قازاقستاندىق كاسىپقوي بوكسشى قانات يسلامنىڭ كەلەسى كەزدەسۋى 1 ناۋرىزدا وتەدى. بۇل جەكپە-جەكتى قازاقستاندىقتار تىكەلەي ەفيردەن تاماشالاۋى مۇمكىن.

30 جاستاعى بوكسشى "ۇلكەن بوكس – قوماقتى اقشا" اتتى بوكس كەشىنىڭ نەگىزگى كەزدەسۋلەرىنىڭ بىرىندە سىنعا تۇسەدى، ونىڭ قارسىلاسى ارگەنتينالىق گۋيدو نيكولاس پيتتو (22-3).

بوكسشىلار ورتا سالماقتاعى WBC International Silver چەمپيوندىق بەلبەۋىن ساراپقا سالادى. جالپى، بۇل بوكس كەشىندە 11 جەكپە-جەك وتەدى. بوكس كەشىن رەسەيدىڭ ءبىرقاتار تەلەارناسى تىكەلەي ەفيردەن كورسەتەدى، ونىڭ ىشىندە "بويسوۆسكيي كلۋب" ارناسى بار.

قازاقستاندىق تەلەارنالارعا دا كەزدەسۋلەردى تەگىن ترانسلياسيالاۋ قۇقىعى بەرىلۋى مۇمكىن. سەبەبى، بۇل كەشتە قازاقستان اتىنان قانات يسلامنان بولەك، جانقوش تۇراروۆ تا ونەر كورسەتەدى.

ايتا كەتۋ كەرەك، يسلام مەن پيتتو دۇنيەجۇزىلىك بوكس قاۋىمداستىعىنىڭ رەيتينگىندە وتە جاقىن ورنالاسقان. قازاقستاندىق بوكسشى 9-ورىندا، ال پيتتو 11-ورىندا. Bnews.kz