ۇلىبريتانيا پارلامەنتىنىڭ دەپۋتاتتارى باستاۋىش مەكتەپتىڭ باعدارلاماسىنا سەكسۋالدىق تاربيە بەرۋ ساباقتارىن ەنگىزۋ قاجەت دەپ سانايدى. ولاردىڭ ويىنشا، بالالار تەك ەركەك پەن ايەل اراسىنداعى جىنىستىق قاتىناس تۋرالى عانا ەمەس، ءبىر جىنىستىلار اراسىنداعى سەكس جايىندا دا ءبىلۋى ءتيىس. "سونىڭ ارقاسىندا پەدوفيلدىك ارەكەتتەر سياقتى قىلمىستاردان ساقتانۋعا بولادى"، - دەيدى ولار. Sky News تەلەارناسىنىڭ حابارلاۋىنشا، بۇگىندە حالىق قالاۋلىلارى جاستاردىڭ سەكسۋالدىق ساۋاتتىلىعىن كوتەرۋ سالاسىنداعى مەملەكەتتىڭ جۇمىسىنا قاناعاتتانباي وتىر. ولاردىڭ ايتۋىنشا، باستاۋىش جانە جوعارى سىنىپتاردىڭ وقۋشىلارى ونداي اقپاراتتى بىلۋگە قۇقىلى. ءبىراق ولاردىڭ سەكس-ساباقتارعا بارۋ-بارماۋىن اتا-انالار شەشۋى ءتيىس. دەپۋتات گرەم ستيۋارتتىڭ سوزىنە قاراعاندا، سەكس تۋرالى اقپاراتتىڭ ارقاسىندا جاستار ءوز دەنساۋلىعىن ساقتاپ قانا قويماي، قاۋىپسىزدىك شارالارىن دا ساقتاي الادى. ماسەلەن، باستاۋىش سىنىپ وقۋشىلارى سول ساباقتار ارقىلى جىنىستىق قاتىناستىڭ قاي ءتۇرى دۇرىس ەكەنىن بىلەدى. ءسويتىپ، كامەلەت جاسقا تولماعاندارعا قاتىستى سەكسۋالدىق ەكسپلۋاتاسيانىڭ الدىن الۋعا بولادى. ءقازىر بريتان مەكتەپتەرىندە سەكسۋالدىق قاتىناس ماسەلەسى تەك جاراتىلىستانۋ عىلىمدارى اياسىندا عانا كوتەرىلەدى. ونىڭ ءوزى "جىنىستىق قاتىناس ارقىلى بەرىلەتىن اۋرۋلار" تاقىرىبى كەزىندە 14-16 جاستاعى وقۋشىلارعا وقىتىلادى. ۇلىبريتانيانىڭ ءبىلىم مينيسترلىگى اتالعان ءپاندى ەنگىزۋگە قارسى ەمەس. الايدا وعان دەيىن اتالعان ساباقتى وقىتۋدىڭ ساپاسىن كوتەرىپ العان ءجون.

"الاش ايناسى"