كەشە بەلورۋس پرەزيدەنتى الەكساندر (باتكا) لۋكاشەنكو ارميا قولباسشىلارىمەن كەزدەسۋى بارىسىندا، اسكەري كونسەپسيانىڭ وزگەرۋىنە بايلانىستى ەلدىڭ بەيبىتشىلىگىن، شەكارانىڭ تۇتاستىعىن ساقتاپ قالۋ ءۇشىن، رەسەيدىڭ توسىن شابۋىلىنان قورعانۋ ءۇشىن ناتو-مەن بىرىگۋى مۇمكىن ەكەنىن ايتتى.

رەسەي  فەدەراسياسى وزدەرىنىڭ  بايىرعى كورشىلەرى - ۋكراينا مەملەكەتىنىڭ شەكارالىق تۇتاستىعىن بۇزىپ، بەرەكەسىن العانىن مىسالىعا الا وتىرىپ، بەلورۋس باتكاسى ءدال سول سەنارييدىڭ وزدەرىندە دە قايتالانۋى ىقتيمال ەكەنىن جەتكىزدى.

"الدىمىزدا اش ايۋداي اقىرىپ تۇرعان رەسەي فەدەراسياسىنىڭ قيتۇرقى ءارى ەكى ءجۇزدى ساياساتىنىڭ سالدارىنا قالايدا دايىن بولۋىمىز كەرەك دەگەن ماقسات، مىندەت تۇر. قۇداي بەتىن ءارى قىلسىن! ەگەر ۋكراينا تەرريتورياسىمەن بولعان وقيعا سيۋجەتى بىزگە دە اينالىپ سوعاتىن بولسا، جاعداي مۇلدەم قيىنداپ كەتەدى. رەسەي شىنشىل ساياسات ۇستانىپ وتىرعان جوق. اينالامىزداعى ساياسي تۇراقسىزدىقتار، الەمدىك داعدارىس، كلاندار اراسىنداعى تەكەتىرەس. بۇنىڭ ءبارى ءجايدان-جاي بولىپ جاتقان جوق. ەرتەڭ، ەرتەڭ بولماسا بۇرسۇگۇنى رەسەيدىڭ كوزى بىزگە دە تۇسەدى. قازىرگى، الاساپىران كەزەڭدە باۋىرلاس ەكى ەلدىڭ جاۋلاسىپ، كەسىرىنەن بەيبىت تۇرعىنداردىڭ قازا تاۋىپ جاتقانىن كورە تۇرا كوز جۇما المايمىز. ماسەلەنى بەيبىت جولمەن شەشۋدى مينسك وزىنە مىندەتتەپ الدى. قالاي بولعاندا دا ءبىز بارلىق جاعدايعا دايىن بولۋىمىز كەرەك"،-دەدى لۋكاشەنكو.

بۇل باتكانىڭ باياعىدان بەرى ايتىپ كەلە جاتقان جاتتاندى سوزدەرىنىڭ ءبىرى بولىپ كورىنگەنىمەن، بۇل جولى ول بۇرىن ءوزى "جالماۋىز-مونستر" دەپ باعالاعان ناتو-مەن كونسترۋكتيۆتى ديالوگ قۇرۋعا نيەتتى جانە ءارقاشان دايىن ەكەنىن ايتتى.

سوندا، ناتو-نىڭ قولتىعىنا بۇركەنگەن بەلورۋسيا رەسەيمەن اراقاتىناسىن مۇلدە ۇزە مە؟ جوق، ەكى ەل اراسىنداعى بايلانىس بۇرىنعىداي بولىپ قالا بەرمەك. تەك ساشا لۋكاشەنكو شەكاراسىنىڭ بۇتىندىگىن، ەلىنىڭ تۇتاستىعىن ويلاعاننان ناتو-دان كومەك سۇراماقشى كورىنەدى.

"مۇنى ءتۇسىندىرۋدىڭ قاجەتى جوق سياقتى. لۋكاشەنكو ءاردايىم، ديالوگقا اشىق ەكەنىن ايتىپ جۇرەتىن"،-دەيدى بەلورۋستىك ساياساتكەر الەكساندر فەدۋتا.

"سوڭعى كەزەڭدەردە ەۆرازيالىق جانە كەدەندىك وداقتاعى بەلورۋسيانىڭ تاۋار اينالىمى رەسەي جانە قازاقستانمەن سالىستىرعاندا ەكى ساتىعا جوعارى تۇر. ءبىراق، بۇل كورسەتكىشتەر ءبىزدىڭ بريۋسسەل جانە ۆاشينگتونمەن بايلانىس ورناتۋىمىزعا كەدەرگى كەلتىرە المايدى"،-دەدى ا.لۋكاشەنكو.

"لۋكاشەنكو ءقازىر وزىنە قىسىم بريۋسسەل نەمەسە بەرليننەن ەمەس، ماسكەۋدەن كەلەتىنىن جاقسى تۇسىنەدى. مۇنى اشىق ايتا الماعانىمەن، ناتو-مەن كەلىسىمگە كەلۋى ءمۇنىڭ ايقىن كورىنىسى. ۋكراينا مەن رەسەي اراسىنىڭ بۇلىنۋىنەن لۋكاشەنكو ەش ۇتىلعان جوق. كەرىسىنشە وسى ءبىر كەزەڭدە وزىنە ۇپاي جيناپ تا ۇلگەردى. ەڭ اۋەلى بەلورۋسيا باتىسپەن بايلانىسىن نىعايتتى. مۇنىڭ دالەلى سوڭعى كەزدەرى نەمىس كانسلەرى انگەلا مەركەل مەن فرانسۋز پرەزيدەنتى فرانسۋا وللاندتىڭ مينسكگە ساپارىنىڭ جيىلەۋى"،-دەيدى سانكت-پەتەربورداعى ەۋروپا ۋنيۆەرسيتەتىنىڭ پورفەسسورى گريگوريي گولوسوۆ.

ۋكراينا داعدارىسى الدىندا رەسەيدىڭ باتىس ەلدەرى اراسىندا بەدەلى دە جاقسى ەدى، ءسوزىن دە وتكىزە الاتىن. ءقازىر جاعداي 360 گرادۋسقا كەرى اينالعان. ەندى  باتىس رەسمي مينسكى مەن استانانىڭ ءسوزىن تىڭدايدى، -دەيدى ساراپشىلار.

2013 جىلى ناتو-نىڭ شتاب-بازاسىندا بەلورۋس اسكەرلەرىمەن بىرلەسىپ وقۋ-جاتتىعۋ شارالارىن دا وتكىزگەن. بۇل ءبىرىنشى رەت ەمەس. بايقاعانىمىزداي، بەلورۋسيانىڭ بۇل ۇسىنىسىن ناتو قابىلدايتىنىن دا ايتقان.

بەلورۋسيا ناتو-عا شەكاراسىن بۇرىن دا اشىپ بەرگەن. 2004 جىلى ناتو اۋەدە بومبالاۋشى ۇشاقتارىن بەلورۋسيا ايماعى ارقىلى تاسىمالداعان. 2013 جىلى قۇرلىق اسكەري، بروني تەحنيكالارىن تاسىمالداۋ ءترانزيتىن اشىپ بەرۋ تۋرالى كەلىسىمگە قول قويىلعان ەدى. ال 2014 جىلى بەلورۋسيا اسكەريلەرى ناتو-نىڭ بازاسىندا وقۋ-جاتتىعۋ شارالارىنا قاتىسىپ، كاسىبيلىكتەرىن شىڭداعان بولاتىن.