جوبالىق باسقارۋ كورسەتكىشتەرى اياسىندا «ەڭبەك ونىمدىلىگىن ارتتىرۋ» ينديكاتورىنان باسقا 4 كورسەتكىشكە قول جەتكىزىلدى. مەملەكەتتىك باعدارلامانىڭ 2017 جىلعا جوسپارلانعان 123 ءىس-شاراسىنىڭ 122ء-سى ورىندالدى، تەك 1ء-ۋى ورىندالعان جوق.

قوعامدىق دەنساۋلىق ساقتاۋدى دامىتۋدىڭ ءبىرىنشى باعىتىن ىسكە اسىرۋ اياسىندا 24 شارا ورىندالدى. قىزمەتتىڭ ينستيتۋسيونالدىق نەگىزى قۇرىلدى، حالىقارالىق سەرىكتەستەرمەن بىرلەسىپ ازىرلەنگەن جول كارتاسى ىسكە اسىرىلىپ جاتىر. قوعامدىق دەنساۋلىق ساقتاۋ بويىنشا نەگىزگى جۇمىس ەڭ الدىمەن سوزىلمالى ينفەكسيالىق ەمەس اۋرۋلاردىڭ پروفيلاكتيكاسىنا جانە حالىق اراسىندا سالاۋاتتى ءومىر سالتىن ناسيحاتتاۋعا باعىتتالعان. بالالاردىڭ دەنساۋلىعىن ساقتاۋدى ساباقتاستىرۋ ءۇشىن مەكتەپ مەديسيناسى ءبىلىم بەرۋ جۇيەسىنەن دەنساۋلىق ساقتاۋ جۇيەسىنە بەرىلدى، سونىمەن بىرگە مەكتەپتە تاماقتاندىرۋدىڭ ءبىرىڭعاي ستاندارتتارى مەن سۋيسيدتەردىڭ الدىن الۋ باعدارلاماسى ەنگىزىلۋدە.

دەنساۋلىق ساقتاۋدىڭ بارلىق قىزمەتتەرىن ينتەگراسيالاۋ بويىنشا ەكىنشى باعىت اياسىندا مەديسينالىق-سانيتاريالىق العاشقى كومەككە قولجەتىمدىلىكتى قامتاماسىز ەتۋ جونىندەگى ءىس-شارالار ورىندالدى. اتالعان شارالار انا، نارەستە ءولىمى مەن ەلىمىز بويىنشا جالپى قاتەرلى ىسىكتەردەن بولاتىن ءولىمدى تومەندەتۋگە مۇمكىندىك بەردى.

«100 ناقتى قادام» ۇلت جوسپارىنىڭ 82-قادامىنا سايكەس ءۇشىنشى باعىت بويىنشا مىندەتى جاڭا ستاندارتتاردى، سونداي-اق مەديسينالىق كومەك كورسەتۋ تەحنولوگيالارىن بەكىتۋ جانە ەنگىزۋ بولىپ تابىلاتىن ساپا جونىندەگى بىرىككەن كوميسسيا قۇرىلدى. ەلەكتروندىق فورماتتا كورسەتۋ ارقىلى مەملەكەتتىك قىزمەتتەردىڭ قولجەتىمدىلىگى مەن ىڭعايلى بولۋىن ارتتىرۋ جۇمىستارى جۇرگىزىلۋدە. جۇرگىزىلگەن ءىس-شارالاردىڭ ناتيجەسىندە حالىقتىڭ مەديسينالىق كومەكپەن قاناعاتتانۋ دەڭگەيىنىڭ نىسانالى ينديكاتورى 46%-كە دەيىن ءوستى.

ءتورتىنشى باعىت اياسىندا دارىلىك زاتتاردىڭ قولجەتىمدىلىگىن، ساپاسى مەن قاۋىپسىزدىگىن ارتتىرۋ كوزدەلگەن. مەملەكەت باسشىسىنىڭ تاپسىرماسى بويىنشا بارلىق دارىلىك زاتتارعا ارنالعان باعالاردى رەتتەۋ تۋرالى زاڭ جوباسى ازىرلەنىپ، پارلامەنتكە ەنگىزىلدى. 2017 جىلى وتاندىق تاۋار وندىرۋشىلەرمەن 25 جاڭا ۇزاق مەرزىمدى شارت جاسالدى. بۇل زاتتاي مانىندە وتاندىق تاۋار وندىرۋشىلەردەن دارىلىك زاتتاردى ساتىپ الۋ ۇلەسىن 48%-كە دەيىن ۇلعايتۋعا مۇمكىندىك بەردى. ءوتو كولەمىنىڭ ءوسۋى 33%ء-تى قۇرادى نەمەسە اقشالاي مانىندە 45 ملرد تەڭگەنى قۇرادى.

نورماتيۆتىك-قۇقىقتىق بازانى جەتىلدىرۋ جانە ساتىپ الۋدىڭ اشىقتىعىن قامتاماسىز ەتۋ 18،2 ملرد تەڭگەنى ۇنەمدەۋگە مۇمكىندىك بەردى، ولار دارىلىك زاتتاردى قوسىمشا ساتىپ الۋعا جىبەرىلدى. جۇرگىزىلگەن ءىس-شارالار فارماسيەۆتيكالىق ونەركاسىپتىڭ فيزيكالىق كولەمىنىڭ يندەكسىن 43%-كە ارتتىرۋعا جول اشتى.

بەسىنشى باعىت اياسىندا مىندەتتى الەۋمەتتىك مەديسينالىق ساقتاندىرۋدى ەنگىزۋگە دايىندىق جۇرگىزىلۋدە. 2017 جىلى تاۋەكەلدەرگە تالداۋ جۇرگىزىلدى جانە ءوزىن-وزى جۇمىسپەن قامتىعان حالىق سانىنىڭ جوعارى بولۋىنا بايلانىستى ءمامس-تى ەنگىزۋ مەرزىمدەرى اۋىستىرىلدى.

التىنشى باعىت — بۇل ادامي رەسۋرستاردى باسقارۋ تيىمدىلىگى. پەدياترلار، اكۋشەر-گينەكولوگتاردى جانە باسقا دا قاجەتتى ماماندىقتار بويىنشا پراكتيكاعا جىبەرۋ شارتتارىنىڭ وزگەرتىلۋى ەسەبىنەن دارىگەر ماماندار تاپشىلىعى تومەندەتىلدى. مەديسينالىق جوعارى وقۋ ورىندارىنىڭ جەتەكشى شەتەلدىك ۋنيۆەرسيتەتتەرىمەن ستراتەگيالىق ارىپتەستىگى ارقىلى مەديسينالىق ءبىلىمدى جاڭارتۋ باستالدى. ۋنيۆەرسيتەتتىك كلينيكا مودەلى ازىرلەندى جانە مەديسينالىق ۇيىمدار ۋنيۆەرسيتەتتەردىڭ قۇرامىنا بىرىكتىرىلگەن.

جەتىنشى باعىت اياسىندا دەنساۋلىق ساقتاۋدىڭ ينفراقۇرىلىمىن ودان ءارى دامىتۋ ماقساتىندا مەملەكەتتىك-جەكەشەلىك ارىپتەستىك جانە زاماناۋي اقپاراتتىق-كوممۋنيكاسيالىق تەحنولوگيالار نەگىزىندە دەنساۋلىق ساقتاۋ ۇيىمدارى جەلىسىنىڭ جاڭا مەملەكەتتىك ءنورماتيۆى بەكىتىلدى. وسى جىلى ءبىرىڭعاي پەرسپەكتيۆالىق جوسپار بەكىتىلەدى. دەنساۋلىق ساقتاۋدى سيفرلىق جاڭارتۋ ماقساتىندا 4 وڭىردە (قاراعاندى، اقمولا، قوستاناي جانە باتىس قازاقستان وبلىستارى) مەديسينالىق قۇجاتتاردى پيلوتتىق قاعازسىز جۇرگىزۋ ىسكە قوسىلدى، مەديسينالىق ۇيىمداردى اقپاراتتىق جۇيەلەرمەن قامتۋ 75،5% قۇرادى، كومپيۋتەرلەرمەن جاراقتاندىرۋ 2،5 ەسە ارتتى. 56% مەديسينالىق ۇيىمداردا ينتەرنەت قولجەتىمدى.

«جالپى مەملەكەتتىك باعدارلامانىڭ 35 كورسەتكىشىنىڭ 30-ى ورىندالدى، 5 – ورىندالعان جوق، ونىڭ ىشىندە 1ء-ى ءمامس ەنگىزۋ مەرزىمىنىڭ اۋىسۋىنا بايلانىستى ورىندالمادى. جالپى ءولىم جانە انا ءولىمىنىڭ كورسەتكىشتەرى بويىنشا جاقسارۋ بايقالىپ وتىر»، — دەپ قورىتىندىلادى ە. ءبىرتانوۆ.