قازاقستاننىڭ ۇيالى بايلانىس وپەراتورلارى "كسەلل" اق، "كار-تەل" ج ش س، "موبايل تەلەكوم-سەرۆيس" ج ش س جانە "التەل" ج ش س ينتەركوننەكت مولشەرلەمەسىن تومەندەتۋ تۋرالى كەلىستى.

ۆەدومستۆونىڭ مالىمەتىنشە، يدم بايلانىس، اقپاراتتاندىرۋ جانە اقپارات كوميتەتىندە ۆيسە-مينيستر اسقار جۇماعالييەۆتىڭ توراعالىعىمەن "كسەلل" اق، "كار-تەل" ج ش س، "موبايل تەلەكوم-سەرۆيس" ج ش س جانە "التەل" ج ش س بايلانىس وپەراتورلارىنىڭ كەڭەسى ءوتتى.

"وپەراتورلار اراسىنداعى كەلىسسوزدەر ناتيجەسىندە 2015 جىلدىڭ 1 قاڭتارىنان باستاپ ينتەركوننەكت مولشەرلەمەسىن مينۋتىنا 11،10 تەڭگەدەن 8 تەڭگەگە (ققس-سىز) دەيىن تومەندەتۋ تۋرالى شەشىم قابىلداندى"، - دەلىنگەن حابارلامادا.

"ءبىز وپەراتورلارعا ءبىر جەردە جينالىپ، ءبىر شەشىمگە كەلۋگە مۇمكىندىك بەردىك. ناتيجەسىندە، ينتەركوننەكت بيىل 28%-عا تومەندەيدى. بۇل ۇيالى بايلانىس قىزمەتتەرى نارىعىنداعى باسەكەلەستىكتى دامىتىپ، ابونەنتتەردىڭ شىعىندارىن ازايتادى"، - دەپ اتاپ ءوتتى اسقار جۇماعالييەۆ.

بۇدان باسقا، اسقار جۇماعالييەۆتىڭ ايتۋىنشا، كەزدەسۋ بارىسىندا وپەراتورلار 2016 جىلدىڭ 1 قاڭتارىنان باستاپ بارلىق ۇيالى وپەراتورلار ءۇشىن ينتەركوننەكت مولشەرلەمەسىن مينۋتىنا (ققس-سىز) 5 تەڭگە كولەمىندە بەكىتۋگە كەلىستى.

ەستەرىڭىزگە سالا كەتەيىك، ينتەركوننەكت – وپەراتورلار اراسىنداعى جەلىارالىق بايلانىس. ينتەركوننەكت ستاۆكاسى ءبىر وپەراتوردىڭ باسقا وپەراتورعا ءوز ابونەنتىنىڭ جەلىدەن تىس قوڭىراۋ شالعاندا سويلەسۋدىڭ ءاربىر مينۋتى ءۇشىن تولەيتىن سومانى انىقتايدى. قازاقستان جاڭالىقتارى