«نۇر وتان» پارتياسىنىڭ جانىنداعى مادەنيەت پەن ونەردى دامىتۋ ماسەلەلەرى جونىندەگى «ميراس» قوعامدىق كەڭەسىنىڭ ماجىلىسىندە بەلگىلى جازۋشى اكىم تارازي تاريحىمىزدىڭ كەمىندە ەكى مىڭ جىلدان اساتىن مەجەنى قۇرايتىنىن جەتكىزدى.

«مەن 550 جىلدىق مەجەنى قازاق حاندىعىنىڭ ەمەس، «قازاق» دەپ اتالا باستاۋىمىزدىڭ مەرەيتويى دەپ ويلايمىن. حالىق ءبىر ءتۇننىڭ ىشىندە جوق بولىپ كەتىپ، قايتادان پايدا بولمايدى»، - دەدى جازۋشى.

ونىڭ ايتۋىنشا، قازاق جۇرتىنىڭ اتاۋى الدەنەشە رەت الماسىپ، نەشەمە مەملەكەتتىك قۇرىلىمدارعا ايدار بولعان.

«ءبىزدىڭ بۇرىن ەكى اتاۋىمىز بولدى: وسىدان 2200 جىل بۇرىن «كۇن» دەپ اتالدىق. كۇنگە تابىنعانبىز. سوسىن، كوككە تابىنىپ، كۇنگە اي مەن جۇلدىزداردى قوسىپ الىپ، «كوك تۇرىكتەر» بولدىق. ياعني، «تۇرىق» دەگەن سوزدەن شىققان. مۇنىڭ ءبارىن قامتىپ، مەن تاريحشى عالىم، ءتىلتانۋشى نيكيتا ءبيچوريننىڭ كىتابىن ەكى رەت باسىپ شىعاردىم. مۇنى ءوزىمنىڭ قازاق تاريحىنا قوسقان ۇلەسىم دەپ بىلەمىن»، - دەپ وي تارقاتتى ءا.تارازي.

«بوتاحاننان ساناعاندا 2200 جىل، سونان بەرى جاساپ كەلە جاتقان حالىقپىز. قازىرگى ساناقتى قوزىباسىدا انتتاسىپ، قازاق ورداسىن قۇرىپ، قازاق اتانعانىمىزبەن ەسەپتەپ وتىرمىز. ايتپەسە، تامىرىمىز تەرەڭدە جاتىر. وسىنى ايتۋلى شارانى مەرەكەلەۋ بارىسىندا ۇمىتپايىق. شارا مازمۇنىندا ەسكەرىپ وتىرايىق»، - دەپ تۇيىندەدى جازۋشى.

Cونداي-اق، ءا.تارازي «ميراستىق» زيالىلاردىڭ وسىنداي ايتۋلى شارالاردى وتكىزۋ بارىسىندا ىسىراپشىلدىققا جول بەرمەي، ءسان-سالتاناتتان بۇرىن تاربيەلىك جانە يدەولوگيالىق قۇراۋىشتى كۇشەيتۋ جونىندەگى ۇسىنىسىنا قوسىلاتىنىن جەتكىزدى.

ەسكە سالا كەتەيىك، مادەنيەت پەن ونەردى دامىتۋ ماسەلەلەرى جونىندەگى «ميراس» قوعامدىق كەڭەسى 2010 جىلى قۇرىلعان بولاتىن. بۇگىندە كەڭەس تانىمال مەملەكەت جانە قوعام قايراتكەرلەرى مادەنيەت پەن ونەر سالاسىنداعى مەملەكەتتىك ساياساتتىڭ ىسكە اسىرىلۋى بويىنشا ۇسىنىمدار ازىرلەيتىن بەدەلدى الاڭ بولىپ تابىلادى.