فلوريدانىڭ بۇرىنعى گۋبەرناتورى دجەب بۋش اقش پرەزيدەنتى باراك وبامانى تياناقسىز ءارى ىنجىق باسشى ەكەنىن ايتىپ، ەلدىڭ سىرتقى ساياساتتاعى جۇمىسىن ءتيىستى دەڭگەيدە اتقارا الماي، حالىقارالىق بەدەلىن تۇسىرگەنىن ايتتى.

"وباما سايلاۋعا تۇسەردە حالىقتىڭ ءال-اۋقاتىن تۇزەتەمىن، ەلدىڭ سىرتقى ساياساتىن جولعا قويامىن، حالىقارالىق بەدەلىن ارتتىرامىن دەگەن سىندى ءبىرتالاي ۋادە بەرگەن بولاتىن. بۇل مىندەتتەردى اتقارۋدى بىلاي قويعاندا، ول احۋالدى تىپتەن ناشارلاتىپ جىبەردى. "ءمۇيىز سۇرايمىن دەپ، قۇلاقتان ايىرىلدى" -نىڭ كەرىن كەلتىرىپ وتىرعان جوق پا. ءقازىر ەلىمىزدىڭ وزگە مەملەكەتتەر الدىنداعى بەدەلىنىڭ قاي دەڭگەيدە ەكەنىن ايتۋدىڭ ءوزى ارتىق"، - دەيدى بۋش.

بۋشتىڭ ايتۋىنشا، اقش الەمدەگى كوشباسشى ورنىنا قايتا جايعاسۋى ءتيىس.

"مەنىڭ قازىرگى كەزدە – قايتسەم، امەريكانى بۇرىنعى قالپىنا كەلتىرەمىن، قايتسەم، ازاماتتارىمىزدىڭ بەيبىت ءارى مامىراجاي تىرشىلىك ەتۋىنە جاعداي تۋعىزامىن دەگەن وي تولعاندىرادى"، - دەيدى ەكس-گۋبەرناتور.

ايتا كەتۋ كەرەك، دجەب بۋش – اقش-تىڭ 43-پرەزيدەنتى كىشى دجوردج بۋشتىڭ اعاسى. ول 2014 جىلدىڭ جەلتوقسانىندا 2016 جىلعى پرەزيدەنت سايلاۋىنا تۇسەتىنىن ءمالىم ەتكەن بولاتىن. Bnews.kz