۋرەتىن نەگە سالمايسىز" دەگەن سۇراقتار ءجيى قويىلادى، كەشىرىڭىز، ول مەنىڭ ايەلىم بولسا، مەن عانا كورۋ كەرەك سۇلۋلىعىن نەگە ەلگە جاريالاۋىم كەرەك؟ جالپى، ماحاببات ماقتانىش ەمەس! ول نەعۇرلىم جاسىرىن بولعان سايىن قۇندى دەپ ويلايمىن. جاقسىلىق تا جاريا بولعاندا ساۋابىن جوياتىنى سەكىلدى، ماحاببات تا ءقادىرىن كەتىرىپ الادى دەپ ويلايمىن.

مارجان سۇلتانباي، جۋرناليست: قىزدار قاۋىمى كوپ نارسەگە تۇرتكى بولادى...

قازىرگى جاستاردىڭ ءبارى سانالى، ءبارى اقىلدى. مىسالى، ءبىزدىڭ كەزىمىزدە كومپيۋتەر، عالامتور دەگەن قولجەتىمسىز ەدى. ۆالەنتين دەگەننىڭ كىم ەكەنىن دە بىلمەي وستىك. ال ءقازىر 3 جاسار بالانىڭ قولىنان ايپاد، ايفون كورەسىڭ. بارلىعى عالامتورعا كىرەدى، بۇل مەرەكەنىڭ قايدان كەلگەنىن، قانداي مەرەكە ەكەنىن بىلگەن سوڭ تويلامايدى دەپ ويلايمىن. Google، ۋيكيپەديادا سەكىلدى ىزدەۋشى باعدارلامانىڭ بىرىنە "اۋليە ۆالەنتين" دەگەندى جازا قالسا، بارلىق اقپارات مونشاقتاي ءتىزىلىپ شىعا كەلەدى. مۇنى كورگەن سوڭ كوپشىلىك قاۋىم، اسىرەسە اقىل توقتاتقان ستۋدەنتتەر جاعى ولقىلىققا بارا قويمايدى دەپ ۇمىتتەنەمىن. مۇندا تەك، قىزدار قاۋىمى كوپ نارسەگە تۇرتكى بولادى دەپ ويلايمىن. سەبەبى، ەرلەرگە قاراعاندا نازىك جاندىلار رومانتيكاعا جاقىن بولادى. "تانا كوزىن سۇزبەسە، بۇقا ءجىبىن ۇزبەيدى" دەمەكشى، قىزدار: "جانىم ەرتەڭ ماحاببات كۇنى" دەپ تۇرسا، جىگىتتە گۇل سىيلاۋدان باسقا امال بار ما؟

كوشەدە قۇشاقتاسىپ، قىز بەن جىگىت بولىپ دوستاسىپ جۇرگەن باۋىرلارىما، جارىمدى ءۇش رەت قانا كورىپ، تۇرمىسقا شىعىپ كەتكەنىمدى ۇلگى تۇتقىم كەلەدى. سەبەبى، نەكە بولماعان جەردە رەنجىسىپ قالۋ، اجىراسىپ كەتۋ وپ-وڭاي. ءبىراق، اركىم ءوزى بىلەدى عوي. مەن ادام دەگەن اتتى ارقالاپ جۇرگەن اقىل يەلەرىنە بۇيىرىپ، ەشتەڭە دەي المايمىن. ءوز باسىم وتباسىممەن بۇل مەيرامدى تويلامايمىن. اللا قالاسا، بولاشاقتا بالالارىمدى دا سولاي تاربيەلەيمىن دەپ ويلايمىن.

اسحات سادىرباي، جۋرناليست: ماقساتسىز مەرەكە دەپ سانايمىن!

ءبىز تىم مەرەكەشىل بولىپ بارا جاتقان سياقتىمىز! بايقايسىز با؟! ءبىز بارلىق ەلدىڭ، بارلىق ۇلتتىڭ مەرەكەسىن تويلاي بەرەتىن بولىپ كەتتىك. مەنىڭشە رۋحى ءور، نامىسى بيىك قازاققا مۇنداي ارزان مەرەكە كەرەك ەمەس. بىرىنشىدەن، پايداسىنان زيانى كوپ پە دەگەن دە وي كەلەدى. الەمدە بولىپ جاتقان داعدارىس ءبىزدىڭ ەلگە دە اسەر ەتەتىنى انىق، سوندىقتان دا بۇل ارتىق شىعىن، ارتىق اقشا جۇمساۋ دەپ ويلايمىن. الەمنىڭ كوپتەگەن ەلى بۇل مەرەكەنى تويلامايدى. كەيبىر ەۋروپا ەلدەرى عانا اسا ءمان بەرگەنىمەن، باسقالارى ءۇشىن بۇل كۇن ەشقانداي ماڭىزعا يە ەمەس. ونى قازاقشالاپ "قوزى كورپەش-بايان سۇلۋ" كۇنى دەپ تويلاپ ءجۇر عوي، مەن وعان دا كەلىسپەيمىن. سەبەبى، ادام سۇيىكتىسىنە سىيلىق بەرۋ نەمەسە وعان سەزىمىن ءبىلدىرۋ ءۇشىن مىندەتتى تۇردە قاندايدا ءبىر كۇندى بەلگىلەۋ كەرەك پە؟ باسقا كەزدە سىيلىق بەرۋگە بولماي ما؟ ەكىنشىدەن، بۇل قازاقتىڭ مەرەكەسى دە ەمەس، ءتۇپ-تامىرى، ماقساتى ايقىن ەمەس. بۇل مەرەكەلەردى كىم شىعاردى، ول قالاي تويلانۋ كەرەك، تويلاۋداعى ماقساتى نە ەكەنىن بىلمەي تۇرىپ، ايتەۋىر قىدىرىپ، تاعى باسقا نارسەلەر ىستەپ، قۇپتالماعان قادامدارعا بارۋدىڭ قاجەتى قانشا؟ ۇشىنشىدەن، ماحابباتىڭدى نەگە وسى كۇنى عانا ەسىڭە الۋ كەرەكسىڭ؟ وسى كۇنى الەۋمەتتىك جەلىلەر ارقىلى دا سەزىمدەرىن بىلدىرەتىندەر كوبەيەدى. ال، ءوزىڭنىڭ سەزىمىڭدى، ماحابباتىڭدى، وتباسىڭدى جەلىگە جاريالاۋ دەگەندى مەن مۇلدە تۇسىنبەيمىن. ءوز باسىم قارسىمىن، جاريالاعىسى كەلگەندەر وزدەرىنە ۇناسا جاريالاي بەرسىن! مەن پۋبليكاعا وتىرىك ويناعىم كەلمەيدى!

دەرەككوز: "اسىل ارنا"