جاقىندا الماتىداعكى قازاق مەملەكەتتىك قىزدار پەداگوگيكالىق ۋنيۆەرسيتەتىندە توعىزقۇمالاقتان قازاقستان رەسپۋبليكاسىنىڭ كۋبوگى ءۇشىن جارىس ءوتتى. ءبىر اپتاعا سوزىلعان اقىل-ويدىڭ سايىسىندا 10 وبلىس پەن 2 قالادان 12 كوماندا وي جارىستىردى. كوماندالىق ەسەپتە 1 ورىندى اقتوبە، 2 ورىندى قىزىلوردا، 3 ورىندى وقو مىسە تۇتتى. وسى جارىستا ءال-فارابي اتىنداعى قازاق ۇلتتىق ۋنيۆەرسيتەتى كوپ كۇش شىعاردى. جالپى اتالمىش ۋنيۆەرسيتەتتە 2010 جىلدان بەرى توعىزقۇمالاق قارقىندى دامىپ كەلەدى. ۋنيۆەرسيتەتتەگى توعىزقۇمالاقتىڭ جاتتىقتىرۋشىسى، قر-دىڭ توعىزقۇمالاق قۇراما كومانداسىنىڭ مۇشەسى، سپورت شەبەرى، حالقارالىق جانە رەسپۋبليكالىق توعىزقۇمالاق ويىندارىنىڭ جەڭىمپازى مولداحمەتوۆا اينۇر شاحار قىزى باستاعان توپ توعىزقۇمالاقتان توپ جارىپ كەلدى. جەكەلەي ەسەپتە اينۇر جەتەكشىنىڭ ءوزى 1 ورىن السا، شاكىرتى بوستاندقوۆ بەكسۇلتان جاستار اراسىندا قولا جۇلدەگەر اتاندى.ەلۋبايەۆ گۇلشيرا، اسانەبەكوۆ سىمبات، ەسىركەپوۆا ارايلىم، ءالىپ ۇلى ءالھام، وڭالسىن قىزى دانا، امانجول قىزى اراي اتتى شاكىرتى دە ءۇمىتتى اقتادى. بىزدە ءقازىر توعىزقۇمالاق سپورتى دامىپ كەلەدى. ەلىمىزدە ارنايى توعىزقۇمالاق قاۋىمداستىعى دا بار. قاۋىمداستىقتى ءاليحان مۇحامەديا ۇلى بايمەنوۆ باسقارىپ وتىر. توعىزقۇمالاققا قىزىعۋشىلىق تانىپ وتىرعان ەلدەر كۇننەن- كۇنگە كوبەيۋدە. توعىزقۇمالاقپەن ءقازىر قازاقستاندا اينالىساتىنداردىڭ سانى 100 مىڭعا جەتكەن. ال الەمنىڭ چەحيا، جۇڭگو، رەسەي، قىرعىزستان، قاراقالپاقستان، شۆەيساريا، موڭعوليا، گەرمانيا سەكىلدى ەلدەرىندە ۇنەمى جارىستر ءوتىپ وتىرادى. مىسالى ەڭ ءبىرىنشى توعىزقۇمالاقتان الەم چەمپيوناتى 2010 جىلى چەحيادا ءوتتى. اينۇر حانىم توعىزقۇمالاققا شەتەلدەردىڭ قىزىعۋىن ونىڭ ميدى دامىتۋ ءرولىنىڭ جوعارىلىعىمەن تۇسىندىرەدى. قازىرگى كەزدە رەسەيدىڭ مەملەكەتتىك ۋنيۆەرسيتەتىمەن توعىزقۇمالاققا كەلىسىم-شارت جاسالۋ ۇستىندە. ەگەر ناتيجەلى بولسا بۇدان بىلاي ونداعى ستۋدەنتتەرگە توعىزقۇمالاق سپورت ءتۇرى رەتىندە وتىلمەك. قىتايلاردىڭ دا توعىزقۇمالاققا اڭسارى اۋىپ وتىر. ق ر مەن قحر اراسىندا جىل سايىن دوستىق كەزدەسۋ بولىپ، ويىنشىلاردىڭ تاجريبەسى اۋىسىپ تۇرادى. جاقىنعى جىلداردا قىتايداعى شىنار قاپان ەسىمدى قانداسىمىز قازاقستانعا كەلىپ توعىزقۇمالاقتىڭ قىرى مەن سىرىنا ءۇڭىلىپ ءجۇر ەكەن. بىلۋىمىزشە ماقساتى ۇلتتىق ويىنىمىزدى ارعى بەتتەگى قانداستارعا دا تانىستىرىپ، كەرەگەسىن كەڭەيتۋ. عالىمداردىڭ پىكىرىنشە توعىزقۇمالاقتىڭ پايدا بولعانىنا 4 مىڭ جىل ۋاقىت بولىپتى. ءتىپتى بۇدان دا تامىرى تەرەڭ دەيتىندەر دە بار. قالاي بولعاندا دا توعىزقۇمالاقتىڭ دامۋ كەزەڭى ءالى الدا. ءبىزدىڭ تىلەرىمىز - توعىزقۇمالاعىمىز قىمىزدىڭ كەبىن كيىپ، باسقا ەلدىڭ اتىنا جازىلىپ كەتپەسە بولعانى…
بىرلەسبەك ساياگۇل
