وتان قورعاۋشىلار مەن جەڭىس كۇنى مەرەكەسىنە وراي، «قازاقكونسەرت» مەملەكەتتىك كونسەرتتىك ۇيىمى مامىردىڭ 7ء-سى كۇنى استانادا «جەڭىس تۋى، جەلبىرە!» اتتى قايىرىمدىلىق كونسەرت وتكىزەدى. بۇگىن «قازاقستان» ورتالىق كونسەرت زالىندا وسى ءىس-شاراعا ارنالعان باسپا ءسوز كونفەرەنسياسى ءوتتى، دەپ حابارلايدى Qamshy.kz اقپارات اگەنتتىگى.
باسپا ءسوز كونفەرەنسياسىنا جۋرناليستەرمەن قاتار، استانا قالالىق اۋعان سوعىسى ارداگەرلەرى مەن مۇگەدەكتەرى وداعىنىڭ ءتوراعاسى سەرىك كەنجەبەكوۆ، «چەرنوبىل وداعى» قوعامدىق بىرلەستىگىنىڭ ءتوراعاسى قۋاندىق وماربايەۆ، «شاراپات» الەۋمەتتىك قىزمەت ورتالىعىنىڭ ديرەكتورى كەنجەبولات باپيشيەۆ جانە باسقا دا ازاماتتار قاتىستى. ولارعا «قازاقكونسەرت» مكۇ ديرەكتورى جەڭىس سەيدۋللا ۇلى، وسى مەكەمەدەگى ەسترادا ءبولىمىنىڭ باسشىسى ءمولدىر اۋەلبەكوۆا جانە كونسەرت رەجيسسەرى دينارا جانبوسىنوۆا قايىرىمدىلىق شارانىڭ ءمان-ماڭىزىن ءتۇسىندىردى. رەجيسسەردىڭ ايتۋىنشا، مامىردىڭ 7ء-سى كۇنى ساعات 19:00-دە «قازاقستان» وكز-دا كورەرمەن نازارىنا تەاترلاندىرىلعان ءان-بي قويىلىمى مەن فيلم-كونسەرت ۇسىنىلماق. سول ءۇشىن تانىمال انشىلەرگە قوسا، تەاتر اكتەرلارى مەن حورەوگرافيالىق ۇجىمدار دا تارتىلىپ وتىر. وعان كورەرمەن رەتىندە شاقىرىلعان ەكىنشى دۇنيەجۇزىلىك سوعىس پەن تىل ارداگەرلەرىنە، قازاقستان ارداگەرلەرى ۇيىمىنىڭ مۇشەلەرىنە، اۋعان سوعىسىنىڭ ارداگەرلەرى مەن مۇگەدەكتەرىنە، چەرنوبىل وداقتارىنىڭ، قارتتار ءۇيىنىڭ وكىلدەرىنە جانە بالالار ءۇيىنىڭ تاربيەلەنۋشىلەرىنە 700 بيلەت تەگىن ۇلەستىرىلگەن. سونداي-اق، ولارعا كونسەرت بارىسىندا «قازاقكونسەرت» مكۇ اتىنان كوپتەگەن تۇرمىستىق زاتتار مەن ازىق-تۇلىك تابىس ەتىلەدى.
بۇل رەتتە، جەڭىس سەيدۋللا ۇلى «وسى ءبىر يگى باستامانى ەلىمىزدەگى وزگە دە ونەر ۇجىمدارى مەن قايىرىمدىلىق قورلار ەستافەتا رەتىندە قابىلداسا ەكەن» دەگەن تىلەگىن جەتكىزدى. ونىڭ ايتۋىنشا، التىنبەك قورازبايەۆ، تامارا اسار سىندى ونەر مايتالماندارى، «مەلومەن» جانە «نازار» توپتارى، جەڭىس ىسقاقوۆا، التىناي جورابايەۆا، سەرىك يبراگيموۆ، مەدەۋ ارىنبايەۆ، گۇلنۇر ورازىمبەتوۆا سىندى ەسترادا انشىلەرى، قازاق ونەرىن الەمگە پاش ەتىپ جۇرگەن «فورتە تريو»، «سوليستەر اكادەمياسى» مەملەكەتتىك وركەسترى، «استانا سازى» ەتنو-فولكلورلىق ءانسامبلى مەن «استانا ميۋزيكل» مەملەكەتتىك تەاترى ونەر كورسەتەتىن مەرەكەلىك كەشتە اندەر تەك قانا جاندى داۋىستا شىرقالاتىن بولادى.
«جالعىز قايىرىمدىلىق كونسەرتتە عانا ەمەس، جالپى، ءبىز الداعى ۋاقىتتا دا انشىلەرگە ساحنادا فونوگرامماسىز ءان ايتۋدى مىندەتتەمەكپىز. ءقازىر سوعان سايكەس ليسەنزيا ازىرلەپ جاتىرمىز. شىنى كەرەك، فونوگراممانىڭ كەيدە بىزبەن بىرگە جۇرەتىن كەزدەرى بار. كەيبىر تەليەۆيزيالىق جوبالاردا ونسىز ءان ايتۋعا بولمايدى دەگەندەي. سول سياقتى، اپپاراتۋرا ناشار بولىپ قالعان كەزدە فونوگراممانىڭ كومەگىنە جۇگىنۋگە تۋرا كەلەدى. سوندا دا ءبىز جاستاردى تابيعي، جاندى داۋىسپەن ءان سالۋعا ۇيرەتپەكپىز. سەبەبى، «قازاقكونسەرت» مەملەكەتتىك كونسەرتتىك ۇيىم بولعاندىقتان، ءبىز وزگەلەرگە ۇلگى كورسەتۋىمىز كەرەك. وسىنداي ۇلكەن ۇيىم رەتىندە ولاردىڭ رەپەترۋارىنا، حالىقتىڭ الدىندا دۇرىس ءان ايتىپ، ءجوندى سويلەي الۋىنا ىقپال ەتۋگە ءتيىسپىز. مىسالى، انشىلەرىمىزدىڭ دەنى ءان ورىنداۋ مەن حالىقپەن ارالاسۋ تۇرعىسىنان اقساپ جاتادى. ءبىر ءجوندى اڭگىمە ايتا الماي، ەلدى شۋلاتىپ جاتقاندارىن وزدەرىڭىز دە كورىپ جۇرسىزدەر. بۇنىڭ ءبىر ۇشى ءوزى مەن پروديۋسەرىنە، ال ەكىنشى ۇشى ءبىزدىڭ «قازاقكونسەرتكە» كەلىپ تيەدى. سوندىقتان ءبىز ولاردى قاداعالاۋدى ءجون كوردىك»، – دەدى جەڭىس سەيدۋللا ۇلى.
جۋرناليستەردىڭ وسى ماسەلەگە قاتىستى سۇراعىنا ءوز كەزەگىندە «قازاقكونسەرت» مكۇ ەسترادا ءبولىمىنىڭ باسشىسى ءمولدىر اۋەلبەكوۆا دا جاۋاپ بەردى. بۇدان بولەك، ولار قايىرىمدىلىق كومەكتى تەك وسىنداي مەرەكە كۇندەرى قارساڭىندا عانا ەمەس، مۇمكىندىگىنشە باسقا ۋاقىتتاردا دا جاساپ تۇرۋعا دايىن ەكەندىكتەرىن ايتتى. ال «چەرنوبىل وداعى» قوعامدىق بىرلەستىگى ءتوراعاسىنىڭ ورىنباسارى مارات جۇنىسبەك ۇيىمداستىرۋشى تاراپقا ءوز ۇسىنىسىن جەتكىزدى.
«چەرنوبىل اتوم ەلەكتر ستانساسىنداعى اپات سالدارىنان 150 مىڭ شارشى شاقىرىمعا جۋىق جەر راديواكتيۆتى ەلەمەنتتەرمەن لاستانىپ، ونىڭ سالدارىن جويۋعا 800 مىڭعا جۋىق ادام قاتىسقانى بەلگىلى. ال ەكىنىڭ ءبىرى بىلە بەرمەيتىن ءبىر ماسەلە، وعان ورتالىق ازيا بويىنشا بىزدەن عانا كەتكەن 4 ەشولون، ياعني 32 مىڭ ادامنىڭ 27 مىڭنان استامى ءقازىر جوق. سوندىقتان قايىرىمدىلىق كونسەرت بارىسىندا ءبىزدىڭ دە ەرلىك ىستەرىمىزدى اتاپ وتسەڭىزدەر ءجون بولار ەدى»، – دەدى ارداگەر. جەڭىس سەيدۋللا ۇلى مەن رەجيسسەر دينارا جانبوسىنوۆا بۇل ۇسىنىستىڭ ورىندى ەكەنىن ەسكەرىپ، مەرەكەلىك شارا سەنارييىنە ەنگىزەتىندىكتەرىن ۋادە ەتتى.
